Uyu mugabo uzwi ku rubuga X nka @AbdoollGiwa yavuze ko abagore bafite inzozi zo kugera kure mu mwuga wabo bashobora kungukira mu gushaka umugabo ufite abagore benshi, igitekerezo cyateje impaka nyinshi ku mbuga nkoranyambaga.
Yagize ati:"Sinzi neza uwo ubu butumwa bugenewe, ariko niba uri umukobwa ukiri muto ufite intego zo kugera ku rwego rwo hejuru mu mwuga wawe no mu buzima bwawe bwite, gushaka umugabo ufite abagore benshi ni cyo cyemezo cyiza kuri wowe."
Ibi yabivuze mu gihe ibiganiro ku ngingo y’umugabo umwe ushaka abagore benshi ikomeje kuvugwa cyane nyuma y'isohoka rya filime y'uruhererekane ya Netflix yitwa The Polygamist, yakurikiwe n'abantu benshi hirya no hino muri Afurika.
Iyi filime ivuga inkuru ya Jonasi Gomora, umunyemari ukomeye wiyubatse akaba n'Umuyobozi Mukuru w'ikigo cy'imari. Nyuma y'urupfu rwe, ibanga ry'ubuzima bwe riramenyekana, maze umugore we, nundi mugore yari yarahishe, inshoreke batangira kurwanira umutungo, ubuzima bwe bwari bwarubakiye ku mabanga menshi.
Iyi filime igaragaramo ubuhemu, amakimbirane yo mu muryango, guhatanira ububasha ndetse n'umubano ubabaje, ikerekana ingaruka z'umugabo wagerageje kubungabunga ingo nyinshi icyarimwe mu gihe yagaragaraga nk'ufite umuryango utekanye kandi ukize.
Mu bitekerezo byakurikiye iyi filime, @AbdoollGiwa yavuze ko abagore bafite intego zo kugera kure bashobora kungukira mu gushaka umugabo ufite abagore benshi. Icyakora, iki gitekerezo cyahise kigabanya abantu mo ibice bibiri.
Abanya-Nigeria benshi bagaragaje ko batacyemera, bavuga ko gucana inyuma akenshi bishyira abagore mu bibazo aho kubafungurira amahirwe yo kwiteza imbere cyangwa gutera imbere mu kazi.
Umwe mu bakoresha imbuga nkoranyambaga yagize ati:
"Iyo umugabo amaze kubona ubushobozi bw'amafaranga, ahita ashaka abagore benshi, harimo n'abo adakunda. Ese ni gute twakwemera ibintu nk'ibyo?"
Undi mugabo we yahuje ubuharike n'imiterere y'ubukungu, agira ati:
"Ubukene ni imwe mu mpamvu nyamukuru zituma abagore bemera kubaho mu buharike. Nukuraho ubukene muri sosiyete, uzabona ubuharike bugabanuka cyane. Nigeze kwifuza kugira abagore babiri, ariko nyuma yo kwisuzuma nasanze byari ubwikunde gusa."
Nubwo filime The Polygamist itatanga umwanzuro ntakuka ku mugabo umwe ushaka abagore benshi, yongeye gukangura impaka ku birebana n’ogushyigiranwa, inshingano zabashakanye, imiterere y'imiryango ndetse n'ingaruka z'imibanire irimo abantu benshi mu muryango umwe.
Impaka ziracyakomeje ku mbuga nkoranyambaga, aho Abanya-Nigeria bakomeje kutavuga rumwe ku kibazo cyo kumenya niba ubuharike bushobora koko gufasha abagore bafite intego zo kugera kure mu buzima no mu mwuga wabo.