Vincent Garcia, uzwi nk’umwe mu bantu bake bamenya
mbere y’abandi uzegukana Ballon d’Or, yatangaje ko itandukaniro ry’amanota
hagati ya Kane na Mbappé ryari rito, bigaragaza ko irushanwa ry’uyu mwaka ryari
rikomeye.
Mu kiganiro yagiranye n’ikinyamakuru L’Équipe cyo mu
Bufaransa, Garcia yavuze ko Kane yarushije Mbappé amanota atageze kuri 41. Aya
niyo manoya Vinícius Júnior wa Real Madrid yarushijwe na Rodri wa Manchester City
mu bihembo bya Ballon d’Or byo mu 2024.
Vincent Garcia yagize ati: “Abakinnyi babiri ba mbere
ku rutonde Harry Kane na Mbappé ni bo bari bahanganye cyane, kandi byarangiye
bitandukanyijwe n’amanota make cyane! Ndabamenyesha ko ikinyuranyo cy’amanota
hagati ya Kane na Mbappé ari gito kurushaho ugereranyije n’icyari hagati ya
Vinícius na Rodri mu 2024, aho cyari amanota 41 gusa!”.
Itandukaniro rito ry’amanota hagati y’abakinnyi
ryongeye kugaragaza ko igihembo cya Ballon d’Or gishobora kugenwa n’utuntu
duto, nubwo abakinnyi baba baragize umwaka mwiza.
Ballon d’Or
itangwa hashingiwe ku majwi y’abanyamakuru 100 baturuka mu bihugu 100
bya mbere ku rutonde rw’impuzamashyirahamwe ry’umupira w’amaguru ku Isi, FIFA.
Buri munyamakuru atoranya abakinnyi 10 yabonye bitwaye
neza kurusha abandi mu mwaka w’imikino uba urangiye. Uwashyizwe ku mwanya wa
mbere ahabwa amanota 15, mu gihe uwashyizwe ku mwanya wa 10 ahabwa inota rimwe
gusa.
Aya manota ni yo agena umukinnyi wegukana igihembo,
bikaba bishoboka ko n’itandukaniro rito mu matora rihindura uko abakinnyi
bakurikirana.
Garcia kandi yagarutse ku kuntu amajwi y’abatoye
ashobora kuba yaragize ingaruka ku mwanya Lamine Yamal wa FC Barcelona yajeho.
Yavuze ko amajwi yagabanyijwe hagati y’abakinnyi bahabwaga amahirwe kubera
intsinzi ya Espagne mu Gikombe cy’Isi ashobora kuba yaratumye Yamal atabona
umwanya mwiza kurushaho.
Yamal yasoje ku mwanya wa gatatu mu rutonde rwa Ballon
d’Or y’abagabo, mu gihe Rodri yaje ku mwanya wa kane.
Ibi bigaragaza ko nubwo Yamal yari mu bakinnyi bitwaye
neza, amajwi yagabanyijwe hagati y’abakinnyi bahataniraga igihembo ashobora
kuba yaragize uruhare mu mwanya yajeho.
Ku rundi ruhande, Harry Kane yegukanye Ballon d’Or ya
2025-2026, ahigitse Mbappé na Yamal, yongeraho ikindi gihembo gikomeye mu
rugendo rwe rw’umupira w’amaguru.
