Mu mukino wari ukomeye ndetse witabiriwe n'abafana benshi, AS Muhanga yanganyije na Gasogi United igitego 1-1 mu mukino w'umunsi wa 18 wa Rwanda Premier League, Niyonizeye Teresphore yatsindiye AS Muhanga igitego kiza kwishyurwa mu gice cya kabiri na Ndikumana Dany ku makosa ya myugariro Gihozo Chaste na Rugwiro Kevin bahuriye ku mupira bakananirwa kuwukina.
AS Muhanga yagiye gukina iri ku mwanya wa nyuma n'amanota 12 isabwa gutsinda Gasogi United ngo izamukeho imyanya 3 kuko yari kugira 15 igaca ku makipe arimo Etincelles FC, Amagaju FC na Rutsiro FC zose zifite amanota 14.
Nyuma y'umukino Kakooza Nkuliza Charles, Perezida wa Gasogi United, yatangaje ko guhura na AS Muhanga iri kurwana no kutamanuka bingana no guhura na APR FC ishaka igikombe cya Shampiyona.
Yagize ati: "Umukino ntiwari woroshye, gukina n'ikipe ya nyuma ku rutonde bingana no guhura n'iya mbere ishaka igikombe, AS Muhanga yari yashyizemo imbaraga nyinshi kugira ngo intsinde Gasogi United ndetse ishaka no gukuraho agahigo kabi ko kudatsindira iwayo."
KNC yakomeje avuga ko kunganya na AS Muhanga byatewe no kuba Gasogi United yarahawe ikarita y'umutuku kuri Byiringiro Thierry wakoze umupira n'ukuboko, ndetse ashimangira ko akurikije uko abona AS Muhanga ari yo mukandida wihariye mu makipe abiri azamanuka mu cyiciro cya kabiri.
Kuri ubu AS Muhanga iri ku mwanya wa nyuma (18) n'amanota 13 izasubira mu kibuga yakirwa na Etincelles FC. Ni mu gihe Gasogi United iri ku mwanya wa 10 n'amanota 23 izagaruka mu kibuga yakira Mukura VS tariki ya 15 Gashyantare 2026 kuri Kigali Pele Stadium.
