Florentino
Perez Rodriguez yavutse mu kwezi kwa 3 ku itariki 8 mu 1947, avukira muri
Espagne. Uyu mugabo yize muri kaminuza yitwa Polytechnic Madrid ndetse ni n'umushoramari ukomeye muri Espagne.
Perez yatorewe bwa mbere kuba umuyobozi wa Real Madrid muri 2000 atsinze mu matora uwari usanzwe ayiyobora witwa Lorenzo Sanz wari waratwaye igikombe cya Champions League mu 1998.
Icyo gihe hari n’icyizere ko yanabahesha icyo muri 2000, ariko Perez
we yavugaga ko Real Madrid ifite ibibazo by’amafanga azabikemura ndetse
akanazana n’abakinnyi bakomeye barimo Luis Figo yahise akura muri Fc Barcelona bituma amutsinda mu
matora ahita aba umuyobozi mushya wa Real Madrid.
Guhera ubwo uyu mugabo yatangiye urugendo rukomeye rwinjiza abakinnyi bakomeye muri Real Madrid kuko mu 2001 yahise azana Zidane amakuye muri Juventus kuri Miliyoni 77.5 z’amayero, mu 2002 ahita azana Ronaldo, mu 2003 azana David Beckham, mu 2004 azana Michael Owen.
Guhera ubwo Real Madrid yari yinjiye mu gice cyo gutwara
ibikombe bikomeye kubera ko yahise atwara ibikombe 2 bya shampiyona ya Espagne
ndetse anatwara igikombe 1 cya Champions League mu myaka 8 gusa.
Real Madrid yo muri 2004 yari irimo abakinnyi bakomeye bazanywe na Perez
Imyaka Florentino Perez yari yaratorewe kuyobora Real Madrid yarangiye mu 2009 ariko yahise yongera ariyamamaza aba ari nawe unatorwa kubera ko niwe wenyine wari witeguye gutanga arenga Miliyoni 57 z’amayero azajya mu ikipe.
Kuva akimara gutorwa, yahise yongera kuzana abandi bakinnyi bakomeye barimo: Kaka yakuye muri Milan, Cristiano
Ronaldo yakuye muri Manchester United kuri Miliyoni 80 z’amapawundi, Valencia, Karim Benzema yakuye muri Olympique Lyonnais kuri miliyoni 30 z’amayero, Xabi Alonso yavanye muri Liverpool kuri miliyoni 30 z’amayero ndetse ahita anazana umutoza
ukomeye Jose Mourinho mu mwaka wa 2010.
Abakinnyi bazanywe na Perez muri 2010
Nyuma y’imyaka itatu Mourinho amaze gutwara igikombe cya shampiona ya Espagne afite amanota 100 ndetse anageze kimwe cya kabiri cya Champions League, yahise yirukanwa asimbuzwa Carlo Anchelotti ndetse banazana abandi bakinnyi bakomeye barimo Gareth Bale wavuye muri Tottenham bituma bahita batwara Champions League ya 10 muri 2013.
Muri
2014 Perez yahise azana abandi bakinnyi bari bigaragarije mu gikombe cy’isi
barimo James Rodriguez, Toni Kroos na Keylor Navas. Perez abonye Anchelotti
bitari kuvamo neza, yahise azana uwari waramubereye umukinnyi Zidane amugira umutoza maze atwara ibikombe 3 bya
Champions League mu myaka 3 yikurikiranya, 2016, 2017 na 2018.
Mu
mwaka ushize w’imikino Perez yatwaye igikombe cya shampiyona ndetse n’igikombe
cya Champions League.
Mu
bikombe bikomeye Perez amaze gutwarana na Real Madrid ari umuyobozi harimo 6
bya Champions League na 6 bya shampiyona ya Espagne (La Liga).
Uyu
mugabo azwiho kwizeza abakinnyi gutwara Ballon d’Or bikarangira bazitwaye. Bamwe mu bakinnyi bamaze gutwarana Ballon d’or nawe harimo: 2001-Luis Figo, 2002-Ronaldo, 2006-Fabio
Cannavaro, 2018-Luka Modric, 2022-Karim Benzema ndetse na Cristiano Ronaldo
watwaye Ballon d’Or 4 bari kumwe.
Benzema ni we Perez aheruka guhesha Ballon d'Or