Filime ivuga ku ngagi zo mu Birunga iherutse gushyirwa kuri Netflix yerekaniwe mu Kinigi

Muri ibyo bikorwa harimo iyerekanwa ryihariye rya filime mbarankuru ‘A Gorilla’s Story’, yakozwe ivuga ku buzima bw’ingagi zo mu Birunga, uko zibana, uko zishaka ubuyobozi ndetse n’amakimbirane ashobora kuvuka mu muryango wazo.

Iyi filime iherutse gushyirwa ku rubuga rwa Netflix, yerekanywe mu ijoro ryo ku wa Gatatu tariki 2 Nzeri 2026, mu kigo cya Ellen DeGeneres Campus of the Dian Fossey Gorilla Fund mu Kinigi, mu rwego rwo gutegura no kwizihiza ibikorwa bibanziriza umuhango wo Kwita Izina.

Iri yerekanwa ryitabiriwe n’abakozi b’Urwego rw’Igihugu rw’Iterambere, RDB, ndetse n’abagize uruhare mu bikorwa byo kurinda ingagi, hamwe n’umwe mu bazita izina abana b’ingagi muri uyu mwaka, Alastair Fothergill, umwongereza uzwi cyane mu gutunganya filime mbarankuru zivuga ku buzima bw’inyamaswa n’ibidukikije.

Filime yerekanwe mu buryo bwihariye ku Banyarwanda, aho yasobanuwe mu Kinyarwanda na Felix Ndagijimana, Umuyobozi w’Ikigo cy’Ubushakashatsi cya Karisoke cya Dian Fossey Gorilla Fund.

Ibi byatumye inkuru y’ubuzima bw’ingagi zo mu Birunga, ubusanzwe ibonwa n’abatari bake nk’inkuru y’abanyamahanga baza kuzireba, igera ku baturage mu rurimi rwabo.

Filime yerekana ingagi nk’ibiremwa bifite imibereho itangaje

‘A Gorilla’s Story’ ntabwo ari filime yerekana gusa ingagi zirya, zigenda cyangwa zikinira mu mashyamba.

Ni inkuru yinjira mu buzima bwazo bwa buri munsi, ikerekana uburyo zishyiraho imibanire, uko zubaka imiryango, uko ziyobora ndetse n’uburyo ubuyobozi bushobora kuba intandaro y’amakimbirane akomeye hagati yazo.

Filime igizwe n’inkuru z’ingagi zitandukanye zifite uruhare rukomeye mu muryango wazo.

Muri zo harimo Pablo, ingagi yamenyekanye cyane nyuma yo guhura n’umushakashatsi n’umunyamakuru w’ibijyanye n’inyamaswa David Attenborough mu 1978.

Hari kandi Gicurasi, ingagi y’ingabo imaze imyaka myinshi iyoboye umuryango ariko itangiye gusaza, ndetse na Ubwuzu, ingagi ikiri nto itangiye kugera mu gihe cyo gushaka ubuyobozi no kwagura umuryango.

Filime inagaragaza Teta, ingagi y’ingore ifite umwanya ukomeye mu muryango, Imfura, ingagi igaragaza imyitwarire idasanzwe, ndetse n’abana babiri, Ubi na Inyange.

Aba bose ni bo batuma uyu mushinga utaba inkuru y’ingagi muri rusange, ahubwo ukaba inkuru ifite abantu wagereranya n’abakinankuru bayo, buri umwe afite uruhare rwe mu kubaka cyangwa guhindura ubuzima bw’umuryango.

Inkuru itangirira ku byo Attenborough yabonye mu Birunga

‘A Gorilla’s Story’ itangirana na David Attenborough asubira mu byo yabonye ubwo yageraga mu Birunga bwa mbere. Yibuka uko yahuye na Pablo, icyo gihe wari ukiri ingagi ikiri nto mu muryango wari ugizwe ahanini n’ingagi z’ingore.

Icyamutangaje ni uko izo ngagi zitamuteye cyangwa ngo zimufate nk’umwanzi. Ahubwo zari zisa n’izimwakiriye. Pablo na we yaje kumwegera, kugeza ubwo aryamye ku kaguru ka Attenborough.

Attenborough asobanura ko kuba ingagi ikora ku yindi cyangwa ikemera gukorana n’ikindi kiremwa ari uburyo bwayo bwo kugaragaza urugwiro.

Iyo nkuru yo mu myaka ya 1970 ni yo iba intangiriro y’urugendo rwo gusobanura uko izi nyamaswa zibaho, mbere y’uko filime isimbukira mu buzima bw’ingagi zo muri iki gihe.

Pablo yubatse umuryango mugari, ariko apfa awurwanirira

Muri filime, Attenborough asobanura ko ingagi y’ingabo iyo igeze ku myaka iri hafi ya 18 itangira gushaka uko yakwihangira umuryango wayo.

Pablo na we ni ko yabigenje.

Yaje kubaka umuryango munini cyane uba umwe mu yabayeho mu mateka y’ingagi zo mu Birunga.

Ariko ubuzima bw’ubuyobozi bwe ntibwarangiye neza.

Pablo yaje gupfa afite imyaka 33, nyuma y’uko umuryango we watewe n’undi muryango w’ingagi.

Yapfuye ari kurwanira kurinda umuryango yari amaze kubaka.

Ni inkuru igaragaza ko ku ngagi, nk’uko bigaragara no ku bindi biremwa, kuyobora umuryango atari inshingano yoroshye kandi bishobora gusaba imbaraga n’ibitambo.

Ubwuzu ashaka ubuyobozi, Gicurasi agatangira gucika intege

Nyuma yo kuvuga ku mateka ya Pablo, filime isubira mu gihe cya none, ikerekana umuryango wakomotse ku gisekuru cye.

Uyu muryango usigaye uyoborwa na Gicurasi, ariko imyaka itangiye kumwongerera intege nke.

Ubwuzu, imwe mu ngagi zikiri nto muri uyu muryango, itangira kubona ko umuyobozi wayo ashaje.

Aho ni ho amakimbirane atangira.

Ubwuzu itangira kwiyenza kuri Gicurasi, ishaka ko barwana kugira ngo ibone amahirwe yo gufata ubuyobozi bw’umuryango.

Ariko urugamba rw’ubuyobozi ntirugarukira kuri Gicurasi gusa.

Ubwuzu inatangira guhangana na Imfura, ingagi yari igeze mu gihe cyo gutangira kugira ubushobozi bwo kuyobora.

Aba bombi bararwana, Ubwuzu ikomeretsa Imfura bikomeye.

Icyakurikiyeho ni cyo cyatumye iyi nkuru irushaho kuba idasanzwe.

Imfura yakoze igikorwa cyatunguye abashakashatsi

Imfura, nyuma yo gukomereka, yatangiye gukurikiranira hafi Ubwuzu.

Igihe yabonaga umwana wa Ubwuzu, yakoze igikorwa kitari gisanzwe kizwi mu mibereho y’ingagi.

Yishe uwo mwana.

Iki gikorwa cyafashwe n’amashusho, kiba kimwe mu bintu byihariye filime igaragaza, kuko cyafashije abashakashatsi kurushaho gusobanukirwa imyitwarire y’ingagi n’amakimbirane ashobora kuvuka hagati yazo.

Ni muri uru rwego ‘A Gorilla’s Story’ itanga ishusho irenze iyo abantu benshi baba bafite ku ngagi.

Zigaragazwa nk’inyamaswa zifite imiryango, imibanire, amarangamutima, amakimbirane ndetse n’imyitwarire rimwe na rimwe isa n’iy’abantu.

Kuki ingagi z’ingore zifite uruhare rukomeye mu muryango?

Filime inafasha abayireba gusobanukirwa imiterere y’imiryango y’ingagi.

Umuryango ukomeye ushobora kuba ugizwe n’ingagi z’ingore nyinshi, mu gihe ingagi z’ingabo zifite uruhare rukomeye mu kuwurinda no kuwuyobora.

Ingagi y’ingabo kandi ishobora kutabana n’izindi ngabo z’ingabo, uretse abana b’abahungu bayo bashobora kugumana na yo mu muryango.

Ibi bituma igihe ingagi y’ingabo ishaje cyangwa igatakaza imbaraga, habaho ihangana ry’abashaka kuyisimbura.

Ni ho havuka urugamba rwo gushaka ubuyobozi, rimwe na rimwe rukaba urw’imbaraga kandi rukagira ingaruka ku bagize umuryango bose.

Alastair Fothergill: Igitekerezo cyahindutse inkuru nini

Alastair Fothergill, umwe mu bayoboye ndetse bagize uruhare mu gutunganya ‘A Gorilla’s Story’, yavuze ko igitekerezo cya mbere cyari ugukora inkuru ivuga ku buzima bw’ingagi.

Mu gihe bari batangiye kuganira n’Umuryango wa Dian Fossey Gorilla Fund, wabemereye kubafasha mu gukora iyi filime, umushinga watangiye gufata indi sura.

Fothergill yaje kwegera David Attenborough, usanzwe azwiho gukora ibiganiro byinshi byerekeranye n’ubuzima bw’inyamaswa.

Attenborough yabyakiriye neza ndetse amubwira ko yari afite agatabo yagiye yandikamo ibyo yabonye ubwo yari mu Rwanda, cyane cyane ku bijyanye n’ingagi.

Ibyo Attenborough yari yarabonye mu myaka yashize byaje guhuza n’amashusho mashya yafashwe muri iki gihe, bituma haboneka inkuru ihuza amateka n’ubuzima bw’ingagi muri iki gihe.

Amashusho arenga 250 yafashwe mu myaka ibiri

‘A Gorilla’s Story’ yakozwe ku bufatanye na Silverback Films, ihuriza hamwe bamwe mu bafite amazina akomeye mu gukora filime mbarankuru.

Muri bo harimo James Reed, Alastair Fothergill, Leonardo DiCaprio, Jennifer Davisson na Phillip Watson.

Abagize uruhare mu kuyikora bakoresheje amashusho arenga 250 yafashwe mu myaka ya 2023 na 2024, bayahuza n’amashusho ya kera yafashwe na David Attenborough ubwo yari mu Rwanda.

Ibi byatumye filime ishobora guhuza ibyo abantu babonye ku ngagi mu myaka isaga 40 ishize n’uko imibereho yazo imeze muri iki gihe.

Filime yagiye hanze ku wa 17 Mata 2026, nyuma iza no kugera ku rubuga rwa Netflix, bituma inkuru y’ingagi zo mu Birunga igera ku bantu bo mu bice bitandukanye by’Isi.

Felix Ndagijimana yayishyize mu Kinyarwanda

Ikindi cyihariye kuri iri yerekanwa ryabereye mu Kinigi ni uko filime itarebwe gusa mu rurimi rw’umwimerere.

Yashyizwe mu Kinyarwanda na Felix Ndagijimana, Umuyobozi w’Ikigo cy’Ubushakashatsi cya Karisoke cya Dian Fossey Gorilla Fund.

Kuba iyi filime yarashyizwe mu Kinyarwanda bituma ubutumwa bwayo bugera ku Banyarwanda mu buryo bworoshye, cyane cyane ku baturage bo mu bice bikikije Pariki y’Igihugu y’Ibirunga.

Ni n’uburyo bwo gutuma inkuru y’ingagi itaba gusa iy’abanyamahanga baza mu Rwanda kuzireba, ahubwo ikaba n’inkuru abaturage b’u Rwanda bashobora kumva, bakayisobanukirwa kandi bakagira uruhare mu kuyibungabunga.

U Rwanda rubona ‘A Gorilla’s Story’ nk’amahirwe yo guteza imbere ubukerarugendo

Ku ruhande rw’u Rwanda, iyi filime ibonwa nk’undi mwanya wo kugaragaza urugendo rw’Igihugu mu kubungabunga ingagi no guteza imbere ubukerarugendo bushingiye ku bidukikije.

Umuyobozi ushinzwe ubukerarugendo muri RDB, Irène Murerwa, yavuze ko mu myaka isaga 20 ishize u Rwanda rwateye intambwe ikomeye mu kurinda no kongera umubare w’ingagi zo mu Birunga.

Yagaragaje ko ibyo byagezweho binyuze mu bikorwa byo kurwanya ba rushimusi, gukorana n’abaturage ndetse n’ishoramari rirambye mu kubungabunga ibidukikije.

Ni filime ishobora kongera amatsiko yo gusura u Rwanda

Kuri ubu, ingagi zo mu Birunga ni kimwe mu bintu bikurura ba mukerarugendo baza mu Rwanda.

‘A Gorilla’s Story’ yo irashobora kongera amatsiko ku bantu basanzwe bazizi mu mafoto no mu nkuru, ariko batigeze babona neza ubuzima bwazo bwa buri munsi.

Kuba filime iri kuri Netflix bituma inkuru yayo igera ku bantu benshi kurushaho, bityo n’amashusho y’imisozi y’u Rwanda, Pariki y’Igihugu y’Ibirunga n’ingagi zaho bikagira amahirwe yo kumenyekana ku rwego mpuzamahanga.

Ariko igikomeye kurushaho ni uko iyi filime yerekana ko inyamaswa wita ‘ingagi’ atari izina gusa riherekeza ubukerarugendo bw’u Rwanda.

Ni ibiremwa bifite ubuzima bwabyo, imiryango, amateka, abayobozi, abashaka ubuyobozi, amakimbirane ndetse n’uburyo bwabyo bwo kwerekana urugwiro.

Kuva kuri Pablo wamenyekanye mu myaka ya 1970, kugeza kuri Gicurasi, Ubwuzu, Imfura, Teta, Ubi na Inyange, ‘A Gorilla’s Story’ ituma umuntu areba ingagi mu buryo bushya.

Ni inkuru yerekana ko inyuma y’amafoto y’ingagi abantu babona bari mu Birunga, hari ubuzima bugoye kandi bushimishije, bumaze imyaka myinshi bukurikiranwa n’abashakashatsi n’abakora ibikorwa byo kuzirinda.

Kandi mu gihe u Rwanda rwitegura Kwita Izina abana b’ingagi ku wa 4 Nzeri 2026, iyi filime ije nk’umwe mu mirimo ikomeye yo kongera kwibutsa Isi ko inyuma y’uyu muhango hari urugendo rurerure rwo kurinda no kubungabunga imwe mu nyamaswa z’agaciro gakomeye u Rwanda rufite.

Abarimo Alastair Fothergill barebye filime 'A Stor of Gorilla' mbere y'umuhango wo Kwita Izina abana b'ingagi 22

Iyi filime yerekanwe mu gihe yashyizwe mu rurimi rw'ikinyarwanda na Felix Ndagijimana, Umuyobozi w’Ikigo cy’Ubushakashatsi cya Karisoke cya Dian Fossey Gorilla Fund