Muri aya masezerano, Giannis Antetokounmpo na Bobby Portis berekeje muri Miami Heat, mu gihe Tyler Herro, Kel'el Ware, Jaime Jaquez Jr. na Kasparas Jakucionis bo bazakinira Milwaukee Bucks.
Giannis yageze muri Milwaukee Bucks mu mwaka wa 2013 nyuma yo gutorwa muri NBA Draft, aza kuba umwe mu bakinnyi b'ibihe byose b'iyi kipe. Yafashije Bucks gutwara igikombe cya NBA mu 2021 anegukana inshuro ebyiri igihembo cy'umukinnyi mwiza kurusha abandi muri shampiyona NBA MVP.
Icyakora, umwaka ushize ntiwari woroshye kuri uyu Mugiriki. Nyuma yo kugira ikibazo cy'ivi ry'ibumoso, yanenze ubuyobozi bwa Bucks avuga ko butamufashije uko bikwiye ndetse bukamubuza kongera gukina mu gihe yari yiteguye.
Mu mezi ashize, izina rye ryakomeje kuvugwa mu makipe atandukanye arimo Boston Celtics, ariko amaherezo Miami Heat ni yo ibashije kumwegukana.
Perezida wa Miami Heat, Pat Riley, yavuze ko aya masezerano ari mu "masezerano akomeye kurusha ayandi ikipe yakoze mu mateka yayo", agaragaza icyizere ko Giannis azafasha iyi kipe kongera guhatanira igikombe cya NBA.
Mu kiganiro Giannis yahaye itangazamakuru muri Mata, nyuma y'uko Milwaukee Bucks inaniwe kugera muri Playoffs, yari yagize ati "Abantu benshi bumva ibyo bavuga aho kumva nyir'ubwite. Isoko nyakuri ry'amakuru ni njye." Ibi byafashwe nk'ikimenyetso cy'uko atari yishimiye Bucks.
Si Miami Heat yonyine yakoze isoko rikomeye, kuko Philadelphia 76ers na yo yatangaje ko yegukanye Jaylen Brown avuye muri Boston Celtics. Mu rwego rwo kubona uyu mukinnyi, 76ers nayo ikaba yaratanze Paul George, ndetse ihabwa n'amahitamo abiri yo mu cyiciro cya mbere cya NBA Draft "First round pick" n'andi abiri yo mu cyiciro cya kabiri (Second-round picks).
Philadelphia yanatangaje ko yasinyishije umukinnyi Anfernee Simons wari usanzwe ari 'free agent', mu rwego rwo gukomeza kubaka ikipe izahangana bikomeye mu mwaka utaha wa NBA.