Uyu munsi duhereye muri Kenya , ku wa Gatandatu ikipe ya Gormahia FC yatsindaga Posta Rangers ibitego 4-0. Inkuru itari nziza ni uko abakinnyi 2 b'Abanyarwanda, Sibomana Patrick na Emery Bayisenge bakina muri Gormahia FC nta n'umwe wigeze abanza mu kibuga ndetse nta n'umwe waruri ku ntebe y'abasimbura.
Kuri ubu Gormahia FC ikomeje kuyobora urutonde rwa shampiyona n'amanota 50, ikazasubira mu kibuga ku wa Gatandatu ikina na Bandari muri Shampiyona.
Tukiri muri Kenya mu ikipe ya AFC Leopards ikinamo Gitego Arthur,ku munsi w'ejo ku Cyumweru yatsindaga Nzoia Sugar ibitego 2-0 muri shampiyona.
Igitego cya 2 cyatsinzwe n'uyu rutahizamu w'ikipe y'igihugu y'u Rwanda, Amavubi ku munota wa 82,kuri ubu AFC Leopards iri kumwanya wa 7 n'amanota 34 ikazasubira mu kibuga ku Cyumweru ikina na Tusker.
Muri Tanzania ku wa Gatandatu ikipe ya Namungo FC ikinamo Kagere Meddie yatsindaga Mashujaa FC igitego 1-0. Uyu mukinnyi w'Umunyarwanda yari yabanje mu kibuga gusa aza gusimbuzwa ku munota wa 80.
Namungo FC iri ku mwanya wa 10 n'amanota 20 ikazasubira mu kibuga ejo ku wa Kabiri ikina na Kagera Sugar muri shampiyona.
Muri Libya,ku wa Kane ikipe ya Al Ahly Tripoli ikinamo Manzi Thierry yatsindaga Al Ittihad ibitego 3-1 muri shampiyona. Ntabwo uyu myugariro w'Amavubi yabanje mu kibuga ariko yinjiyemo asimbuye ku munota wa 79.
Al Ahly Tripoli ikomeje kuyobora urutonde rwa shampiyona n'amanota 35 ikazasubira mu kibuga ku Cyumweru ikina na Al Bashayer.
Umukino ikipe ya Al Ta'awon SC ikinamo Haruna Niyonzima yari fitanye na Al Hilal Benghazi ku wa Gatanu wo warasubitswe bitewe n'uko iyi kipe yarifite umukino wa CAF Confederation Cup.
Muri Morocco ,ku wa Gatandatu ikipe ya AS Far Rabat yatsindaga Ittihad Tanger ibitego 2-1 muri shampiyona.
Myugariro w'ikipe y'igihugu y'u Rwanda, Amavubi, Imanishimwe Emmanuel Manguende ukina muri iyi kipe ntabwo yari yabanje mu kibuga ndetse nta n'ubwo yigeze asimbura gusa yarari ku ntebe y'abasimbura.
AS Far Rabat ikomeje kuyobora urutonde rwa shampiyona n'amanota 49, ikazasubira mu kibuga ku wa Gatatu ikina na RS Berkane muri shampiyona.
Muri Afurika y'Epfo, ku wa Gatandatu ikipe ya TS Galaxy ikinamo Ntwari Fiacre ku munsi w'ejo ku Cyumweru yatsindwaga na Cape Town Stars ibitego 2-0 muri shampiyona.
Uyu munyezamu w'umunyarwanda niwe wari wabanje mu kibuga nk'ibisanzwe. Kuri ubu TS Galaxy iri kumwanya wa 7 n'amanota 24, ikazasubira mu kibuga ku wa Gatatu ikina na Mamelodi Sundwons.
Muri Ukraine ,ku munsi w'ejo ku Cyumweru ikipe ya Kryvbas Kryvyi Rih ikinamo Bizimana Djihad yahuraga n'uruva gusenya intsindwa na Shakhtar Donetsk ibitego 5-2.
Muri uyu mukino Kapiteni w'Amavubi yari yabanje mu kibuga ndetse yarangije n'iminota yose adasimbujwe.
Ikipe ya Kryvbas Kryvyi Rih yahise itakaza umwanya wa mbere ijya ku wa Kabiri n'amanota 37, ikazasubira mu kibuga ku wa Gatandatu ikina na Obolon n'ubundi muri shampiyona.
Mu gihugu cy'u Bubiligi, ku wa Gatandatu ikipe ya Standard de Liege ikinamo Hakim Sahabo yatsindaga KAA Gent ibitego 4-2.
Ntabwo uyu mukinnyi w'Umunyarwanda yari yabanje mu kibuga ariko yinjiyemo asimbuye ku munota wa 88.
Kuri ubu Standard de Liege iri ku mwanya wa 18 n'amanota 31, ikazasubira mu kibuga ikina na Genk ku Cyumweru ikina na Genk.
Muri Macedonia,ku munsi w'ejo ikipe ya FC Shkupi ikinamo Rwatubyaye Abdul yanganyaga na Tikves 0-0 muri shampiyona.
Uyu mukinnyi w'Umunyarwanda yabanje mu kibuga ndetse arangiza n'iminota yose y'umukino. FC Shkupi ikomeje kuyobora urutonde rwa shampiyona n'amanota 43, ikaba izasubira mu kibuga ikina ns Bregalnica ku wa Gatatu muri shampiyona.
Mu Buhorandi, mu ikipe ikina shampiyona y'icyiciro cya Kabiri ya FC Groningen ,ku wa Kane yatsinzwe na Feyenoord ibitego 2-1.
Umukinnyi w'umunyarwanda ukina muri iyi kipe ya FC Groningen,Noam Merani nyuma yo kumara igihe kinini adakandagira mu kibuga,yakigarutsemo yinjiye asimbuye ku Munota wa 88.
Gitego Arthur akomeje gutsinda mu ikipe ye ya AFC Leopards
Kagere Meddie wabanje mu kibuga ku mukino Ikipe ye ya Namungo FC yatsindagamo Mashujaa igitego 1-0