Kuva mu mwaka wa 2023 Rayon Sports itojwe n'abatoza barindwi barimo Yamen Zelfan, Muhamed Wade, Umufaransa Julien Mette, Roberto Oliveira Gonçalves do Carmo 'Robertinho', Afahamia Lofti, Haruna Ferouz na Bruno Ferry uheruka gutangazwa muri uku kwezi k'Ukuboza 2025.
Nyuma yuko Gikundiro inganyije na Etincelles FC igitego 1-1 mu mukino w'umunsi wa 14 wa Rwanda Premier League 2025/26, tugiye kurebera hamwe umusaruro w'umukino wa mbere ku batoza batandatu baheruka muri Rayon Sports.
Yamen Zelfani
Ku ya 10 Nyakanga 2023 Rayon Sports yatangaje ko yasinyishije umunya-Tunisia Tamen Zelfani nk'umutoza Mukuru wayo. Zelfani yatoje umukino we w'amarushanwa tariki ya 12.08.2023 ubwo Rayon Sports yatsindaga APR FC ibitego 3-0 ku mukino wa nyuma w'igikombe kiruta ibindi mu Rwanda (FERWAFA Super Cup 2023) kuri Kigali Pele Stadium. Nubwo yitwaye neza ku mukino we wa mbere ariko nyuma y'amezi 3 gusa yaje gusezererwa nyuma yo kunganya na Marine FC ibitego 2-2 i Rubavu.
Muhamed Wade
Muhamed wari wungirije Zelfani ni we wasigaranye Rayon Sports nk'umutoza mukuru w'agatenganyo ndetse atangira imirimo ye ku ya 8 Ukwakira 2023. Nubwo yari umutoza wungirije ariko yitwaye neza ku mukino we wa mbere kuko yatsinze Etoile de l'Est ibitego 2-1 ku ya 11 Ukwakira 2023 abifashijwemo na Moussa Esenu watsinze ibyo bitego byose. Wade byamutwaye amezi 3 kugira ngo nawe ahambirizwe kuko yahise asimburwa na Julien Mette.
Julien Mette
Umwe mu batoza bavuzweho ko azi gutoza ndetse agakina n'imikinire itanga ikanazamura abakiri bato, Julien Mette yageze mu Rwanda ku wa 20 Mutarama 2024. Icyatunguye benshi ni uko Julien Mette ari we mutoza watsinze umukino we wa mbere muri aba batoza ndetse agatsindwa n'ikipe yo mu cyiciro cya kabiri.
Tariki ya 23 Mutarama 2024 ni bwo Umufaransa Julien Mette yatoje umukino we wa mbere atsindwa na Interforce FC ibitego 2-1 mu mukino wo kwishyura wa 1/8 cy'Igikombe cy'Amahoro.
Robertinho
Roberto Oliveira Gonçalves do Carmo 'Robertinho' wari ugarutse muri Gikundiro nyuma yo kuyikoreramo amateka, muri Kanama 2024 yatoje umikino we wa mbere anganya na Marin FC 0-0 kuri Kigali Pele Stadium ku mukino ufungura Shampiyona umwaka 2024/25. Robertinho ntibyamuhiriye kuko nyuma y'iminsi 263 yaje gusezererwa na Rayon Sports.
Mu gihe yamaze muri Rayon Sports, yatoje imikino 28, muri yo atsinda imikino 16, atsindwa itatu, mu gihe yanganyije icyenda. Izamu rye ryinjijwemo ibitego 18 mu gihe yinjije 42.
Afahamia Lotfi
Afamia Lotfi wari uvuye muri Mukura VS, yaje muri Gikunduro nk'umwe mu batoza beza kandi bamenyereye Shampiyona y'u Rwanda biturutse ku myaka itatu yari amaze i Huye. Lotfi yatoje umukino we wa mbere ndetse aranawutsinda tariki ya 13.09.2025 ubwo Gikundiro yatsindaga Kiyovu Sports ibitego 2-0 bya Ndikumana Asman.
Urugendo rw'uyu mutoza ntirwamuhiriye kuko nyuma yo gusezererwa na Singida Black Stars muri CAF Confederations Cup ndetse no kutitwara neza muri Shampiyona yaje guhagarikwa na Komite Nyobozi ya Rayon Sports, ikipe isigarana Haruna Ferouz wari umutoza wungirije.
Haruna Ferouz
Haruno Ferouz yabonye akazi biturutse kw'ibura ry'ibyangombwa by'uwari umutoza wungirije Azouzi Lotfi wa Afahamia. Nyuma yaho umutoza mukuru ahagaritswe, Ferouz yahawe inshingano nk'umutoza mukuru w'agatenganyo wa Rayon Sports. Ferouz yatsinze umukino we wa mbere tariki ya 18 Ukwakira 2025 ubwo Gikundiro yatsindaga Rutsiro FC ibitego 3-1 kuri Kigali Pele Stadium.
Bruno Ferry
Tariko ya 17 Ukuboza 2025, ikipe ifite abafana benshi mu Rwanda, yatangaje ko Umufaransa w'imyaka 58 Bruno Ferry ari we Mutoza Mukuru wayo ndetse imuha inshingano zo gutwara kimwe mu bikombe bikinirwa ku butaka bw'u Rwanda. Ku wa Gatandatu ushize tariki ya 27 Ukuboza Bruno Ferry yatoje umukino we wa mbere anganya na Etincelles FC igitego 1-1 kuri Kigali Pele Stadium.
Mu batoza barindwi baheruka muri Rayon Sports, Julien Mette ni we watsinzwe umukino we wa mbere. Rayon Sports irasubira mu kibuga tariki ya 04 Mutarama 2026 yakira AS Muhanga kuri Kigali Pele saa 18:30.
Umusaruro w'abatoza barindwi baheruka muri Rayon Sports ku mukino wabo wa mbere