Kuri iki Cyumweru tariki ya 25 Ukwakira 2026, muri BK Arena hebereye igitaramo cy’akataraboneka kandi cy’ingirakamaro ku bahanzi bakiririmbyemo ndetse n’abakitabiriye ku bw'ibihe byiza byo gusenga bagiranye n’Imana.
Aba bahanzi bose uko bagiye bava hirya no hino muri Afurika bakoranye indirimbo ndetse yafatiwe amajwi n’amashusho muri iki gitaramo bityo mu minsi iri imbere izi ndirimbo zikazatangira kujya hanze.
Israel Mbonyi yakoranye indirimbo na OnceMore Six wo muri Afurika y’Epfo, Ben na Chance bakorana indirimbo na Lebo Sekgobela wo muri Afurika y’Epfo, Rene na Tracy bakorana indirimbo na Joe Mettle wo muri Nigeria;
Bella Combo wo muri Tanzania akorana indirimbo na Evelyn Wanjiru wo muri Kenya, Emeka Songz wo muri Nigeria akorana indirimbo na Charles Grace wo muri Ghana ndetse n’izindi ndirimbo zakozwe.
Uretse aba baramije Imana ndetse bakayihimbaza, Pastor Juliene Kabanda yabwirije ijambo ry’Imana abitabiriye iki gitaramo “Praise Unlimited” cyabereye muri BK Arena.
Igitekerezo cya Halal Afrika cyatangijwe mu 2016 i Maryland muri Leta Zunze Ubumwe za Amerika, n’abavandimwe bo mu muryango wa Onn hamwe n’abandi Banyafurika bari bahuje icyerekezo cyo guteza imbere umuziki wa Gospel ukomoka muri Afurika.
Nyuma y’umwaka umwe, mu 2017, habaye igikorwa cya mbere cya Halal Afrika i Baltimore, Maryland, ari na ho hasohokeye album yabo ya mbere yiswe “My Best Worship.” Intsinzi y’uwo mushinga yabongereye imbaraga zo gukomeza gukorera kuri icyo cyerekezo.
Mu 2019, Halal Afrika yakomereje ibikorwa byayo muri Victoria muri Afurika y’Epfo, aho hasohokeye umushinga witwa “The Moment.” Uwo mushinga wakiriwe neza n’abakunzi b’umuziki wa Gospel mu bice bitandukanye by’Isi.
Nyuma yaho, ibikorwa bya Halal Afrika byakomeje kwaguka, byitabirwa n’abahanzi barimo Vashawn Mitchell, Tim Reddick na Rodney East. Mu 2022, bafashe amajwi y’umushinga “Through It All” i Pretoria muri Afurika y’Epfo, waje gusohoka muri Nyakanga 2023.
Emeka wo muri Nigeria na Grace wo muri Ghana bakoranye indirimbo
Rene na Tracy bakoranye indirimbo na Joe Mettle wo muri Nigeria
BK Arena yakiriye igitaramo “Praise Unlimited” cyasize abahanzi batandukanye bakoranye n’indirimbo