Ibitaramo n’inama byinjirije u Rwanda miliyari 132 Frw, ubukerarugendo bwinjiza Miliyari 959 Frw

Ibi byagarutsweho muri Raporo ya RDB ya 2025 yasohotse kuri uyu wa Kabiri tariki ya 28 Mata 2026, igaragaza intambwe ikomeye igihugu gikomeje gutera mu guteza imbere ishoramari, ubukerarugendo, ubucuruzi n’imitangire ya serivisi, binyuze mu mavugurura atandukanye no gukomeza gushyira imbere ishoramari ry’abikorera.

Isoko ry’ishoramari rikomeje kwaguka

Iyi Raporo ivuga ko mu 2025, u Rwanda rwanditse imishinga y’ishoramari igera kuri 799 ifite agaciro ka miliyari 2.62$, izamuka ivuye kuri 612 yariho mu 2024.

Iyi mishinga iteganijwe kuzatanga akazi ku bantu barenga 38,000, aho cyane cyane iy’imitungo itimukanwa, inganda n’ubucukuzi bw’amabuye y’agaciro ariyo iri imbere.

Ishoramari ry’amahanga rikomeje kwiyongera

Raporo igaragaza kandi ko ishoramari mvamahanga (Foreign Direct Investment FDI), ryageze kuri miliyoni 872.9$ mu 2024, izamuka rya 21.8% ugereranyije na miliyoni 716.5$ za 2023. Ibi bikaba bikomeje kugaragaza icyizere cy’abashoramari mu Rwanda.

Ubukerarugendo bwinjije miliyoni 685$

Ubukerarugendo nabwo bwakomeje gutanga umusaruro, aho bwinjije miliyoni 685$ [959,000,000,000 Frw], buvuye kuri miliyoni 647$ mu 2024. Iri zamuka ryatewe ahanini n’abasura pariki bakareba ingagi, ndetse n’ibindi bikorwa bishya by’ubukerarugendo.

MICE yinjije miliyoni 94.7$

Urwego rw’inama n’ibitaramo (MICE) ruri mu zikomeje gutera imbere cyane, aho rwinjije miliyoni 94.7$ mu 2025, izamuka iva kuri miliyoni 84.8$ mu 2024.

Ibi byatewe n’ibikorwa bikomeye byabereye mu Rwanda birimo: Shampiyona y’Isi y’Amagare (UCI Road World Championships 2025), Move Afrika: Kigali yahuje ibyamamare nka John Legend, Mobile World Congress, Basketball Africa League (BAL Season 5) n’ibindi bikorwa mpuzamahanga bikomeye.

Ibicuruzwa byoherezwa mu mahanga bikomeje kwiyongera

Raporo igaragaza ko u Rwanda rwinjije miliyoni 3.6$ z’amadolari avuye mu byoherezwa mu mahanga, cyane cyane mu bucukuzi bw’amabuye y’agaciro, ubuhinzi n’ubuhinzi bw’indabo.

Mu rwego rwo kumenyekanisha igihugu, u Rwanda rwongereye amasezerano ya Visit Rwanda n’amakipe akomeye ku isi harimo: Paris Saint-Germain (kugeza 2028), Atlético de Madrid (kugeza 2028), Los Angeles Clippers (kugeza 2030), na Los Angeles Rams (kugeza 2030).

Ibi byose biteganyijwe kuzongera isura y’u Rwanda ku rwego mpuzamahanga no gukurura ba mukerarugendo n’abashoramari benshi.

RDB ivuga ko hakomeje gushyirwa imbaraga mu koroshya ishoramari no kunoza serivisi, binyuze mu ikoranabuhanga, One Stop Centre n’uburyo bushya bwo gukurikirana imikorere y’inzego zitandukanye.

Hiyongereyeho kandi ishyirwaho rya National Lottery and Gambling Commission (NLGC) kugira ngo habeho imicungire inoze y’urwego rw’imikino y’amahirwe.

Umuyobozi Mukuru wa RDB, Jean-Guy Afrika, yavuze ko ibyo u Rwanda rwagezeho mu 2025 bigaragaza intambwe ikomeye mu guteza imbere ubukungu bushingiye ku ishoramari, ubukerarugendo n’ibyoherezwa mu mahanga.

Yagize ati “Ibyavuye muri 2025 bigaragaza ko dukomeje gutera imbere mu guteza imbere ubukungu bw’igihugu, dushyize imbere ishoramari ry’abikorera, ubucuruzi n’ubukerarugendo bufite ireme.”

RDB ivuga ko izakomeza gushyira mu bikorwa gahunda y’Igihugu yo Kwihutisha Iterambere (NST2) n’ingamba z’imyaka 2025–2030 zigamije guteza imbere ishoramari, kongera ibyoherezwa mu mahanga, no guteza imbere ubukerarugendo bufite agaciro kanini.

RDB yatangaje ko 2025 wabaye umwaka w’iterambere rikomeye mu ishoramari, aho ubukerarugendo bwinjije miliyoni 685$, inama n’ibitaramo byinjiza miliyoni 94.7$ mu bukungu bw’u Rwanda