Mu itangazo yashyize ku rubuga rwayo, CAF yemeje ko ikipe izegukana igikombe cya Champions League izajya ihabwa miliyoni 6 z’amadolari ya Amerika, zivuye kuri miliyoni 4 mu gihe ikipe itsindiwe ku mukino wa nyuma izajya ihabwa Miliyoni ebyiri z’Amadorali.
Amakipe azajya atsindirwa muri 1/2 azajya ahabwa Miliyoni 1.2 $ kuri buri imwe, amakipe azajya aviramo muri 1/4 azajya ahabwa ibihumbi 900 by’Amadorali, naho ayasoreje ku mwanya wa 3 cyangwa uwa kane mu matsinda ahabwe ibihumbi 700 by’Amadorali. Muri rusange muri CAF Champions League Cup hazajya hatangwa amafaranga angana na Miliyoni 19 z’Amadorali.
Ikipe izajya itwara igikombe muri CAF Confederation Cup izajya ihabwa miliyoni 4 z’amadolari, avuye kuri miliyoni 2 zatangwaga.
Ikipe izajya iba iya kabiri izajya ihabwa Miliyoni 1 y’Amadorali, izatsindiwe muri 1/2 zihabwe ibihumbi 750 by’Amadorali mu gihe izizajya zisezererwa muri 1/4 zo zizajya zihabwa ibihumbi 550 by’Amadorali. Ni mu gihe ikipe zizajya zigarukira mu matsinda zo zizajya zihabwa ibihumbi 400 by’Amadorali.
Ibi bije mu gihe amakipe akomeje kwitegura imikino ya ¼ cya Champions League.
Umunyabigwi mu gutwara iri rushanwa, Al Ahly SC, azahura na Espérance de Tunis mu mukino ubanza, mbere yo kwakirira uwo kwishyura i Cairo. Ikipe ya Pyramids FC izatangirira hanze isura FAR Rabat.
Muri iyi mikino kandi, Mamelodi Sundowns, yageze ku mukino wa nyuma umwaka ushize, izakira Stade Malien mu mukino ubanza. Renaissance Berkane izacakirana na Al-Hilal Omdurman.
Imikino ibanza iteganyijwe tariki ya 13-14 Werurwe, mu gihe iyo kwishyura izaba tariki ya 20-21 Werurwe.
Mu irushanwa rya Confederation Cup, Olympique Safi izakira Wydad Casablanca, mu gihe Zamalek SC izasura AS Otoho. Al Masry SC izahura na CR Belouizdad, naho Maniema Union icakirane na USM Alger.
Ibihembo byo muri CAF Champions League na Confederation Cup byazamuwe