Gen Mubarakh Muganga yakiriye APR FC mu kuyishimira ibikombe bitatu yegukanye

Iki gikorwa cyabaye mu jugoroba wo kuri iki Cyumweru tariki ya 31 Gicurasi 2026, cyitabiriwe kandi n’Umugaba w’Ingabo zirwanira ku butaka, Umugaba w’Inkeragutabara n’abandi bayobozi bakuru muri RDF, cyateguwe mu rwego rwo guha icyubahiro APR FC kubera umusaruro udasanzwe yagezeho mu mwaka w’imikino wa 2025/2026.

Iyi kipe yanditse amateka yegukana ibikombe bitatu bikomeye ari byo Igikombe cya Shampiyona ya BK Premier League, Igikombe cy’Amahoro ndetse n’Igikombe kiruta ibindi (Super Cup).

Gen Mubarakh yavuze ko ibi birori ari uburyo bwo gushimira ikipe ku musaruro mwiza n’ubwitange yagaragaje mu mwaka wose w’imikino. Yagize ati: “Ndabashimira mwese ku bwitange no ku gukorana umurava mwagaragaje. Ni ukubera akazi gakomeye, ubumwe n’umuhate byatumye twizihiza iyi ntsinzi uyu munsi".

Yakomeje agira ati: "Mwerekanye kwitwararika n’ubushobozi bwo guhatana budasanzwe. Aho mwahuye n’imbogamizi zitandukanye mwakomeje kugumana ubumwe mu bihe by’intsinzi no mu bihe bikomeye, mugaragaza ukwihangana, kutadohoka no gukorera hamwe nk’ikipe.”

Ibi birori byabaye umwanya mwiza ku buyobozi bwa RDF, abakinnyi, abatoza n’abafana wo kuzirikana no kwishimira ibyagezweho n’iyi kipe, no kwizihiza umwaka w’imikino uzahora wibukwa nk’umwe mu yahesheje APR FC intsinzi ikomeye  mu mateka yayo.

Gen Mubarakh Muganga yashimiye abakinnyi ba APR FC uko bitwaye mu mwaka ushize w'imikino wa 2025/2026

"Ndabashimira mwese ku bwitange no ku gukorana umurava mwagaragaje" - Gen Mubarakh Muganga ashimira abakinnyi ba APR FC