Aya
makuru yayashyize hanze nyuma y’igihe gito aba bombi bongeye guhamya urukundo
rwabo mu birori byabereye i Zanzibar, aho Moctar yongeye kwambika France Mpundu
impeta nk’ikimenyetso cy’urukundo rwabo rukomeje gukura. Ibi biri mu bigize
ikiganiro cyabo gishya kizajya gitambuka kuri Canal+ Magic.
Urukundo
rwa France Mpundu na Moctar rwatangiye kumenyekana ubwo bahuriraga mu kiganiro
cya televiziyo cyitwa “The Secret Story”, aho bakundaniye imbere y’abakunzi
b’iki kiganiro. Nyuma yaho, bakomeje kwigarurira imitima ya benshi ku mbuga
nkoranyambaga, bituma bakundwa cyane n’abafana babo.
Kubera
uburyo uru rukundo rwabo rwakomeje gukurikirwa n’abatari bake, Canal+ yemeye
kubakorera ikiganiro cyihariye cyitwa “Vie VIP”, kizajya kigaragaza ubuzima
bwabo bwa buri munsi, haba mu Rwanda no mu bindi bihugu basanzwe batembereramo.
Iki kiganiro kizaba gikubiyemo amashusho agaragaza urugendo rwabo nk’abakundana
ndetse n’uburyo bubaka urugo rwabo.
Mu
butumwa France Mpundu yashyize kuri Instagram kuri uyu wa Kabiri tariki 2
Kamena 2026, yatangaje ko we na Moctar bagiye kuba ababyeyi.
Yagize
ati: “Ntabwo twari tuzi uburyo twabibabwira, ni yo mpamvu twahisemo kubibereka.
Ntabwo ari inkuru y’urukundo gusa yatangiriye imbere yanyu, ahubwo ni inkuru
y’ubuzima, ihuza imiryango ibiri n’ibyamamare bibiri biri kubaka urugo rwabyo,
none ubu bakaba bagiye kuba batatu [Kwaguka ku muryango].”
Yakomeje
asaba abakunzi babo gukurikira inkuru y’urugendo rwabo muri iki kiganiro
gishya, ati: “Muzavumbura amateka yacu muri ‘Vie VIP’, kizatangira vuba kuri
Canal+ Afrique.”
Amafoto
yasohowe n’aba bombi agaragaza France Mpundu atwite inda nkuru, ibintu byahise
bishimangira amakuru y’uko bitegura kwibaruka umwana wabo wa mbere.
Iyi
nkuru yakiriwe neza n’abakunzi babo, benshi babifuriza ishya n’ihirwe muri uru
rugendo rushya rwo kuba ababyeyi, nyuma y’urukundo rwabo rwatangiriye imbere
y’imbaga y’abakurikiraga “The Secret Story” rukaza gukomera uko iminsi yagiye
ihita.
France Mpundu n’umukunzi we Moctar bagiye kugaragaza ubuzima bwabo binyuze kuri Canal+ Magic
KANDA HANO UBASHE KUREBA INDIRIMBO 'NZAGUTEGEREZA' YA FRANCE MPUNDU