Perezida wa FIFA, Gianni Infantino, yandikiye amashyirahamwe 211 agize uyu muryango, ayasaba gushyigikira umushinga wo gushinga ikigo cy'ubucuruzi kizajya gicunga amarushanwa akomeye ya FIFA, harimo n'Igikombe cy'Isi.
Nk'uko bigaragara mu ibaruwa y'impapuro eshanu BBC yabonye, Infantino yatangaje ko buri shyirahamwe rizemera uyu mushinga mbere ya tariki ya 19 Nzeri 2026 rizahita ryemererwa Miliyoni 20$ zizatangira gutangwa guhera ku wa 1 Mutarama 2027. Nyuma yaho kandi rizahabwa andi Miliyoni 20 z'amadolari, yose hamwe akaba Miliyoni 40.
FIFA ivuga ko ayo mafaranga azava mu kugurisha umugabane muto ifite muri FIFA Forward Enterprise, ikigo kizashyirwaho kugira ngo gicunge ibikorwa by'ubucuruzi n'uburenganzira bw'amarushanwa ya FIFA, aho n'abashoramari bigenga bazemererwa kugura imigabane.
Amakuru avuga ko uyu mushinga ushobora kwinjiriza FIFA asaga Miliyari 10 z'Amadolari ya Amerika, nubwo bivugwa ko bamwe mu bayobozi bakuru ba FIFA, barimo bamwe mu ba Visi Perezida, batigeze bamenyeshwa uburyo ibiganiro byawo byari bigeze kure.
Mu ibaruwa ye, Infantino yavuze ko afite inshingano zo kugeza ku banyamuryango amahirwe ashobora guhindura iterambere ry'umupira w'amaguru ku Isi.
Yagize ati: "Ni inshingano zanjye nk'umuyobozi wa FIFA kubagezaho amahirwe nk'aya ashobora guhindura umukino. Ni na ko ngomba kubagezaho umushinga usobanutse, ufite imibare n'amabwiriza bifasha gufata icyemezo."