Ishuri ritegura kandi rigatanga ibihembo bya GRAMMY, rizwi nka Recording Academy, ryatangaje ko hagiye kongerwamo ibyiciro bishya bitanu mu bihembo bya 69 bya GRAMMY Awards. Izi mpinduka zigamije kurushaho guha agaciro ubwoko butandukanye bw’umuziki bukomeje gukura no kwamamara ku rwego mpuzamahanga.
Mu byiciro bishya byongeweho harimo Best Traditional Pop Vocal Performance (igihembo gihabwa umuririmbyi cyangwa igihangano cya Pop gakondo cyitwaye neza), Best Latin Song (igihembo cy’indirimbo nziza ya Latin yanditswe cyane cyane mu rurimi rw’Icyesipanyoli), ndetse na Best Asian Pop Music Performance kizajya gihemberwa ibikorwa bya Asian Pop birimo K-Pop, J-Pop na C-Pop.
Hari kandi icyiciro cya Best R&B Collaboration or Duo/Group Performance, kigenewe ubufatanye bw’indirimbo za R&B hagati y’abahanzi babiri cyangwa amatsinda, ndetse na Best Traditional Folk Album kizajya gihemba album nziza ya Folk gakondo.
Uretse ibi byiciro bishya, Recording Academy yanavuguruye amwe mu mategeko agenga ibi bihembo. Harimo koroshya ibisabwa ku cyiciro cya Best New Artist, aho abahanzi bazemererwa kongera gutanga ibikorwa byabo inshuro enye aho kuba eshatu, ndetse no guhindura ibisabwa kugira ngo igihangano cyemererwe guhatanira igihembo cya Album y’Umwaka.
Umuyobozi Mukuru wa Recording Academy, Harvey Mason Jr., yavuze ko izi mpinduka zigaragaza uburyo uruganda rwa muzika rukomeje kwaguka no guhinduka, bityo hakaba hakenewe ibyiciro bihagarariye neza impano n’imiziki itandukanye iri ku Isi.
GRAMMY Awards yemeje ibyiciro bitanu bishya birimo Asian Pop na Latin Song