Mu cyiciro cya Full Marathon, uwa mbere azahabwa 20,000$, uwa kabiri ahabwe 15,000$, uwa gatatu ahabwe 7,500$, uwa kane ahabwe 5,000$, uwa gatanu ahabwe 3,000$, uwa gatandatu ahabwe 2,000$, uwa karindwi ahabwe 1,500$ naho uwa munani ahabwe 1,000$.
Mu cyiciro cya Half Marathon, uwa mbere azegukana 5,000$, uwa kabiri 4,000$, uwa gatatu 3,000$, uwa kane 2,000$, uwa gatanu 1,000$, uwa gatandatu 800$, uwa karindwi 500$ naho uwa munani ahabwe 400$.
Iri siganwa rizaba ku nshuro ya 21 kuva ritangiye gukinwa mu mwaka wa 2005, rikaba riteganyijwe tariki ya 13 na 14 Kamena 2026.
Ku wa 13 Kamena hazaba isiganwa rya Run for Peace (10 Km), mu gihe ku wa 14 Kamena hazakinwa Half Marathon (21.097 Km) na Full Marathon (42.195 Km).
Kigali International Peace Marathon ni rimwe mu marushanwa akomeye yo gusiganwa ku maguru muri Afurika, ryashyizwe ku ngengabihe mpuzamahanga ya World Athletics ndetse rikaba rimaze imyaka irenga 20 rihuza abakinnyi baturutse mu bihugu byinshi byo ku Isi.
Iri siganwa ryashinzwe hagamijwe guteza imbere ubutumwa bw’amahoro, ubumwe n’ubwiyunge binyuze muri siporo.
Abategura iri rushanwa bateganya ko muri uyu mwaka wa 2026 rizongera kwitabirwa n’ibihumbi by’abasiganwa bo mu Rwanda no hanze yarwo, bakazaba bahatanira ibihembo biri mu byashyizwe hejuru kurusha ibyari bisanzwe bitangwa muri Kigali International Peace Marathon.
