Formula 1: Verstappen na Hamilton bayoboye urutonde rw’abahembwa agatubutse

Mu gihembwe cya 2026, umushoferi wa Red Bull Racing, Max Verstappen, ni we uza ku mwanya wa mbere mu bahembwa menshi, akurikiwe n’icyamamare Lewis Hamilton wa Ferrari.

Nk’uko byatangajwe ku rubuga rwa GiveMeSport, Verstappen azinjiza hafi miliyoni 76 z’amadolari y’Amerika muri uyu mwaka, mu gihe Hamilton ari ku mwanya wa kabiri n’amadolari miliyoni 70.5.

Umushahara wa Verstappen uza nyuma y’imyaka myinshi amaze ari mu bakinnyi bakomeye muri Formula 1, mu gihe Hamilton na we akomeje kuba umwe mu basiganwa bafite agaciro gakomeye muri uyu mukino.

Abakinnyi 10 bahembwa menshi muri Formula 1 muri 2026

1. Max Verstappen – $76m

Verstappen ni we uza ku mwanya wa mbere. Umunya-Nederland yagaragaje ubuhanga bukomeye mu myaka ishize, ndetse akomeza guhatanira ibikombe bya Shampiyona y’Abasiganwa.

2. Lewis Hamilton – $70.5m

Hamilton, ubu usiganwa yambaye umwambaro wa Ferrari, aza ku mwanya wa kabiri. Muri ayo mafaranga, hafi $70m ni umushahara w’ibanze, mu gihe ayandi ava mu bindi bihembo.

3. Charles Leclerc – $57.8479m

Umushoferi wa Ferrari, Charles Leclerc, aza ku mwanya wa gatatu. Amasezerano mashya yagiranye n’iyi kipe yamushyize mu basiganwa bahembwa amafaranga menshi cyane muri Formula 1.

4. Lando Norris – $57.5m

Lando Norris wa McLaren ari ku mwanya wa kane. Kuba yarafashije McLaren gutsinda Shampiyona y’Amakipe ndetse na we akegukana Shampiyona y’Abasiganwa byatumye ahabwa ibihembo byinshi, bituma amafaranga yinjiza agera kuri $57.5m.

5. Oscar Piastri – $37.5m

Umunya-Australia Oscar Piastri wa McLaren ari ku mwanya wa gatanu. Umushahara we w’ibanze ubarirwa kuri $10m, ariko ibihembo by’imyitwarire myiza mu marushanwa bikazamura ayo mafaranga akagera kuri $37.5m.

6. Carlos Sainz Jr – $30m

Carlos Sainz Jr wa Williams ari ku mwanya wa gatandatu, aho azinjiza miliyoni $30m. Iyi ni izamuka rikomeye ugereranyije n’amasezerano ye yari asanzweho, yari afite agaciro ka hafi $13m.

7. Fernando Alonso – $26.5m

Umunya-Espagne Fernando Alonso, umwe mu basiganwa bamaze igihe kinini muri Formula 1, azinjiza $26.5m. Umushahara we w’ibanze ni $24m, mu gihe ibindi $2.5m biva mu bihembo.

8. George Russell – $26m

George Russell wa Mercedes aza ku mwanya wa munani. Azahabwa umushahara w’ibanze wa $15m, hakiyongeraho hafi $11m y’ibihembo, bikazamura amafaranga yose azinjiza akagera kuri $26m.

9. Lance Stroll – $13.5m

Lance Stroll wa Aston Martin ari ku mwanya wa cyenda n’amadolari miliyoni $13.5m. Muri ayo mafaranga, $12m ni umushahara w’ibanze.

10. Kimi Antonelli – $12.5m

Umunya-Italy Kimi Antonelli wa Mercedes arangiza urutonde rw’abakinnyi 10 bahembwa menshi, aho azinjiza $12.5m. Umushahara we w’ibanze ni $5m, ariko ibihembo bishobora kuwongerera andi $7.5m.

Abandi basiganwa 12

Nyuma y’aba 10 ba mbere, Pierre Gasly aza ku mwanya wa 11 na $12m, Alex Albon akaza ku wa 12 na $8m, naho Nico Hülkenberg ari ku wa 13 na $7m.

Esteban Ocon aza ku wa 14 na $6m, mu gihe Isack Hadjar, Valtteri Bottas na Sergio Pérez bose bari ku mafaranga angana na $5m. Franco Colapinto na Liam Lawson buri umwe azinjiza $3m, mu gihe Oliver Bearman na Gabriel Bortoleto buri umwe azinjiza $2m.

Umusore Arvid Lindblad, uri ku mwanya wa nyuma muri uru rutonde, azinjiza hagati ya $500,000 na $1m.

Iyi mibare igaragaza itandukaniro rinini riri hagati y’abasiganwa bakomeye bamaze kwigarurira izina muri Formula 1 n’abakiri bato batangiye urugendo rwabo muri uyu mukino.

Ikindi ni uko amafaranga aba atari umushahara w’ibanze gusa, kuko ibihembo bishingiye ku musaruro w’umushoferi n’ikipe ye bishobora gutuma amafaranga yinjiza yiyongera cyane.