Hateguwe iserukiramuco rizahuza umuco gakondo n’urubyiruko mu buryo bushya i Kigali

Iri serukiramuco rizatangira ku itariki ya 8 Nyakanga 2026, rikazajya ribera i Kicukiro, mu Murenge wa Gahanga, hafi y’ahahoze hitwa i Nyanza gato, ahari tente nshya yitwa Prymidal Garden.

Abategura iri serukiramuco batangaje ko rizajya riba buri wa Gatatu wa buri kwezi, rikaba rifite intego yo guhoraho no guhinduka igikorwa cy’umuco gihoraho aho abantu bazajya bahurira kenshi.

Herifest Rwanda izibanda cyane ku bikorwa bishingiye ku muco nyarwanda, harimo: Indirimbo gakondo, imbyino za Kinyarwanda, Ibisigo n’imivugo, Guterana ubuse, Imurikamideli ya Kinyarwanda, Ubugeni n’ibindi bikorwa by’ubuhanzi gakondo.

Uretse ibyo, hazanabamo n’ibindi bikorwa bigamije gusabana no kwidagadura, bigamije gutuma umuco urushaho kugaragarira mu buzima bwa buri munsi.

Uwikunze Jordan, umwe mu bateguye iki gikorwa, yabwiye InyaRwanda ko Herifest Rwanda ari urubuga abantu bakwiye kwitegaho byinshi bishya mu bijyanye n’umuco.

Yagize ati: “Ni iserukiramuco abantu bakwiriye kwitega. Abantu bitege kongera kuryoherwa byimazeyo n’umuco nyarwanda kandi nje kongera kubakundisha iby’iwacu.”

Yakomeje ashimangira ko igitekerezo cy’iri serukiramuco cyaturutse ku nzozi zo kongera guha umuco gakondo agaciro, ndetse no gutuma urubyiruko ruwiyumvamo kurushaho. 

Ati: “Nifuzaga ko twajya dutarama umuco wacu ugakomeza gukorwa neza, ndetse n’urubyiruko rukawibonamo neza.”

Mu birori byo gutangiza iri serukiramuco, hateganyijwe ibikorwa bitandukanye bizasusurutsa abazitabira, harimo: Abanyarwenya Kandi na Musa, Clement Inkirigito, MC Abraham na MC Rugwiro, Itorero ry’imbyino gakondo, ‘Band’ izasusurutsa ibirori

Hazanabamo kandi igikorwa cyihariye cyo kwigisha ururimi n’umuco ku rubyiruko, kizajya gitangira saa kumi n’ebyiri za mu gitondo.

Herifest Rwanda igamije kuba umwanya uhoraho wo kugarura ishema ry’umuco nyarwanda, ariko kandi ukaba n’urubuga ruhuriramo imyidagaduro, uburezi n’ubukangurambaga ku rubyiruko.

Mu magambo y’abategura, ni igikorwa kigamije gutuma umuco “utaba gusa amateka, ahubwo ukaba ubuzima bwa buri munsi.”

Herifest Rwanda iritegura gutangira mu buryo bwitezweho kuzana impinduka mu buryo umuco gakondo ugaragazwa, cyane cyane mu rubyiruko, mu Mujyi wa Kigali no mu nkengero zawo.

Uwikunze Jordan: “Umuco si amateka gusa, ni ubuzima. Herifest Rwanda ni urugendo rwo kuwusubiza mu mitima y’abanyarwanda.”

MC Kandi na Musa: “Turi hano ngo dususurutse ibirori, ariko cyane cyane duhuze urwenya n’umuco gakondo ku rwego rushya."

Clement Inkirigito: “Imbyino n’igisigo ni indimi z’umuco wacu. Herifest izatwibutsa aho tuva n’aho tugana.”

Iri serukiramuco rigiye kuba ku nshuro ya mbere rizatangira tariki ya 8 Nyakanga 2026