Lionel Messi cyangwa Cristiano Ronaldo bashobora gutungura isi bakongera kugaruka ku isonga?
Mu mwaka wa 2026 uzarangiriramo Igikombe cy’Isi, byose birashoboka. Ariko nanone, abasesenguzi benshi bavuga ko amahirwe menshi ari ku bakinnyi bakina mu makipe akomeye afite amahirwe yo gutwara ibikombe bikomeye muri 2025/26.
Ubu, ibihembo bya Ballon d’Or bitangwa hashingiwe ku musaruro w’umukinnyi mu gihe cy’umwaka w’imikino, aho kuba ku mwaka usanzwe (kalendari).
Ikinyamakuru Give Me Sports, cyakoze urutonde rw’abakinnyi 20 bashyizwe mu majwi yo kuba bashobora kwegukana Ballon d’Or ya 2026, hashingiwe ku musaruro wabo n’amahirwe y’amakipe yabo. Cyashingiye ku mibare ya buri mukiinyi hagendewe ku bitego yatsinze, Assists, Clean sheets, Ibikombe yatwaye, Ibihe by'ingenzi yagize muri shampiyona ya 2025-26, n'imikinire ye muri rusange.
Abakinnyi 20 bahabwa amahirwe menshi yo kuzegukana Ballon d’Or 2026
1. Kylian Mbappé (Real Madrid, Ubufaransa)
Ubuhanga bwe buragenda bwiyongera uko imyaka ihita. Nyuma yo kuva muri PSG akerekeza muri Real Madrid, amaze gutsinda ibitego 14 mu mikino 10 ya 2025/26. Ni umwe mu bakinnyi benshi babona nk’uzegukana Ballon d’Or vuba. By'akarusho akaba ariwe waje ku mwanya wa mbere mu bahabwa amahirwe yo kuzegukana Ballon d'Or y'umwaka utaha.
2. Lamine Yamal (Barcelona, Espagne)
Uyu musore ukiri muto w’imyaka 17 amaze kuba icyamamare ku rwego rw’Isi. Yafashije Espagne gutwara Euro akiri muto, kandi arimo kugirira akamaro kanini Barcelona FC. Abasesenguzi bamwe bamugereranya na Messi akiri muto.
3. Harry Kane (Bayern Munich, Ubwongereza)
Umwataka wa Bayern ari mu bihe byiza, aho amaze gutsinda ibitego 18 mu mikino 10 y’uyu mwaka. Naramuka atwaye Champions League cyangwa Igikombe cy’Isi, ashobora kuba Umunyaburayi wa mbere wegukanye Ballon d’Or kuva kuri Michael Owen mu 2001.
4. Ousmane Dembélé (Paris Saint-Germain, Ubufaransa)
Nyuma yo gutwara Ballon d’Or ya 2025, Dembélé aracyari mu bakinnyi bashobora kongera kuyegukana. Arimo gufasha PSG mu rugendo rwo kongera kwigarurira Uburayi.
5. Pedri (Barcelona, Espagne)
Afatwa nk’umusimbura wa Andres Iniesta, Pedri afite ubuhanga buhebuje mu kibuga hagati. Aracyari muto kuko afite imyaka 22, ariko ni umutima wa Barcelona na Espagne.
6. Erling Haaland (Manchester City, Norvège)
Ni umukinnyi udasanzwe mu gutsinda ibitego. Nubwo Manchester City iri mu bihe bigoye, Haaland aracyari mu bakandida bakomeye kubera ubuhanga bwe n’ubutwari mu kibuga. Niwe umaze gutsinda ibitego byinshi muri shampiyona y'u Bwongereza aho afite ibitego 9.
7. Jude Bellingham (Real Madrid, Ubwongereza)
Nyuma yo gufasha Real Madrid gutwara La Liga na Champions League, Bellingham akomeje kwigaragaza nk’umukinnyi w’umwihariko. Umusaruro we ukomeye ushobora kumuzamura ku isonga.
8. Mohamed Salah (Liverpool, Misiri)
Nubwo ageze mu myaka 33, Salah aracyari mu bakinnyi batanga umusaruro ukomeye. Mu mikino 51 ya 2024/25 yagize uruhare mu bitego 56. Aramutse atwaye igikombe gikomeye, yaba afite amahirwe menshi yo gutwara Ballon d'Or.
9. Vinicius Jr (Real Madrid, Brazil)
Yabaye mu bihe bitandukanye yegereye kwegukana Ballon d’Or ariko biranga. Naramuka akomeje gufasha Real Madrid kwegukana ibikombe, ashobora kuba umwe mu bahabwa amahirwe menshi muri 2026.
10. Rodri (Manchester City, Espagne)
Yafashije Espagne gutwara Euro na Manchester City gutwara Premier League ya kane yikurikiranya. Aramutse akize neza imvune yagize, ashobora kugaruka ku rwego rwe rwo hejuru.
Abandi 10 bashobora gutungura:
11. Michael Olise (Bayern Munich, Ubufaransa)
12. Raphinha (Barcelona, Brazil)
13. Declan Rice (Arsenal, Ubwongereza)
14. Vitinha (Paris Saint-Germain, Portugal)
15. Virgil van Dijk (Liverpool, Ubuholandi)
16. Lionel Messi (Inter Miami, Argentine)
Nubwo ari mu myaka yo gusatira izo kuruhuka, Messi aracyagaragaza ubuhanga n’uburambe bushobora kumusubiza ku isonga.
17. Joao Neves (Paris Saint-Germain, Portugal)
18. Ryan Gravenberch (Liverpool, Ubuholandi)
19. Bukayo Saka (Arsenal, Ubwongereza)
20. Cristiano Ronaldo (Al-Nassr, Portugal)
Umukinnyi ufatwa nk’intwari mu mupira w’amaguru ntarakuramo akarenge. Ronaldo aracyatsinda ibitego byinshi muri Saudi Arabia, kandi mu gihe cy’Igikombe cy’Isi ashobora gutungura benshi, bityo akaba yakwegukana Ballon d'Or ya 2026.
Abahanga mu isesengura ry’umupira bavuga ko Ballon d’Or ya 2026 izaba ihanganishije urubyiruko rw’ibihangange nka Mbappé, Bellingham na Yamal, ariko n’ibyamamare by’igihe kirekire nka Messi na Ronaldo bishobora kongera kwigaragaza kubera ko ari umwaka uzaberamo igikombe cy'Isi cya 2026.
Mbappe ni we uhabwa amahirwe menshi yo kwegukana Ballon d'Or ya 2026
Messi na Cristiano bafatwa nk'abami ba Ballon d'Or bashobora kongera guhatanira iki gikombe muri 2026
Yamal yashyizwe ku mwanya wa kabiri mu bahabwa amahirwe ya Ballon d'Or ya 2026
Umukinnyi ukina muri shampiyona y'u Bwongereza uhabwa amahirwe menshi ni Haaland washyizwe ku mwanya wa 6
Dembele watwaye Ballon d'Or y'uyu mwaka yashyizwe ku mwanya wa 4 mu bahabwa amahirwe yo kwegukana iy'umwaka wa 2026