Mu makipe arindwi y’abagabo yitabiriye Gisaka International Volleyball Tournament, Gisagara Volleyball Club niyo yaryegukanye itsinze REG VC amaseti 3-0. Ikipe y'akarere kateguye iri rushanwa, ku Kirehe Volleyball Club yegukanye umwanya wa gatatu nyuma yo gutsinda IPRC Ngoma VC.
Mu cyiciro cy'abagore hitabiriye amakipe 6, RRA WVC iba ariyo iryegukana itsinze APR WVC. Umwanya wa gatatu watwawe na Ruhango Volleyball Club itsinze IPRC Huye VC.
Perezida wa Federasiyo y’umukino wa Volleyball mu Rwanda, Ngarambe Raphaël, yashimiye Akarere ka Kirehe kateguye iri rushanwa no kuba karahisemo guteza imbere umukino wa Volleyball, ashimira amakipe yaryitabiriye by’umwihariko n’ayitwaye neza kurusha ayandi.
Yakomeje agira ati: “Nshimye uburyo iri rushanwa ryagenze, iyi ni intambwe ikomeye Akarere ka Kirehe kateye. Iyaba n’utundi turere n’izindi nzego zagiraga ubushake nk’ubwanyu."
Federasiyo y’umukino wa Volleyball mu Rwanda yijeje Akarere ka Kirehe inkunga yose ishoboka mu guteza imbere uyu mukino yaba mu kugaragaza no guteza imbere impano, no kongerera ubumenyi n’ubushobozi abatoza n’abakinnyi.
Mu bagabo ikipe ya Gisagara VC yegukanye ‘Gisaka Volleyball tournament’ yahawe ‘Certificate’, igikombe na Sheke y’ibihumbi 600 Frw. Ikipe ya REG VC yabaye iya kabiri yashyikirijwe sheke y’ibihumbi 500Frw, naho iya Kirehe VC yatsindiye umwanya wa gatatu yahawe sheke y’ibihumbi 400Frw.
Mu bagore ikipe ya RRA VC yabaye iya mbere yahawe ‘Certificate’, igikombe na Sheke y’ibihumbi 600 Frw y’amafaranga y’u Rwanda mu gihe ikipe ya APR VC yabaye iya kabiri yashyikirijwe sheke y’ibihumbi 500Frw, naho iya Ruhango Volleyball yatsindiye umwanya wa gatatu yahawe sheke y’ibihumbi 400Frw.
Irushanwa ‘Gisaka Volleyball Tournament’ ritegurwa n’Akarere ka Kirehe rikaba ngarukamwaka, gusa ryaherukaga kuba muri 2019 kuko imyaka 2 ishize COVID-19 yari yatumye ritaba.
Gisagara VC niyo yegukanye Gisaka International Volleyball Tournament