Uyu muhango wabaye Kuri uyu wa Gatandatu, kuri Stade ya Kamena Stadium, mu Karere ka Huye District, ku bufatanye na FIFA binyuze muri gahunda ya FIFA Talent Development Scheme (TDS).
Ni igikorwa cyitabiriwe n’abayobozi batandukanye, abatoza b’amakipe y’abato ndetse n’abahoze ari abakinnyi b’umupira w’amaguru. Muri bo harimo Visi Perezida wa Kabiri wa FERWAFA ushinzwe iterambere rya Tekinike, Richard Mugisha, wari umushyitsi mukuru muri uwo muhango.
Mu ijambo yagejeje ku bitabiriye iki gikorwa, Mugisha yashimangiye ko FERWAFA yiyemeje gushyigikira iterambere ry’impano z’abana bato mu mupira w’amaguru.
Yagize ati:“Binyuze muri gahunda ya FIFA TDS, turimo gushyiraho uburyo bufatika bufasha abakinnyi bato gukura no kugera ku rwego rwo hejuru. Aya marushanwa ni intambwe ikomeye mu gushakisha no guteza imbere impano z’abana b’Abanyarwanda.”
Uyu muhango waranzwe kandi n’imikino itatu y’abato yerekanaga impano ziri kuzamuka.
Mu cyiciro cy’abahungu batarengeje imyaka 14 (U14 Boys), ikipe ya PSG Academy Rwanda yatsinze ES Nyamagabe ibitego 3–2 mu mukino wari ukomeye.
Mu bakobwa batarengeje imyaka 14 (U14 Girls), PSG Academy Rwanda Girls na yo yitwaye neza itsinda GS Remera Rukoma ibitego 3–1.
Umunsi wasojwe n’umukino w’abahungu batarengeje imyaka 16 (U16 Boys), aho Runda TSS yatsinze PSG Academy Rwanda ibitego 3–2 mu mukino wagaragayemo guhangana gukomeye.
Aya marushanwa yatangiye tariki ya 7 Werurwe 2026, yitabiriwe n’amakipe 54 mu byiciro bine ari byo: U14 Girls, U14 Boys, U16 Girls na U16 Boys.
Binyuze muri aya marushanwa atanga imikino ihoraho n’amahugurwa ateguye neza, iyi gahunda igamije gukomeza umupira w’amaguru uhera hasi (grassroots football) no kuvumbura impano zituruka mu bice bitandukanye by’igihugu.
FERWAFA yatangije ku mugaragaro amarushanwa yiswe Elite FIFA TDS Competitions