Inyandiko nshya zashyikirijwe Urukiko Rukuru rwa New York zigaragaza ko Mayweather yamenyesheje urukiko ko yikuye mu rubanza ku bushake aregamo Jona Rechnitz, Ayal Frist, Alexander Seligson na Frist Apex Ventures.
Urubanza rwasibwe mu byitwa “without prejudice”, bivuze ko Mayweather atabujijwe kongera gutanga ikirego gishingiye kuri ibi birego mu gihe kizaza.
Mayweather, ufite amateka yo kurangiza imikino ye yose 50 nta gutsindwa, yari yatanze ikirego muri Gicurasi 2026, ashinja abo baregwa, kumwambura amafaranga menshi yari afitanye isano n’ibikorwa bye by’ubucuruzi.
Mu birego bye harimo amafaranga yavuye mu ishoramari mu mitungo itimukanwa, imitako y’agaciro hafi miliyoni 100 z’amadolari, ndetse n’amafaranga yari afitanye isano no kugurisha indege ye bwite.
Mayweather yasabaga indishyi zingana na miliyoni 175 z’amadolari cyangwa arenzeho. Abaregwa bahakanye bikomeye ibyo Mayweather yabashinjaga kuva urubanza rwatangwa. Umunyamategeko wabo yavuze ko ibyo arega Mayweather ari ibirego bidafite ishingiro.
Nyuma gato y’itangwa ry’ikirego, amakuru yatangajwe n’umwe mu bari hafi ya Rechnitz avuga ko abaregwa bitegura gutanga igisubizo cyabo mu rukiko, ndetse ko bari bafite inyandiko bemezaga ko zashoboraga kunyomoza ibyo Mayweather yabashinjaga.
Kugeza ubu, ntiharamenyekana impamvu nyayo yatumye Mayweather ahagarika uru rubanza nyuma y’amezi make arutangiye. Nta bisobanuro birambuye yigeze atangaza ku cyemezo cye.
Floyd Mayweather yikuye mu rubanza rwa miliyoni $175 yari yasabyemo indishyi