Gatsibo: Alicia na Germaine bakoresheje impano yabo mu bukangurambaga bwo kurwanya ibiyobyabwenge - AMAFOTO

Ubukangurambaga aba bahanzi bitabiriye bwabereye i Ngarama mu Karere ka Gatsibo, mu Ntara y’Iburasirazuba, ku wa Gatandatu tariki ya 29 Kanama 2026, mu gikorwa cyari gifite insanganyamatsiko igira iti “Hitamo Ubuzima – Hitamo Yesu!”.

Aba bakobwa b'i Rubavu, batanze ubutumwa binyuze mu ndirimbo zabo zirimo 'Uriyo' na 'Ibendera'. Ni urugendo bavuga ko rwari rurerure, kuko kuva batangiye umuziki ari bwo bwa mbere bari bageze kure gutya bava i Rubavu berekeza i Gatsibo.

Ubwo bageraga i Ngarama, bavuye mu modoka yari ibatwaye hari kumvikana amajwi avuga ko Alicia na Germaine bamaze kuhagera, ndetse benshi bashakaga kubakoraho mu kubaramutsa. Mbere yo kuririmba, bashishikarije abanya-Ngarama kwirinda ibiyobyabwenge n'izindi ngeso mbi. Alicia yahanitse ijwi ati "Gahunda ni Hehe n'ibiyobyabwenge".

Ku ruhimbi, aba bakobwa bari bambaye imyenda myiza yiganjemo ibara ry'umweru beretswe urukundo ubwo baririmbaga indirimbo zabo zitandukanye zirimo "Ibandera" iri mu njyana y'Amapiyano. Wabonaga abanya-Gatsibo bashaka kubyinana nabo ariko ntibirekure neza, gusa amaso yabo yagaragazaga ko bari mu bakunda cyane indirimbo z'aba bakobwa.

Mu kiganiro na InyaRwanda, Innocent Ufitimana, umubyeyi akaba na Manager wa Alicia na Germaine, yavuze ko nubwo urugendo rwari rurerure, rwababereye umwanya mwiza wo gukorera Imana no gukomeza kwegera abakunzi babo.

Ati: “Igitaramo twagiyemo i Gatsibo ni urugendo rurerure twakoze kuva twatangira umuziki wacu. Kuva i Rubavu ujya i Gatsibo ni kure cyane. Ni amahirwe twabonye yo gukorera Imana no gukomeza kwegera abakunzi bacu.”

Ufitimana Innocent yavuze ko bakiriwe neza n’abaturage bo muri Gatsibo, ndetse bagatangazwa no gusanga benshi mu bitabiriye iki gikorwa basanzwe bazi Alicia na Germaine ndetse n’indirimbo zabo.

Ati: “Abanya-Gatsibo batwakiriye neza kuko twasanze abenshi bazi Alicia na Germaine ndetse n’indirimbo zabo. Twanahakuye igitekerezo ko tugomba gushaka uburyo twegera abakunzi bacu bari kure, cyane cyane abo mu cyaro. Urugendo rwagenze neza.”

Mbere yo kujya i Ngarama, Alicia na Germaine bari batangaje ko biteguye gutanga umusanzu wabo mu bukangurambaga bwari bugamije gukangurira urubyiruko guhitamo ubuzima bwiza no kwirinda ibiyobyabwenge.

Mu butumwa bwabo bagize bati: “Icyuma, Oya. Yesu ni Cyoyisi yacu.” Bari banatumiye abakunzi babo kwifatanya na bo i Ngarama mu gusoza ubukangurambaga “Ngarama Pentecoste 26: Hitamo Ubuzima – Hitamo Yesu!”

Iki gikorwa cyo kurwanya ibiyobyabwenge cyateguwe na Baho Global Mission, ku bufatanye na ADEPR Ngarama ndetse n’andi matorero ya Gikristo yo mu Karere ka Gatsibo, mu rwego rwo gukangurira cyane cyane urubyiruko kwirinda ibiyobyabwenge n’izindi ngeso mbi zishobora kwangiza ubuzima ndetse n’ejo hazaza habo.

Alicia na Germaine bashimiye abateguye iki gikorwa kuba barabatekerejeho bakabatumira, bavuga ko byababereye amahirwe yo gukoresha impano yabo mu gukomeza ubutumwa bwo kubaka no guhindura ubuzima bw’urubyiruko.

Kuri bo, kugera i Gatsibo ntibyabaye gusa urugendo rwo gutaramira abakunzi babo, ahubwo byababereye n’umwanya wo kumenya ko bafite abakunzi benshi mu bice bitandukanye by’igihugu, bityo bakaba bagomba gukomeza gushaka uburyo bwo kubegera no kubagezaho umuziki wabo.

Alicia na Germaine batanze umusanzu wabo mu bukangurambaga bwo kurwanya ibiyobyabwenge

"Ni amahirwe twabonye yo gukorera Imana no gukomeza kwegera abakunzi bacu" Alicia na Germaine nyuma yo gutaramira i Ngarama mu gusoza ubukangurambaga bwo kurwanya ibiyobyabwenge

Alicia Ufitimana i Ngarama mu gusoza ubukangurambaga bwo kurwanya ibiyobyabwenge

Germaine Ufitimana ni uku yaserutse i Ngarama mu gusoza ubukangurambaga bwo kurwanya ibiyobyabwenge

Abanya-Gatsibo batangariye ubuhanga bwa Alicia na Germaine babataramiye mu gusoza ubukangurambaga bwo kurwanya ibiyobyabwenge

REBA INDIRIMBO NSHYA "IBANGA" YA ALICIA NA GERMAINE