Inkuru y'urupfu rwe yemejwe n'ikigo cyamuhagarariraga, Goldmans Management, cyatangaje ko Heather yapfuye mu mpera z'icyumweru gishize, asize amateka akomeye mu ruganda rw'imyidagaduro.
Hot Gossip yari itsinda ryamenyekanye cyane kubera imbyino zaryo zidasanzwe, imyambaro y'ubwiza bwihariye irimo iy'uruhu rwa PVC n'iya Lycra yegeranye n'umubiri, ibintu byakururaga imbaga y'abafana ariko bikanatera impaka kubera ababifataga nk'ibibangamiye umuco.
Iri tsinda ryatozwaga na Arlene Phillips, waje kumenyekana cyane nyuma nk'umucamanza mu kiganiro kizwi nka Strictly Come Dancing. Mu 1978, Hot Gossip yanageze ku mwanya wa gatandatu ku rutonde rw'indirimbo zakunzwe mu Bwongereza binyuze mu ndirimbo yabo ya disco yitwa "I Lost My Heart to a Starship Trooper."
Heather Alexander yavuye muri Hot Gossip mu 1981, atangira urugendo rushya rwo gukina amakinamico na filime. Yagaragaye mu biganiro bitandukanye kuri televiziyo birimo The Kenny Everett Video Show, mbere yo kwinjira mu mikino y'ikinamico ikomeye yo ku rubyiniro rwa West End.
Mu 1985 na 1986 yakinnye umukino w'ikinamico witwa "Look, No Hans!" ari kumwe n'umukinnyi w'icyamamare Sir David Jason, wamamaye cyane muri Only Fools and Horses.
Mu myaka yakurikiyeho, Heather yakomeje kugaragara mu bikorwa bitandukanye birimo Dempsey and Makepeace ndetse na Wizbit. Ndetse no mu myaka ye ya nyuma, ntiyahwemye gukorera ubuhanzi.
Mu 2015 yashinze iserukiramuco rya Hastings Fringe Festival, rikomeza gufasha abahanzi benshi kubona urubuga rwo kwigaragaza.
Goldmans Management yavuze ko Heather yakomeje kurwana n'uburwayi bwe kugeza ku munota wa nyuma, ariko akabihisha benshi, akomeza gukora ibyo yakundaga.
Bagize bati: "Heather yari umurwanyi kugeza ku iherezo kandi yabayeho ubuzima bwe bwose yishimye. Mu mwaka ushize yari agikomeje gukora ibitaramo bye by'umuntu umwe, bikaba byarakirwaga neza ndetse agateganya n'ibindi bikorwa by'ahazaza."
Bakomeje bavuga ko yari umuntu wagiraga imbaraga zidasanzwe, ugakunda gusetsa no kunezeza abandi, kandi ko azahora yibukwa nk'umuhanzi wagize uruhare rukomeye mu guteza imbere ubuhanzi bwo mu Bwongereza.
Urupfu rwa Heather Alexander rwashenguye benshi mu bo bakoranye ndetse n'abakunzi b'ibikorwa bye, bamwibukira nk'umugore wagize impano idasanzwe, umurava ndetse n'urukundo rukomeye yakundaga ubuhanzi.
