Fuadi Uwihanganye yegukanye igihembo cy’uwambaye neza muri ‘Oldies Music Festival’-AMAFOTO

Ni mu bi birori byabaye mu ijoro rya tariki 27 Nyakanga 2024 byahariwe imiziki yo hambere byibuze imyaze imyaka 20 kuzamura, byacuranzemo DJ RY, DJ King Regis (Regis Isheja) batanze ibyishimo kugeza Saa Sita n'Igice za nijoro.

Buri mwaka abategura ibi birori batoranya abarimbye neza kurusha abandi bakabagenera ibihembo.

Kuri iyi nshuro Fuadi Uwihanganye wakoze ibishoboka byose ashakisha imyambaro imusanisha n’abasore bo muri za 90 na 80. Uyu mugabo yigaragaje mu kubyina indirimbo zo mu myaka yo hambere zibyinwa ku bwinshi muri ibi birori bijyanishwa n’imyambaro ya kera.

Usibye Fuadi Uwihanganye hanahembwe umugore waserukanye imyambarire ya kera iruta iy’abandi, igihembo cyegukanwe na Kabakunda Ntaruhanga. Aba bombi bahawe mudasobwa nshya igendanwa ya HP yatanzwe na Golden K Technology.

Fuadi Uwihanganye wegukanye igihembo nyamukuru iyo muganiriye akubwira ko ari mwene Butare wa Barahira, aha akaba ariho akomora izina ‘Barahira’ ajya yongera ku mazina ye asanzwe.

Uyu mugabo wakuriye mu Nyakabanda ho mu mujyi wa Kigali, yize amashuri abanza kuri Ecole primaire de Kagasunzu (Ikigo cy’abadive kiri mu Nyakabanda).

Ayisumbuye yayatangiriye muri APACE akomereza mu kigo cya College APECOM ahahoze ari mu Mutara ubu ni mu ntara y’Iburasirazuba mu karere ka Gatsibo ari naho yarangirije ayisumbuye, Kaminuza ayiga muri Mount Kenya University.

Fuadi Uwihanganye ni umunyamakuru wabigize umwuga, yatangiye akorera ikinyamakuru cyo kuri Internet aho yandikaga inkuru zijya na siporo mu kinyamakuru cyitwaga The magasinsports  yavuye yerekeza kuri Radio 10 mu mpera z’umwaka wa 2014.

Kuri Radio 10 niho yamamariye bikomeye mu nkuru z’imikino no mu kogeza imipira icyo gihe akorana na Rugimbana Theogene, umusore wamufashije byinshi ndetse ngo ari mu bantu b'ibanze ashimira ibyo yabigiyeho. Kuri ubu akorera B&B Kigali FM Radio yatangiye gukorera mu mpera ya 2020.

 

Iri serukiramuco ryabaye ku nshuro ya kane, rihuzwa n’ibihe byagaruriye umunezero Abanyarwanda mu myaka 30 ishize
Iri serukiramuco ryabaye nyuma y’uko mu 2023, rihuje ibihumbi by’abantu mu gitaramo gikomeye cyabereye kuri Canal Olympia ku i Rebero
Mu gihe cy’imyaka itatu ishize iri serukiramuco riba, ryaranzwe no guhuriza hamwe ibihumbi by’abantu, aho benshi baseruka mu myambaro yo hambere

Abitabiriye iri serukiramuco bakiriwe n'ibinyobwa bya Amstel
Kuri iyi nshuro iri serukiramuco ryabaye kuri uyu wa Gatandatu tariki  27 Nyakanga 2024, ahitwa Juru Pak ku i Rebero mu Mujyi wa Kigali 

Rukabuza Rickie wamamaye nka Dj Pius ari mu bitabiriye iri serukiramuco ryabereye kuri Juru Park  

Umunyamakuru David Bayingana ni uko yaserutse muri iri serukiramuco

Fuadi Uwihanganye ni uko yaserutse, byamugejeje ku kwegukana igihembo cy'umugabo wahize abandi