Iyo igiciro cya mazutu kizamutse, ingaruka zigaragara mu nzego zitandukanye z'ubukungu. Ikiguzi cyo gutwara ibicuruzwa kiriyongera, bigatuma n'ibiciro by'ibicuruzwa n'ibindi bikenerwa mu buzima bwa buri munsi bizamuka. Akenshi ayo mafaranga y'inyongera yishyurwa n'abaguzi, bigatuma ubuzima buhenda.
Ibiciro bihanitse bya mazutu binagira ingaruka ku musaruro w'inganda, ubuhinzi n'ubwubatsi, kuko ibyo bikorwa byinshi bishingira ku mashini zikoresha mazutu. Iyo igiciro cyayo kizamutse, ibigo bimwe bigabanya umusaruro cyangwa bigasubika gahunda zo kwagura ibikorwa byabyo.
Ni na ko bimeze ku bucuruzi buciriritse cyane, kuko akenshi buba budafite ubushobozi bwo kwihanganira izamuka ry'ibiciro bya lisansi, bikabugora gukomeza gukora bunguka.
Mu bice byinshi bya Afurika bikunze guhura n'ibura ry'amashanyarazi, mazutu ikoreshwa mu byuma bitanga amashanyarazi (generators). Iyo ihenze, n'ikiguzi cyo kwicungira amashanyarazi kiriyongera, bikagira ingaruka ku musaruro w'ibigo no ku mibereho y'abaturage.
Muri uku kugabanuka, ibiciro bya mazutu byaragabanutse muri Malawi, Central African Republic, Zimbabwe, South Africa, Lesotho, Zambia na Botswana. Mu gihe muri Sierra Leone na Mozambique byagumye uko byari.
Ikindi cyagaragaye ni uko u Rwanda rwinjiye muri uru rutonde rw'ibihugu 10 bya Afurika bifite mazutu ihenze kurusha ibindi, rusimbura Eswatini yari yarugaragayemo mu kwezi kwabanje.
Nk'uko imibare ya GlobalPetrolPrices ibigaragaza, muri Kamena 2026, ibi ni byo bihugu 10 bya Afurika bifite ibiciro bya mazutu bihenze kurusha ibindi:
|
Umwanya |
Igihugu |
Igiciro (US$ kuri litiro) |
Umwanya ku Isi |
|
1 |
Malawi |
3.630 |
2 |
|
2 |
Central African Republic |
2.170 |
14 |
|
3 |
Sierra Leone |
2.033 |
23 |
|
4 |
Rwanda |
1.992 |
25 |
|
5 |
Zimbabwe |
1.990 |
26 |
|
6 |
South Africa |
1.852 |
42 |
|
7 |
Botswana |
1.839 |
47 |
|
8 |
Lesotho |
1.820 |
49 |
|
9 |
Mozambique |
1.819 |
50 |
|
10 |
Zambia |
1.786 |
52 |
Ugereranyije n'urutonde rwa Gicurasi 2026, aho impuzandengo y'igiciro cya mazutu ku Isi yari amadolari ya Amerika 1.58 kuri litiro, muri Kamena yagabanutse igera ku madolari 1.50 kuri litiro.
Nubwo impuzandengo y'ibiciro bya mazutu ku rwego rw'Isi yagabanutse muri Kamena 2026, ibihugu byinshi bya Afurika biracyafite ibiciro biri hejuru ugereranyije n'ibindi bice by'Isi. Ibi bikomeje gushyira igitutu ku bukungu, kuko bizamura ibiciro by'ubwikorezi, ubucuruzi n'ibindi bicuruzwa by'ibanze.
Ku Rwanda, kwinjira muri ibi bihugu 10 bifite mazutu ihenze kurusha ibindi muri Afurika bishobora gukomeza kugira ingaruka ku mibereho y'abaturage no ku mikorere y'inzego zitandukanye z'ubukungu.