Iyi filime iri gutegurwa nk’impano y’amavuko y’uyu
muhanzikazi, izaba igizwe n’amashusho magufi azafasha kugaragaza urugendo rwe
rw’ubuzima, ibihe bitazibagirana yagiranye n’abandi ndetse n’uruhare indirimbo
ze zagize mu buzima bw’abazumvise.
Cécile Kayirebwa yujuje imyaka 80 kuri uyu wa 22 Ukwakira
2026. Ni imyaka isaga 60 amaze mu muziki igaragaza urugendo rurerure
rw’umuhanzi wagize uruhare rukomeye mu kubungabunga no kumenyekanisha umuco
nyarwanda binyuze mu ndirimbo.
Mu rwego rwo kumwifuriza isabukuru nziza mu buryo bwihariye,
abantu bari gutegura ibi bikorwa bahisemo gukusanya ubutumwa bw’abantu batandukanye,
kugira ngo bazabuhurize muri filime izerekanwa mu birori byo kwizihiza isabukuru
ye bizabera i Kigali ku wa 25 Ukwakira 2026.
Abategura ibi birori bifuza ko iyi filime itazaba igizwe
n’ubutumwa bw’abo mu muryango we n’inshuti za hafi gusa, ahubwo ko
izanagaragaramo amajwi y’abantu bo mu bice bitandukanye by’Isi bagiye bahura na
we, bakamumenya binyuze mu muziki we cyangwa bakagira ibihe byihariye
bahuriyeho na we.
Ni igitekerezo giha buri wese amahirwe yo kugira uruhare mu
kwizihiza ubuzima n’umuziki bya Kayirebwa, kabone nubwo atazaba ari mu bazitabira
ibirori bizabera i Kigali.
Abategura iyi filime barahamagarira abantu bose bifuza
kugira uruhare muri iki gikorwa gufata amashusho magufi arimo ubutumwa bwabo,
bakayasangiza itsinda riri kugitegura.
Ubutumwa bushobora kuba ubusanzwe bwo kwifuriza Kayirebwa
isabukuru nziza, kwibuka igihe runaka bagiranye na we, kuvuga icyo bamukundira
cyangwa uruhare indirimbo ze zagize mu buzima bwabo. Abifuza kuririmba
indirimbo ye, kumusomera igisigo cyangwa kumugezaho ikindi gitekerezo
kibaturutse ku mutima na bo bahawe ikaze.
Ikintu cy’ingenzi ni uko ubutumwa bwose bugomba kuba ari
ubwo umuntu atanga abikuye ku mutima, agaragaza uko abona Kayirebwa n’icyo
amushimira mu rugendo rwe.
Nta rurimi rwihariye rusabwa. Abifuza gutanga ubu butumwa
bashobora gukoresha Ikinyarwanda, Igifaransa cyangwa Icyongereza, bitewe
n’ururimi bumva neza kandi babasha kwifashisha mu kugaragaza ibitekerezo byabo.
Abategura iki gikorwa basaba buri muntu gutangira amashusho
avuga amazina ye n’aho ari gufatira amashusho, ubundi akavuga ubutumwa
yateguriye Kayirebwa.
Ntibisaba ibikoresho by’umwuga cyangwa gutegura amashusho
ahenze. Telefoni isanzwe irahagije, icy’ingenzi kikaba ubutumwa bwiza kandi
buturutse ku mutima. Amashusho ntazarenza iminota itatu.
Abifuza kohereza ubutumwa bwabo bashobora kubunyuzaho kuri
Email ceka.i.rwanda@gmail.com cyangwa kuri WhatsApp Nimero: +250 781 446
204.
Ibi bikorwa bije mu gihe Cécile Kayirebwa yitegura kwizihiza
intambwe ikomeye mu buzima bwe, aho imyaka 80 amaze avutse ihurirana n’imyaka
60 amaze akora umuziki.
Mu myaka yamaze mu muziki, Kayirebwa yabaye umwe mu bahanzi
bagize uruhare mu gukomeza gusigasira indirimbo gakondo nyarwanda no kuzigeza
ku bantu bo mu bihe n’ahantu hatandukanye. Ku bamukurikiye kuva kera, indirimbo
ze zibibutsa ibihe by’ubuzima bwabo, mu gihe ku bandi zabaye inzira yo kumenya
no gukunda umuco nyarwanda.
Filime iri gutegurwa iratanga uburyo bwo guhuza izo nkuru
zitandukanye, buri wese akagaragaza icyo Kayirebwa asobanuye mu buzima bwe.
Ubutumwa bw’umuntu umwe bushobora kuba ubusanzwe bwo kumwifuriza isabukuru
nziza, mu gihe ubundi bushobora kuba ubuhamya bw’ukuntu indirimbo ye
yamuherekeje mu bihe bikomeye cyangwa by’ibyishimo.
Abategura iki gikorwa, barimo Isimbi Laura, Cyusa Serge,
Numukobwa Diane na Kirenga Eric, bagaragaje ko nubwo bidashoboka ko abantu bose
bagize uruhare mu rugendo rwa Kayirebwa bazaba bari kumwe na we muri ibyo
birori, bifuza ko amajwi yabo na yo azaba ahari binyuze muri iyi filime.
Ni yo mpamvu buri wese ufite ubutumwa bwo kugeza kuri uyu
muhanzikazi asabwa kubutanga mbere y’itariki ntarengwa, kugira ngo bushyirwe
hamwe n’ubw’abandi buzerekanwa mu birori byo kwizihiza Kayirebwa80 i Kigali.
Ku muntu wese wigeze gukorwa ku mutima n’indirimbo za Cécile
Kayirebwa, wagize icyo amwigiraho cyangwa ufite igitekerezo yifuza kumugezaho,
iya ni yo mahirwe yo kumwereka ko urugendo rwe rutibagiranye, binyuze mu
butumwa bwe bwite. Hejuru y’ibi kandi, hari no gutegurwa igitabo kizasohoka
kivuga ku buzima bwa Kayirebwa.
Kanda hano ubashe kureba amakuru arambuye ku bikorwa bya CécileKayirebwa
Mu gihe Cécile Kayirebwa yizihiza imyaka 80 amaze avutse
n’imyaka 60 mu muziki, hateguwe filime mbarankuru izakusanyirizwamo ubutumwa
n’ubuhamya bw’abamukunda bo hirya no hino ku Isi, izerekanwa mu birori bizabera
i Kigali