Harry Kane: Kuva ku kwirukanwa na Arsenal afite imyaka 8 kugera

Rutahizamu w’Ikipe y’Igihugu y’u Bwongereza na Bayern Munich, Harry Kane, amaze imyaka myinshi agaragaza ko ari umwe mu bakinnyi bakomeye ku Isi.

Uretse ubushobozi budasanzwe bwo gutsinda ibitego, uyu mukinnyi w’imyaka 33 azwiho guhuza umukino neza, gukora cyane, kureba neza uko umukino uteye no kugira uruhare mu bwugarizi bw’ikipe ye.

Ibyo byose byamugize umukinnyi wihariye, ariko igihembo cya Ballon d’Or yegukanye mu 2026 kirenze kuba ishimwe ry’ubushobozi bwe.

Ni ikimenyetso cy’urugendo rurerure, rwuzuyemo inzitizi, gushidikanywaho n’abantu batandukanye, ariko akanga gucika intege kugeza ageze ku rwego rwo hejuru mu mupira w’amaguru.

Yirukanywe na Arsenal afite imyaka umunani

Mu gihe abana benshi baba barota kuzakinira amakipe akomeye, Harry Kane we yatangiye urugendo rwe ahura n’ihurizo rikomeye akiri muto.

Afite imyaka umunani, yasezerewe mu ishuri ry’abato rya Arsenal, imwe mu makipe akomeye mu Bwongereza, bitewe n’uko abatoza n’abashinzwe kureba impano z’abakinnyi batabonaga muri we ubushobozi bwari gutuma azagera ku rwego rw’umupira w’amaguru w’ababigize umwuga.

Hary Kane ngo yabonwaga nk’umwana wari ufite umubyibuho ukabije ugereranyije n’ibyo basabaga umukinnyi wifuzaga kugera kure muri ruhago. Abari bashinzwe kumutoza ntibabonaga muri we imbaraga n’ubushobozi bw’umubiri byari gutuma azaba umukinnyi ukomeye.

Kuba ikipe nka Arsenal yaramuretse akiri muto byari kuba bihagije kugira ngo umwana uwo ari we wese acike intege, areke inzozi ze cyangwa yemere ko atazigera agera ku rwego rw’abakinnyi bakomeye.

Ariko kuri Harry Kane uko kwangwa ntikwabaye iherezo ry’inzozi ze, ahubwo kwabaye intangiriro y’urugendo rwo kwigaragaza no guhindura amateka ye.

Yanyuze mu makipe ane mbere yo guhabwa amahirwe muri Tottenham

Nyuma yo kuva muri Arsenal, inzira ya Kane ntiyari yoroshye. Ntiyahise ahabwa umwanya mu ikipe ikomeye ngo agaragaze impano ye, ahubwo yabanje kunyura mu makipe atandukanye kugira ngo yerekane ko ashoboye guhatana ku rwego rwo hejuru.

Mbere yo guhabwa amahirwe muri Tottenham Hotspur, ikipe ihangana na Arsenal mu majyaruguru ya Londres, Kane yagiye mu makipe ane atandukanye mu buryo bw’itizanyo.

Yabanje gukinira Leyton Orient yo mu cyiciro cya gatatu mu Bwongereza, akomereza muri Millwall yo mu cyiciro cya kabiri, ajya muri Norwich City yo mu cyiciro cya mbere, mbere yo gusoreza muri Leicester City yo mu cyiciro cya kabiri.

Izo ntizano zamuhaye amahirwe yo kubona iminota yo gukina no kwiga byinshi, ariko ntizaburagamo ibihe bikomeye. Yagombaga guhora agaragaza ko akwiriye amahirwe, mu gihe hari abibazaga niba afite umuvuduko, imbaraga n’ubuhanga bihagije kugira ngo azabe rutahizamu ukomeye muri Premier League.

Kane ntiyigeze yemera ko ibyo abantu bamuvugagaho bimuhagarika. Yakomeje gukora cyane, atera imbere mu buryo yitwaraga imbere y’izamu, yitoza gutsinda ibitego akoresheje amaguru yombi kandi yubaka icyizere n’ubudahangarwa bwo mu mutwe.

Ibyo byamufashije gukomeza urugendo rwe, nubwo inzira yo kugera ku rwego rwo hejuru yari yuzuyemo imbogamizi.

Yanditse amateka muri Tottenham Hotspur

Amahirwe Harry Kane yari amaze igihe ategereje yaje kuboneka muri 2009 ajya Tottenham Hotspur, ayabyaza umusaruro mu buryo budasanzwe. Ntiyagarukiye ku kwerekana ko ashoboye gukina ku rwego rwo hejuru, ahubwo yaje guhinduka umwe mu bakinnyi bakomeye mu mateka y’iyo kipe.

Kane yasoje urugendo rwe muri Tottenham ari we mukinnyi watsinze ibitego byinshi mu mateka yayo aho yayitsindiye ibitego 280.. Yabaye kandi umukinnyi watsinze ibitego byinshi mu mateka y’Ikipe y’Igihugu y’u Bwongereza, ahamya ko ubushobozi bwe butagarukiraga gusa ku marushanwa y’amakipe.

Yari amaze kugera ku rwego rwo hejuru ku giti cye, atsinda ibitego byinshi kandi ahabwa icyubahiro nk’umwe muri ba rutahizamu bahiga abandi ku Isi.

Icyakora, nubwo muri Tottenham yari amaze kwigaragaza no guhabwa icyubahiro, hari ikintu gikomeye yari atarageraho: gutwara ibikombe bikomeye byo ku rwego rw’amakipe.

Imyaka yarashize, ariko icyo cyuho cyakomeje kuvugwaho mu nkuru zamuvugaga. Bamwe bibazaga niba Kane azigera atwara ibikombe bihambaye, nubwo yari umwe mu bakinnyi beza ku giti cyabo.

Bayern Munich yamuhaye amahirwe yo guhatanira ibikombe bikomeye

Kane ntiyigeze yemera ko kuba ataragera ku ntego yo gutwara ibikombe muri Tottenham ari byo bigena uko amateka ye azandikwa.

Mu 2023, afite imyaka 30, yafashe icyemezo cyo kwerekeza mu Budage, asinyira Bayern Munich, imwe mu makipe akomeye i Burayi. Bayern Munich yamuguze miliyoni 95 z’amayero, amafaranga yamugize umukinnyi waguzwe menshi kurusha abandi mu mateka ya Bundesliga.

Kuri iyo kipe yo mu Budage, Kane yari yitezweho kongera imbaraga mu busatirizi no kuyifasha guhatanira ibikombe bikomeye, ashingiye ku bunararibonye n’ubushobozi yari amaze imyaka agaragaza mu Bwongereza.

Nubwo yari amaze igihe kinini atsinda ibitego kandi yandika amateka ku giti cye, byamusabye gutegereza kugeza afite imyaka 31 kugira ngo yegukane igikombe gikomeye cya mbere mu rugendo rwe.

Icyo gihe cyabaye intambwe ikomeye kuri Kane, kuko cyamufashije guhuza ibigwi bye ku giti cye n’ibikombe by’amakipe, ibintu abamunengaga bari bamaze igihe bamutegerejeho.

Ballon d’Or y’imyaka 33, igihembo cy’urugendo rw’imyaka hafi 25

Mu 2026, Harry Kane yageze ku nzozi z’abakinnyi benshi ku Isi, yegukana Ballon d’Or, igihembo gitangwa na France Football gihabwa umukinnyi witwaye neza kurusha abandi mu mwaka w’imikino.

Abanyamakuru baturutse mu bice bitandukanye by’Isi bagaragaje ko Kane yari akwiriye icyo gihembo, bashingiye ku ruhare yagize mu mwaka w’imikino wa 2025-2026.

Kane, wari wabanje no kwegukana igihembo cy’umukinnyi mwiza ukina nka rutahizamu, yabaye umukinnyi wa mbere wa Bayern Munich wegukanye Ballon d’Or nyuma ya Karl-Heinz Rummenigge wayitwaye mu 1980 no mu 1981. Ni na we mukinnyi w'u Bwongereza wa mbere uhawe iki gihembo kuva Michael Owen yagitwara mu 2001.

Mu mwaka w’imikino wa 2025-2026, Harry Kane yatsinze ibitego 73 mu mikino 65 yakiniye Bayern Munich n’Ikipe y’Igihugu y’u Bwongereza, afasha ikipe yo mu Budage kwegukana ibikombe bitatu birimo icya shampiyona ya Bundesliga, Igikombe cy’u Budage (DFB-Pokal) na German Super Cup.

Muri Bundesliga, uyu mukinnyi yatsinze ibitego 36 mu mikino 31, afasha Bayern Munich kwegukana igikombe cya shampiyona ku buryo bworoshye. Iyi kipe yarangije shampiyona itsinzwe umukino umwe gusa, irusha amanota 16 Borussia Dortmund yari ku mwanya wa kabiri.

Mu mikino ya UEFA Champions League, uyu rutahizamu yatsinze ibitego 14 mu mikino 13. Icyakora, Bayern Munich ya Vincent Kompany yasezerewe muri ½ cy’irangiza, itsinzwe na Paris Saint-Germain yaje kwegukana igikombe.

Harry Kane yanagaragaje ubuhanga budasanzwe mu Gikombe cy’u Budage, aho yatsinze ibitego bitatu ku mukino wa nyuma, Bayern Munich itsinda Stuttgart ibitego 3-0, yegukana igikombe.

Mu mateka y’umupira w’amaguru muri iki kinyejana, Lionel Messi ni we wenyine urusha Kane ibitego yatsinze mu mwaka umwe w’imikino. Messi yatsinze ibitego 82 mu mwaka w’imikino wa 2011-2012, mu gihe Kane yageze kuri 73.

Yafashije u Bwongereza kugera muri ½ cy’irangiza cy’Igikombe cy’Isi

Mu mpeshyi ya 2026, Harry Kane yanayoboye Ikipe y’Igihugu y’u Bwongereza mu Gikombe cy’Isi cyabereye muri Leta Zunze Ubumwe za Amerika, Canada na Mexique, ayifasha gusoreza ku mwanya wa gatatu.

Uyu mukinnyi yatsinze ibitego bitandatu muri iryo rushanwa, birimo bibiri byafashije u Bwongereza gutsinda Repubulika Iharanira Demokarasi ya Congo ibitego 2-1 mu mikino ya ⅛ cy’irangiza.

Kane kandi yatsinze igitego cy’ingenzi mu mukino u Bwongereza bwatsinzemo Mexique, kimwe mu bihugu byari byakiriye irushanwa, ibitego 3-2 muri ¼ cy’irangiza.

Uretse kuba yarafashije ikipe ye y’igihugu kugera kure mu irushanwa, umusaruro we muri Bayern Munich watumye aba umwe mu bakinnyi bavuzwe cyane mu rugendo rwo guhatanira Ballon d’Or ya 2025-2026.