Hateguwe amarushanwa yo gusoma ibitabo bitoza indangagaciro

Aya marushanwa yateguwe n’Ishyirahamwe ry'Urugaga rw'Abanditsi mu Rwanda (RWABIA) ku bufatanye na Minisiteri y’Uburezi (MINEDUC), Ikigo cy’Igihugu gishinzwe Uburezi bw’Ibanze (REB), PAM-RWANDA, RTB, Urugaga rw’Abanditsi n’izindi nzego zitandukanye zifite aho zihuriye no guteza imbere umuco wo gusoma no kwandika.

Ni amarushanwa ahuriweho n’abanyeshuri biga mu mashuri abanza, ayisumbuye ndetse n’amashuri ya TVET, aho bazajya basoma ibitabo byatoranyijwe bifasha mu kubaka indangagaciro zishingiye ku mateka y’u Rwanda, gukunda igihugu no kwimakaza umuco nyarwanda.

Mu bitabo abanyeshuri bahawe gusoma harimo Inkuru ya Rwigema, Inkuru y’Inkotanyi Tito, Nkunda Igihugu cyanjye, Rukundo na Shyaka, Rwanda Nkunda, Papa Mama n’Abana baganira ku Rwanda, Umwali Ubereye u Rwanda, Urubyiruko Dufitanye Igihango, Inkotanyi Ntatezuka Tito Rutaremara, Kagame Paul Imbarutso y’Ubudasa bw’u Rwanda, Umukozi Ubereye u Rwanda n’ibindi byinshi bigamije gutoza abana indangagaciro zubaka igihugu.

Umuyobozi w'Urugaga rw'Abanditsi mu Rwanda, Hategekimana Richard, yavuze ko aya marushanwa agamije gufasha abana gukurana urukundo rw’igihugu ndetse bakarushaho gusobanukirwa amateka n’indangagaciro byaranze u Rwanda.

Yagize ati: “Nta kindi gihugu cyiza cyaha abana bacyo uretse indangagaciro zibafasha gukurana igihugu cyabo. Turashaka kubaka abana bakunda u Rwanda, bafite ubunyarwanda n’indangagaciro zibafasha kuba abaturage beza.”

Yakomeje avuga ko ibi bitabo biri mu murongo w’impanuro za Perezida wa Repubulika Paul Kagame ukomeje gushimangira ko uburezi bw’u Rwanda bukwiye kuba bushingiye ku ndangagaciro z’umuco nyarwanda aho kuba uburezi bushora abana mu mitekerereze y’ubukoroni.

Ati: “Perezida wa Repubulika ahora asaba ko hubakwa uburezi bubereye u Rwanda. Ibi bitabo biri muri uwo murongo wo kubaka umunyarwanda uzi igihugu cye kandi ugikunda.”

Aya marushanwa yatangiriye ku rwego rw’ishuri, aho azakomereza ku rwego rw’umurenge, akarere, intara n’Umujyi wa Kigali mbere yo kugera ku rwego rw’Igihugu, abazahiga abandi bagahabwa ibihembo birimo amafaranga agera kuri miliyoni imwe y’amafaranga y’u Rwanda, imidari, ibikombe, ibitabo n’ibindi bihembo bitandukanye.

Hategekimana Richard yashimiye abayobozi b’ibigo by’amashuri bamaze gushyigikira gahunda yo kugurira abanyeshuri ibitabo no kubafasha kwitabira amarushanwa, gusa anenga bamwe mu bayobozi bavuga ko batarumva neza akamaro k’iyi gahunda.

Yavuze ko hari bamwe mu bayobozi b’amashuri ndetse n’abashinzwe uburezi batitabira neza gahunda yo guteza imbere umuco wo gusoma ibitabo bitoza indangagaciro, ibintu ashima ko bishobora gutuma hari abana benshi batagerwaho n’aya mahirwe.

Ati: “Ururimi rw’Ikinyarwanda ni rwo ruduhuza nk’Abanyarwanda. Ni ngombwa ko abayobozi b’uburezi bumva neza akamaro ko gutoza abana indangagaciro na kirazira binyuze mu bitabo.”

Aya marushanwa kandi ari gukorwa mu gihe ku wa 3 Gicurasi 2026 abanyeshuri bo muri Kaminuza zitandukanye zo mu Rwanda bari bamaze gukora ibizamini byo kwandika no gusoma ibitabo byateguwe n’Urugaga rw’Abanditsi mu Rwanda.

Mu bitabiriye ayo marushanwa harimo abanyeshuri bo muri RP Karongi, INES

Ruhengeri, East Africa University, Kaminuza y’u Rwanda Ishami rya Huye n’irya Remera, RP Musanze, RP Huye, University of Kigali ndetse n’izindi kaminuza zitandukanye.

Hategekimana Richard uyobora Urugaga rw’Abanditsi mu Rwanda yavuze ko aya marushanwa agamije gushyira mu bikorwa impanuro za Perezida wa Repubulika zo kubaka indangagaciro mu rubyiruko binyuze mu gusoma no kwandika ibitabo.

Yagaragaje ko aya marushanwa adafasha abanyeshuri gusoma gusa, ahubwo abafasha gusobanukirwa amateka y’igihugu cyabo no kugira uruhare mu kubaka igihugu gishingiye ku bumenyi.

Abanyeshuri bitabiriye aya marushanwa bavuga ko yabafashije gusubira ku isoko y’amateka y’u Rwanda ndetse bakarushaho kurumenya no kurukunda.

By’umwihariko kandi, bamwe mu banyeshuri banditse ibitabo bivuga ku byiza by’u Rwanda, aho ibitabo bigera kuri 20 biteganyijwe kuzamurikirwa mu rwego rwo kugaragaza impano n’ubuhanga bw’abanyeshuri mu kwandika.

Abategura aya marushanwa bavuga ko gukundisha abana gusoma no kwandika ibitabo ari imwe mu nzira zikomeye zo kubaka ubukungu bushingiye ku bumenyi no gutegura ejo hazaza h’u Rwanda n’Afurika muri rusange.

Aya marushanwa amaze kuba ngarukamwaka, aho ku nshuro ya kane abanyeshuri bo muri za kaminuza bayitabiriye, ibintu abategura bavuga ko bizakomeza kwaguka kugira ngo abana benshi barusheho gukurana umuco wo gusoma, kwandika no gukunda igihugu cyabo.

Abanyeshuri bo mu mashuri abanza, ayisumbuye na TVET batangiye guhatanira ibihembo birimo miliyoni y’amafaranga y’u Rwanda mu marushanwa yo gusoma ibitabo bitoza indangagaciro n’urukundo rw’Igihugu

Hategekimana Richard yavuze ko kubaka abana bakunda igihugu kandi bafite indangagaciro nziza ari imwe mu ntego nyamukuru z’amarushanwa yo gusoma ibitabo ari kubera hirya no hino mu Rwanda