Steinem yapfuye ku wa Gatatu, tariki ya 2 Nzeri 2026, ari iwe mu mujyi wa New York, akikijwe n’abo yakundaga, nk’uko byatangajwe n’umuryango we ku rubuga rwe rwa Instagram.
Mu butumwa bwatangajwe, umuryango we wavuze ko imyaka hafi 100 yamaze ku Isi yayikoresheje neza kandi ko yakomeje guharanira uburinganire kugeza ku ndunduro y’ubuzima bwe.
Gloria Steinem yavukiye i Toledo muri Leta ya Ohio mu 1934. Akiri umwana, yamaze igihe kinini agenda mu bice bitandukanye bya Leta Zunze Ubumwe za Amerika ari kumwe na se, Leo, wakoraga ubucuruzi bwo kugurisha ibintu agenda mu mijyi itandukanye. Nyuma y’uko ababyeyi be batandukanye, yagarukanye na nyina Ruth mu mujyi yavukiyemo.
Steinem yamenyekanye cyane nk’umunyamakuru ubwo mu 1963 yakoze iperereza mu ibanga, yiyoberanya nk’umukozi wa Playboy Bunny kugira ngo agaragaze uburyo abagore bakoraga muri iyo club bakoreshwaga nabi.
Mu 1968, yagize uruhare mu gutangiza ikinyamakuru New York magazine, aho yandikaga ku bya politiki, umuco ndetse n’umuryango w’abagore wari ukomeje gukura muri icyo gihe.
Mu 1972, Steinem yafashije gushinga ikinyamakuru Ms. Magazine, cyaje kuba urubuga rukomeye mu gihugu hose rwatangiragamo ibiganiro n’ubukangurambaga ku burenganzira bwo gukuramo inda, umushahara ungana ku bagabo n’abagore, ihohoterwa rishingiye ku gitsina n’ibindi bibazo byarebaga abagore.
Yanafashije gushinga National Women’s Political Caucus, umuryango wari ugamije gufasha abagore benshi kwinjira muri politiki no kugira uruhare runini mu miyoborere.
Steinem kandi yabaye umwe mu bantu bakomeye bagize uruhare mu kuzana ibibazo by’uburenganzira bw’abagore ku isonga mu biganiro rusange muri Amerika.
Yitabiraga imyigaragambyo n’ibindi bikorwa byo guharanira uburenganzira bw’abagore, ashyigikira uburenganzira bwo gukuramo inda, Equal Rights Amendment ndetse n’uburinganire muri rusange.
Mu 1986, afite imyaka 52, Steinem yasuzumwe kanseri y’ibere. Yabazwe ndetse aza gutangazwa ko yakize iyo ndwara. Mu 1994, yaje gusuzumwa indwara y’imitsi yo mu maso izwi nka trigeminal neuralgia, ishobora gutera ububabare bukomeye.
Nubwo yamaze igihe kinini aharanira uburenganzira bw’abagore, Steinem yashatse bwa mbere afite imyaka 66. Mu 2000 yashakanye na David Bale, umucuruzi akaba n’umuharanira kubungabunga ibidukikije, wari se w’umukinnyi wa filime Christian Bale.
David Bale yitabye Imana mu 2003 azize lymphoma yo mu bwonko, hashize imyaka itatu gusa bashyingiranywe.
Steinem nta mwana yabyaye, ariko nyuma yo gushakana na David Bale yabaye umubyeyi w’abana bane yari asanzwe afite.
Gloria Steinem asize amateka akomeye mu rugendo rwo guharanira uburenganzira n’uburinganire bw’abagore muri Amerika, aho ibikorwa bye mu itangazamakuru no mu bikorwa by’ubuvugizi byagize uruhare mu gutuma ibibazo by’abagore bigera ku rwego rw’ibiganiro mpuzamahanga.
Gloria Steinem, umunyamakuru, umwanditsi n’umurwanashyaka wamenyekanye cyane mu guharanira uburenganzira bw’abagore no guteza imbere umuryango w’abagore, yitabye Imana afite imyaka 92