Abakinnyi bakomeye nka Tom Holland, Zendaya, Matt Damon na Millie Bobby Brown bari mu bituma uku kwezi kugaragaramo amarushanwa akomeye ku bakunda filime, haba muri sinema no ku mbuga zicuruza filime kuri muradasi.
Nk’uko tubikesha ikinyamakuru BBC, izi filime 10 zatoranyijwe zigaragaza impinduka n’udushya bikomeje gutuma Hollywood ikomeza kuba igicumbi cy’imyidagaduro ku isi.
1. Evil Dead Burn
Urukurikirane rwa Evil Dead rwa Sam Raimi rwagarutse mu 2023 binyuze muri Evil Dead Rise, rwakiriwe neza cyane. Ubu haje indi filime nshya y’uyu muryango w’iterabwoba n’urwenya yitwa Evil Dead Burn, iyobowe na Sébastien Vaniček.
Souheila Yacoub akina ari umugore ujya gusura umuryango w’umugabo we wapfuye vuba mu mpanuka y’imodoka. Icyo gihe cyo gusurwa gisanzwe gihinduka ibindi, kuko uwo muryango utangira guhinduka ibiremwa bibi byitwa “Deadites”.
Umuyobozi avuga ko n’abatarareba izindi filime za Evil Dead bashobora kuyumva neza nk’inkuru yihariye. Izasohoka tariki ya 8–10 Nyakanga ku rwego mpuzamahanga.
2. The Odyssey
Christopher Nolan uzwiho gukora filime nka The Dark Knight, Inception na Oppenheimer, agarutse na filime nini kurusha izindi zose yakoze.
Iyi ni inkuru ishingiye kuri The Odyssey ya Homer, imwe mu bitabo by’ingenzi mu mateka y’ubuvanganzo. Matt Damon akina Odysseus, umwami wa Ithaca uri mu rugendo rutoroshye rwo gusubira iwe nyuma y’intambara ya Troy.
Abakinnyi barimo Anne Hathaway, Zendaya, Tom Holland, Lupita Nyong’o n’abandi benshi bazayigaragaramo. Filime yafashwe hifashishijwe IMAX 70mm ku rwego rwo hejuru cyane ikaba izasohoka tariki 15-17 Nyakanga ku rwego mpuzamahanga.
3. Spider-Man: Brand New Day
Iyi ni filime ya kane ya Spider-Man ikinwa na Tom Holland, ariko ni n’intangiriro nshya y’inkuru nshya. Peter Parker ari mu buzima bushya aho abantu bose batakimwibuka kubera amarozi ya Doctor Strange, arimo kwiga kubaho ubuzima bwe wenyine.
Azahura n’ibibazo bikomeye birimo Hulk, Punisher, n’itsinda ry’abicanyi b’inzobere mu ntambara. Ikazasohoka tariki ya 29–31 Nyakanga ku rwego mpuzamahanga.
4. Enola Holmes 3
Enola Holmes (Millie Bobby Brown) agarutse mu kindi gice cy’iperereza n’ubutwari.
Ubu yitegura kurushinga, ariko ibintu bihinduka Sherlock Holmes (Henry Cavill) afashwe bugwate. Muri iki gice agomba kumutabara afashijwe na Watson n’umuryango we.
Filime ikomeza kugaragaza amateka n’imibereho y’Ubwongereza bwo mu bihe bya kera. Yasohotse tariki ya 1 Nyakanga kuri Netflix.
5. Minions & Monsters
Minions basubiye muri filime nshya aho bajya i Hollywood yo mu myaka ya 1920. Ubu bashaka gukora filime y’udukoko n’iterabwoba mu kigo kiri ku kirwa kirimo ibiremwa bidasanzwe.
Filime ikomeje gukoresha urwenya rudasaba ndetse n’amagambo menshi asekeje. Yasohotse tariki ya 1–3 Nyakanga.
6. Moana
Disney yagaruye Moana mu buryo bwa live-action. Dwayne Johnson agaruka nk’umukinnyi nyamukuru, ariko filime ifite impinduka nshya mu nkuru, ibiganiro n’urwenya.
Umuyobozi wayo avuga ko atari kopi y’iyari isanzwe ahubwo ifite ibintu bishya byinshi. Izasohoka tariki ya 8–10 Nyakanga.
7. Gail Daughtry and the Celebrity Sex Pass
Iyi ni filime isetsa ivuga ku gitekerezo cy’uko abantu bamwe bemerera abo bakundana ko bashobora kuryamana n’ibyamamare runaka. Gail (Zoey Deutch) ajya i Los Angeles gushaka kwihorera nyuma y’uko umukunzi we akoze ibyo.
Ifite abakinnyi benshi b’ibyamamare bakina nkabo ubwabo harimo Jon Hamm, Jennifer Aniston n’abandi. Izasohoka tariki ya 10 Nyakanga.
8. Remake
Iyi ni documentaire ivuga ku buzima bw’umwanditsi wa filime Ross McElwee n’umuhungu we Adrian witabye Imana azize ibiyobyabwenge.
Filime yerekana ubuzima bwuzuye intimba, urukundo n’inkuru y’umuryango. Ni umwe mu mishinga ye yihariye kandi ikomeye cyane. Izasohoka tariki ya 10 Nyakanga.
9. Reading Lolita in Tehran
Golshifteh Farahani akina inkuru ishingiye ku gitabo cy’ukuri cya Azar Nafisi. Iyi filime ivuga ku mwarimu wo muri Iran wigisha ibitabo mu ibanga mu gihe ubutegetsi bwari bukomeye.
Abagore bato bakoresha ibitabo nka The Great Gatsby na Pride and Prejudice kugira ngo basobanukirwe ubuzima bwabo. Izasohoka tariki ya 10 Nyakanga.
10. Her Private Hell
Nicolas Winding Refn agarutse muri filime nshya yuje ubwiru n’ubugome nyuma ya The Neon Demon. Sophie Thatcher akina ari umukinnyi wimukira mu mujyi w’ikirere cya futuristic, ariko agahura n’umwicanyi w’ubugome.
Filime ivanga ibikorwa by’umwijima, ubugome n’isi y’akataraboneka. Izasohoka tariki ya 24 Nyakanga.
Muri rusange, filime zigiye gusohoka muri Nyakanga zerekana ubwinshi bw’udushya n’ubuhanga bukomeje kwiyongera mu ruganda rwa sinema, aho inkuru zitandukanye zihuza ibitekerezo, amarangamutima n’ubuhanga mu kuyobora filime.
Ku bakunzi ba sinema, uyu ni umwanya mwiza wo kwitegura ibihe byuzuye ibyishimo, ibibazo bikomeye n’udushya twinshi tuzabageza ku nkuru zitandukanye z’Isi. Izi filime zitegerejwe zishobora no kuba intangiriro y’imyaka mishya y’igitangaza muri sinema mpuzamahanga.