Muri aba harimo Dua Lipa na Callum Turner, Beyoncé na Jay-Z, Zendaya na Tom Holland, Sophia Bush na Ashlyn Harris, ndetse n’ibindi byamamare bakomeye.
Sophia Bush na Ashlyn Harris
Umukinnyi wa filime Sophia Bush yatangaje ko we na Ashlyn Harris bashyingiranywe mu mpeshyi ya 2025, nyuma y’imyaka itatu bari bamaze bakundana.
Mu gitabo cye gishya yise And I Will Tell You Mine: Notes from a Life in Progress, Bush yavuze ko bakoze umuhango muto kandi w’ibanga mu majyaruguru ya New York.
Muri uwo muhango bari kumwe n’abana babiri ba Harris, Sloane na Ocean. Harris yavuze ko abana bishimiye uwo munsi, ndetse Sloane akagira uruhare mu gutwara indabo zari zaratoraguwe aho umuhango wabereye.
Bush yavuze ko bahisemo kubigira ibanga kuko bageze ku rwego rw’ubuzima bashaka kugira ibintu bibareba gusa, aho kubisangiza rubanda.
Dua Lipa na Callum Turner
Amakuru y’ubukwe bwa Dua Lipa na Callum Turner yamenyekanye nyuma y’uko amafoto yabo asohotse agaragaza bombi bava mu muhango w’ubukwe.
Aba bombi bari barambikanye impeta mu 2025, ariko amakuru yari yatanzwe icyo gihe yavugaga ko bari bataratangira gutegura ubukwe ku buryo burambuye.
Ku wa 31 Gicurasi, nyuma y’umwaka, amafoto yagaragaje ko basezeraniye mu muhango muto wabereye kuri Old Marylebone Town Hall i Londres, witabiriwe n’abantu bake bari hafi yabo.
Zendaya na Tom Holland
Ubukwe bwa Zendaya na Tom Holland bwakomeje kuba amayobera, nubwo ari bamwe mu bakundwa cyane muri Hollywood.
Ku wa 1 Werurwe, Law Roach, umunyamideli akaba n’inshuti ya Zendaya umaze igihe amwambika, yatangaje ko aba bombi bamaze gushyingiranwa.
Ibi byateje urusaku ku mbuga nkoranyambaga, ariko Zendaya ntiyigeze yemeza cyangwa ngo ahakane ayo makuru.
Mu kiganiro yagiranye na The New York Times muri Mata 2026, yavuze ko yumva impamvu abantu bashishikazwa n’imibanire yabo, ariko ko afite imipaka ku byo ahitamo gusangiza rubanda ku buzima bwe bwite.
Beyoncé na Jay-Z
Beyoncé na Jay-Z bashyingiranywe muri Mata 2008, mu gihe bombi bari ku rwego rwo hejuru mu muziki. Bahisemo gukora ubukwe mu rugo rwabo, aho inzu ya Jay-Z iri muri TriBeCa i New York yahinduwe ahabera uwo muhango.
Beyoncé yigeze kubwira Oprah Winfrey ko ubukwe bwabo bwari bwihariye cyane, nubwo hanze y’aho paparazzi bari benshi.
Dave Franco na Alison Brie
Dave Franco na Alison Brie bahuriye bwa mbere i New Orleans mu 2011, nyuma baza gutangira umubano w’urukundo.
Basezeranye mu 2015, mbere yo gukora ubukwe bwabo mu muhango muto mu 2017.
Brie yavuze ko kuba barashyingiranywe byatumye yumva atuje kandi afite umudendezo kurushaho.
Kirsten Dunst na Jesse Plemons
Kirsten Dunst na Jesse Plemons bashyingiranywe mu ntangiriro za Nyakanga 2022.
Bakoreye ubukwe mu ibanga kuri GoldenEye, hoteli iherereye hafi ya Ocho Rios muri Jamaica.
Icyo gihe bari bamaze imyaka itandatu bari kumwe kandi bari bafite abana babiri.
Plemons yavuze ko nubwo bari bamaze igihe kirekire bari kumwe, ubukwe bwabaye umwanya wo kwizihiza umubano wabo mu buryo bwihariye.
John Mulaney na Olivia Munn
John Mulaney na Olivia Munn bakoze ubukwe mu ibanga muri Nyakanga 2024.
Umuhango wabereye mu rugo rw’inshuti yabo i New York, witabirwa n’abantu bake cyane.
Abari bahari barimo umuhungu wabo Malcolm Hiệp, wari ufite imyaka ibiri icyo gihe, ndetse n’uwabayoboye mu muhango, Sam Waterston.
Leighton Meester na Adam Brody
Leighton Meester na Adam Brody bamaze imyaka myinshi birinda gushyira umubano wabo mu ruhame.
Batangiye kuvugwaho gukundana mu 2013, basezerana mu mpera z’uwo mwaka, mbere yo gukora ubukwe bw’ibanga mu majyaruguru ya California.
Amakuru y’icyo gihe yavugaga ko ubukwe bwabo bwari buto kandi bwitabiriwe n’abantu bake.
Kerry Washington na Nnamdi Asomugha
Kerry Washington yashyingiranywe na Nnamdi Asomugha mu gihe yari amaze kuba icyamamare cyane kubera uruhare rwe muri filime Scandal.
Bakoze ubukwe mu rugo rw’inshuti ya Washington muri Idaho. Abari hafi yabo bavuze ko batumiye abantu bake cyane, bamwe bakaba barajyanywe aho ubukwe bwabereye n’indege nto yihariye.
Cameron Diaz na Benji Madden
Cameron Diaz na Benji Madden batangiye gukundana muri Gicurasi 2014, basezerana mu Kuboza uwo mwaka, maze bashyingiranwa muri Mutarama 2015.
Igihe benshi bari bakimenya umubano wabo, aba bombi bari bamaze kuba umugabo n’umugore. Diaz yavuze ko gushyingiranwa byamufashije kwimenya kurushaho no gukura mu buzima ari kumwe n’uwo bashakanye.
Penélope Cruz na Javier Bardem
Penélope Cruz na Javier Bardem bashyingiranywe mu 2010 mu muhango muto kandi w’ibanga.
Basezeraniye mu rugo rw’inshuti yabo ruherereye ku kirwa cya Bahamas, mu nyanja ya Karayibe.
Nubwo nyuma y’ubukwe bagiye bagaragara kenshi ku itapi itukura, aba bombi bakomeje kurinda cyane ubuzima bwabo bwite.
Téa Leoni na Tim Daly
Téa Leoni na Tim Daly bahuriye kuri televiziyo ubwo bakinaga muri serivisi Madam Secretary ya CBS mu 2014.
Nyuma y’imyaka bari bamaze mu rukundo, Daly yigeze gutangaza ko yari yarasabye Leoni ko bashyingiranwa imyaka icyenda mbere y’uko ubukwe bubaho.
Yavuze ko nyuma y’imyaka icyenda ari bwo Leoni yamusabye ko bashyingiranwa, maze bombi bakabikora.
Scarlett Johansson na Colin Jost
Scarlett Johansson na Colin Jost bashyingiranywe mu 2020 mu muhango muto wabereye mu gihe cy’icyorezo cya COVID-19.
Umuhango witabiriwe n’abagize imiryango yabo ndetse n’inshuti za hafi, hubahirizwa amabwiriza yariho yo kwirinda COVID-19.
Amakuru y’ubukwe bwabo yatangajwe na Meals on Wheels America, umuryango bombi bahisemo gufasha kugira ngo abantu bawumenye kandi bawutere inkunga.
Justin Theroux na Nicole Brydon Bloom
Justin Theroux na Nicole Brydon Bloom bashyingiranywe muri Werurwe 2025 mu bukwe bwabereye muri Mexico. Ubukwe bwabo bwabereye ku mucanga kandi bwari bwateguwe mu buryo bwihariye, mbere y’uko amakuru yabwo amenyekana.
Nyuma, aba bombi baganiriye na Vogue ku byaranze uwo munsi, Theroux avuga ko umuhango wo gusezerana wari ufite ubusobanuro bukomeye kuri bo. Muri Mata 2026, Theroux na Nicole Brydon Bloom bibarutse umwana wabo wa mbere.