Ibirori byo gufungura ‘Resitora’ y’umuraperi Nipsey Hussle byacubijwe n’amasasu

Nk’uko byatangajwe na TMZ, aya masasu yarashwe ku Cyumweru tariki ya 1 Werurwe 2026, ahagana saa cyenda n’igice z’amanywa ku isaha yo muri California (3:30 PM PT), mu gihe hari hamaze amasaha make hafunguwe ishami rishya rya Marathon Burger - Long Beach, ishami rya resitora zatangijwe na Nipsey Hussle ubwo yari akiriho.

Amashusho yakwirakwiye ku mbuga nkoranyambaga agaragaza abapolisi bafata umuntu umwe bamushyira mu modoka yabo, gusa amakuru arambuye ku cyateye kurasana ntaratangazwa.

Mu bari bitabiriye umuhango wo gufungura iyi resitora harimo ibyamamare bikomeye mu muziki nka Snoop Dogg na YG, ariko amakuru avuga ko bari bamaze kuva aho ibisasu bitaravuga.

Umuvandimwe wa Nipsey, Blacc Sam, ni umwe mu bari bahari muri uwo muhango, wari usoje icyumweru kidasanzwe ku muryango wa Nipsey.

Ku wa Gatandatu, we hamwe na Lauren London wahoze ari umukunzi wa Nipsey, ndetse n’inshuti ze za hafi, bari bahuriye mu birori byo kwita izina rishya umuhanda umwe wo mu mujyi wa Los Angeles, witiriwe uyu muraperi witabye Imana.

Uwo muhanda wiswe Nipsey Hussle Square mu rwego rwo kumuha icyubahiro.

Nipsey Hussle yishwe arashwe ku wa 31 Werurwe 2019, arasiwe hanze y’iduka rye ry’imyambaro rya Marathon Clothing Store.

Urupfu rwe rwashenguye abakunzi ba Hip Hop ku isi hose, ariko umurage we wakomeje kubaho binyuze mu bucuruzi n’ibikorwa by’iterambere yasize atangije.

Ibi byabereye i Long Beach byongeye kwibutsa benshi amateka mabi y’urugomo rwamwambuye ubuzima, n’ubwo kuri ubu hataramenyekana niba aya masasu hari uwo yakomerekeje cyangwa niba hari indi mpamvu yihishe inyuma yayo.

Polisi ikomeje iperereza kugira ngo hamenyekane icyateye kurasa muri uyu muhango wari ugamije kwizihiza umurage wa Nipsey Hussle.

Marathon Burger Long Beach Shooting pic.twitter.com/Whq6TcdNcj

— Kevin (@malibucastles) March 2, 2026

Urusaku rw’amasasu rwumvikanye mu muhango wo gufungura Marathon Burger, resitora yashinzwe na Nipsey Hussle mu mujyi wa Long Beach

Amasasu yarashwe ahagana nko muri metero nkeya uvuye aho hafungurwaga ku mugaragaro ishami rishya rya Marathon Burger, resitora yashinze nyakwigendera Nipsey Hussle

Nipsey Hussle yarashwe mu 2019 mu mujyi wa Los Angeles, arasiwe muri parikingi imbere y’iduka ry’imyambaro yari afite. Uwakoze ubwo bwicanyi, Eric R. Holder Jr., yakatiwe igifungo cy’imyaka 60 kugeza ku gifungo cya burundu

Mu muhango wo gufungura iyo resitora nshya, Snoop Dogg ni we waciye akagozi gatangiza ku mugaragaro iri shami, ndetse yanagaragaye ari gutegura no gucuruza ‘burgers’ imbere muri resitora mbere gato y’uko amasasu atangira kumvikana hafi aho