Aba bigaragambya bitabiriye umuhamagaro w'umutwe wiswe Cockroach Janta Party (CJP), watangiye nk'urwenya ku mbuga nkoranyambaga ariko ukaza guhinduka urugaga rukomeye rw'urubyiruko ruvuga ko rurwanya ruswa, ubushomeri n'akarengane mu burezi.
Abigaragambya bavuga ko ibizamini byangiritse kubera isohoka ry'ibibazo mbere y'igihe, ibintu byatumye miliyoni z'abanyeshuri bongera gukora ibizamini nyuma y'amezi menshi bari bamaze bitegura. Bavuga kandi ko byagize uruhare mu kwiheba kw'abanyeshuri bamwe, aho amakuru avuga ko nibura 12 biyahuye nyuma y'icyo kibazo.
Polisi yafunze imihanda, ifunga sitasiyo za metero ndetse igabanya internet mu bice bimwe bya New Delhi mu rwego rwo kuburizamo imyigaragambyo. Icyakora, ubwo abigaragambya bageragezaga kwegera Inteko Ishinga Amategeko, polisi yakoresheje inkoni n'imyuka iryana mu maso (tear gas) kugira ngo ibatatanye. Hari abagaragaye bakomereka ndetse benshi batabwa muri yombi.
Abasesenguzi bavuga ko imyigaragambyo itakigarukira ku kibazo cy'ibizamini gusa, ahubwo igaragaza uburakari bw'urubyiruko ku bushomeri, izamuka ry'ibiciro n'ubusumbane bukomeje kugaragara mu gihugu.
Nubwo Leta yatangiye gutumira bamwe mu bayobozi b'uyu mutwe mu biganiro, abigaragambya bavuga ko batazava mu mihanda kugeza igihe Minisitiri w'Uburezi azeguriye kandi hagafatwa ingamba zifatika zo kuvugurura urwego rw'uburezi