Iyi raporo igaragaza ko Seychelles ari yo iza ku isonga n’amanota 98.09, igakurikirwa na Mauritius ifite 77.09, na Algeria ifite 54.24. Seychelles igaragara nk’igihugu gifite ubukungu buhanitse ku muturage, iterambere ry’abantu riri ku rwego rwo hejuru, ndetse n’uburyo bwiza bwo kugabanya icyuho cy’abakire n’abakene.
Mauritius nayo igaragaza imiyoborere myiza n’ubukungu butandukanye burimo ubukerarugendo, imari n’inganda, bikayifasha kuguma mu bihugu bifite iterambere rikomeye muri Afurika. Algeria yo ishingira cyane ku mutungo kamere wa peteroli na gaz, bigafasha Leta gushyigikira ibikorwa by’imibereho myiza n’iterambere.
Ku rundi ruhande, ibihugu nka Afurika y’Epfo na Botswana nubwo bifite ubukungu bukomeye, bigaragaramo ikibazo cy’ubusumbane bw’amikoro, aho umutungo utagereranywa neza mu baturage, bigatuma bigira amanota yo hasi ugereranyije n’ibindi bihugu bifite abaturage bake cyangwa imiyoborere ifite ubusumbane buke.
Dore uko ibihugu 10 bya mbere bikurikirana:
1.Seychelles — 98.09: Seychelles iza ku mwanya wa mbere kubera ubukungu bushingiye ku bukerarugendo, ubuyobozi bwiza, n’imibereho myiza y’abaturage. Nubwo ari igihugu gito, gifite urwego rwo hejuru rw’ubukungu ku muturage, ariko gishobora guhura n’ingaruka z’imihindagurikire y’ibihe n’imiterere y’ubukerarugendo ku isi.
2.Mauritius — 77.09: Mauritius ni kimwe mu bihugu bifite ubukungu butandukanye kandi butajegajega muri Afurika. Yavuye ku bukungu bushingiye ku isukari igana mu bukerarugendo, imari n’inganda, bituma iba icyitegererezo mu iterambere.
3.Algeria — 54.24: Algeria ifite umutungo munini wa peteroli na gaz ushyigikira ubukungu bwayo. Nubwo ifite amahirwe menshi, ikeneye kurushaho gutandukanya ubukungu bwayo kugira ngo itaguma ku mutungo kamere gusa.
4.Gabon — 52.45: Gabon ifite peteroli nyinshi n’abaturage bake, bigatuma igira ubukungu ku muturage buri hejuru. Ariko igifite ikibazo cy’ubusumbane n’iterambere ridahinduka cyane mu zindi nzego.
5.Misiri — 52.17: Misiri ifite ubukungu bunini n’imishinga minini y’iterambere, ariko ihanganye n’izamuka ry’ibiciro n’ibibazo by’ifaranga bigira ingaruka ku mibereho y’abaturage.
6.Libya — 46.61: Libya ifite umutungo ukomeye wa peteroli, ariko imvururu za politiki n’umutekano bikomeje kuyitambamira mu iterambere ryuzuye.
7.Tunisia — 45.19: Tunisia ifite ubukungu butandukanye burimo ubuhinzi, inganda n’ubukerarugendo, ariko ifite ibibazo by’ubushomeri n’ihungabana ry’ubukungu.
8.Botswana — 41.92: Botswana izwiho imiyoborere myiza n’ubukungu bushingiye kuri diyama, ariko igikeneye gutandukanya amasoko yayo y’ubukungu.
9.Maroc — 36.73: Maroc ifite ubukungu bushingiye ku nganda, ubuhinzi n’ingufu zisubira, ariko ikomeza guhangana n’ikibazo cy’ubusumbane hagati y’imijyi n’icyaro.
10.Afurika y’Epfo — 26.53: Nubwo Afurika y’Epfo ifite ubukungu bukomeye ku mugabane, ihanganye n’ubushomeri bukabije, ubusumbane n’ibibazo by’ingufu bituma igira amanota yo hasi mu bukire ku muturage.
Iyi raporo igaragaza ko nubwo Afurika ifite ibihugu bikize cyane ku mutungo n’ubukungu, hakiri icyuho kinini hagati y’ubukungu bw’igihugu n’uburyo bungana mu mibereho y’abaturage.