Iki gitaramo cyabereye muri Centre Saint Paul kitabiriwe n'abakuze, abapadiri, ababikira, abayobozi mu nzego zitandukanye, abakirisitu n'abandi banywanye na Kiliziya Gatolika.
Iyi korali yatangiye
ivugabutumwa ku wa 23 Ukuboza 2000 ifite abanyamuryango 60. Ibarizwa mu Ikoraniro Bikiramariya Umubyeyi umara intimba abayifite. Ifite
abanyamuryango 85 barimo abaririmbyi n’abacuranzi. Ifite kandi abana 50 babyina
muri Kiliziya.
Ni ku nshuro ya Gatatu itegura igitaramo cy’indirimbo zisingiza Imana n’izirata u Rwanda. Muri iki gitaramo abagabo bari bambaye ipantaro y'ibara ry'umutuku ishati y'ibara ry'umweru ifitemo ibara ry'umutuku rimanutse.
Abagore bari bambaye inigi mu ijisho, imipira y'ibara ry'umweru itebeje mu ijipo ndende ifite ibara nk'iry'ingwe. Abaririmbyi bose bari bafite ibitabo by'ibara ry'umutuku byabafashishije kuririmba banononsora neza indirimbo bateguye.
Baririmbye ibice bitatu by’indirimbo! Igice cya mbere cyayobowe na Seyobokimana Ignace wanayoboye igice cya Gatatu. Ni mu gihe Nizeyimana Nyituriki Denis wishimiwe mu buryo bukomeye yayoboye igice cya kabiri.
Abacuranzi bo mu gice cya mbere ni nabo bacuranze mu gice cya Gatatu ni Ngendahayo Jean de Dieu na Niyobungihiro Donath. Igice cya kabiri cyacuranzwe na Munezero Regis, Bertin na Alstide.
Igice cya mbere cy’indirimbo cyabyukije amarangamutima y'abakunda indirimbo z’iyi korali nka “Yezu kristu Mwami wacu ", “Amategeko yacu ", “Amahoro y’umutima ", ‘Tis so sweet’, “Allellua du Messie " n’izindi.
Ni abanyamuziki bo ku rwego rwo hejuru! Buri ndirimbo yose baririmbaga yasozwaga n'amashyi y'urufaya y'abanyuzwe n'imirirmbire yabo.
Iyi Chorale yamaze igihe kirenga amasaha ane yogeze ubutumwa bwiza yakubiye mu ndirimbo zitandukanye.
Iyo basozaga kuririmba buri gice basohokaga bakajya kuruhuka. Muri uwo mwanya abasangiza b'amagambo (MC) baganirizaga abitabiriye. Abitabiriye kandi basabwe guhitamo aho igitaramo cy'umwaka utaha kizabera bahuriza ku kuvuga Kigali Arena.
Mu gice cya kabiri iyi korali yaririmbye indirimbo zo hambere zakunzwe mu buryo bukomeye za bamwe mu bahanzi bagwije ibigwi; baririmbye indirimbo nka ‘Praise the Lord’, ‘Qui saura’ ya Mike Brant, n’izindi.
Mu bice bitatu kandi iyi chorale yaririmbyemo yanahinduranyije abacuranzi b'abahanga. Bose bahurije ku kuyobora korali mu bimenyetso byatangaga ishusho n'umuyoboro w'uko amajwi y'indirimbo baririmbye aririmbwa.
Baririmbye
indirimbo ziri mu rurimi rw'Ikinyarwanda, Igifaransa n'Icyongereza.
Igice cya Gatatu cyapfundikiye iki gitaramo cyasozwe n’indirimbo nka ‘All
might God’, ‘Mvike’, ‘Laisse moi t’aime’, ‘Que ma bouche chante ta louange’ n’izindi
nyinshi.
Muri iki gitaramo kandi hacururijwe 'CD' ziriho indirimbo zatunganyijwe mu mwaka wa 2018. 'CD' imwe yaguraga 5000Frw.
Benshi mu bitabiriye iki gitaramo baharaniraga gufata amafoto n'amashusho bazasangiza abo basize mu ngo akaba n'urwibutso kuri bo.
Padiri Mukuru, Dusingizimana Lambert yavuze ko batabayeho mu buzima bw'abahanzi b'abanyabigwi ariko ko hari Chorale Bikiramariya Umubyeyi umara intimba abayifite ibafasha gusubiramo no kumva indirimbo z'abo bahanzi kandi mu buryo bunoze.
Yahagarutse abyinira Imana biratinda!
Dudu yaririmbanye indirimbo 'Laisse -moi t'aimer' na Nizeyimana Denis amuha akarabo
Bafashe amafoto n'amashusho y'urwibutso rw'iki gitaramo
Wari umwanya mwiza wo kubyinira Imana
Iki gitaramo cyitabiriwe n'ingeri zose
Mu bice bitatu by'indirimbo iyi korali yahinduranyije abacuranzi
Ibyishimo ku bitabiriye igitaramo
Munyentarama Athanase, Perezida wa Chorale Bikiramariya Umubyeyi umara intimba abayifite
Kanda hano urebe amafoto menshi:
KANDA HANO UREBE INCAMAKE Y'IGITARAMO CYA CHORALE BIKIRAMARIYA UMUBYEYI UMARA INTIMBA ABAYIFITE
AMAFOTO: Evode Mugunga-INYARWANDA ART STUDIO
VIDEO: Eric Niyonkuru-INYARWANDA