Fally Ipupa yujuje ibikombe 100, Ariel Wayz na Muyango ntibahirwa muri AFRIMMA

Ibi birori by’ibihembo bya African Muzik Magazine Awards (AFRIMMA) byabereye i Dallas muri Leta Zunze Ubumwe za Amerika ku wa 12 Nzeri 2026, bikitabirwa n’abahanzi n’abandi bantu bakomeye mu ruganda rw’imyidagaduro nyafurika.

Muri iri rushanwa, u Rwanda rwari ruhagarariwe n’umuhanzikazi Ariel Wayz ndetse na Miss Muyango, ariko bombi ntibabashije gutahana ibihembo.

Ariel Wayz yari ahataniye igihembo cy’umuhanzikazi mwiza muri Afurika y’Iburasirazuba (Best Female East Africa), mu gihe Miss Muyango yari ahataniye igikombe mu cyiciro cya “Best Influencer” ku mbuga nkoranyambaga w’umwaka.

Nubwo aba Banyarwanda bombi batabashije kwegukana ibihembo bari bahataniye, kuba barageze ku rutonde rw’abahatana mu bihembo mpuzamahanga nk’ibi ni intambwe igaragaza uko ibikorwa byabo byageze ku rwego rwagutse.

Fally Ipupa yongeye kwandika amateka

Fally Ipupa ni umwe mu bahanzi bamaze igihe kinini bahagarariye umuziki wa Afurika ku rwego mpuzamahanga, cyane cyane binyuze mu muziki we ukomatanya injyana nyinshi ndetse n’ubushobozi bwo gukorana n’abahanzi bo mu bihugu bitandukanye.

Muri AFRIMMA 2026, yegukanye ibihembo bitatu birimo igihembo cy’umuhanzi w’umwaka muri Afurika, igihembo cyo guhuza imipaka binyuze mu muziki ndetse n’igihembo cyihariye cy’Umujyi wa Dallas.

Ibi bihembo byatumye umubare w’ibikombe Fally Ipupa amaze kwegukana mu rugendo rwe rw’umuziki ugera ku 100.

Ni intambwe ikomeye ku muhanzi umaze imyaka myinshi ari umwe mu bafite ijambo rikomeye mu muziki wo ku mugabane wa Afurika no hanze yawo.

Fally kandi yagaragaye mu bikorwa by’iri serukiramuco, aho yataramiye abitabiriye ibirori byo gusoza, aririmba indirimbo ye ‘Pépélé’ yakoranye na Guy2Bezbar.

Innoss’B yatsinze Fally Ipupa n’abandi bakomeye

Nubwo Fally Ipupa ari we wabaye umwe mu bahanzi begukanye ibihembo byinshi, umuhanzi mugenzi we ukomoka muri RDC, Innoss’B, na we yitwaye neza.

Innoss’B yegukanye igihembo cy’umuhanzi ukora umuziki w’Igifaransa mwiza muri Afurika.

Iki cyiciro cyari kirimo amazina akomeye mu muziki wo muri Afurika, barimo Fally Ipupa, Ferré Gola, Awilo Longomba, Didi B, Serge Beynaud, Himra, Singuila na Magasco.

Kuba Innoss’B yarabashije kubatsinda byongeye kugaragaza uburemere bw’umuziki wa Repubulika Iharanira Demokarasi ya Congo mu bihembo bikomeye bya Afurika.

Marioo na Wendy Shay na bo batashye bishimye

Umuhanzi wo muri Tanzania, Marioo, yegukanye igihembo cy’umuhanzi w’umugabo mwiza muri Afurika y’Iburasirazuba.

Yatsinze abahanzi bakomeye barimo Diamond Platnumz, Juma Jux, Mbosso, Barnaba, Bien, Eddy Kenzo, Joshua Baraka, Lij Michael n’abandi bari bahatanye muri iki cyiciro.

Muri Afurika y’Iburengerazuba, umuhanzikazi Wendy Shay wo muri Ghana yegukanye igihembo cy’umuhanzikazi mwiza.

Ku ruhande rw’abaraperi, Phyno wo muri Nigeria yegukanye igihembo cy’umuraperi w’umugabo mwiza muri AFRIMMA 2026.

Mu banyarwenya, Real Warri Pikin, amazina ye nyakuri akaba Anita Asuoha, yegukanye igihembo cy’umunyarwenya ukora ibiganiro byo gusetsa ku rubyiniro w’umwaka.

DJ Tunez na we yegukanye igihembo cy’umudije mwiza muri Afurika.

AFRIMMA ni ibihembo bitandukanye na AFRIMA, nubwo amazina yabyo akunze kwitiranywa.

AFRIMMA, bisobanuye African Muzik Magazine Awards, ni ibihembo byabereye i Dallas muri Texas ku wa 12 Nzeri 2026, mu gihe AFRIMA, ari byo All Africa Music Awards, byabereye i Lagos muri Nigeria muri Mutarama 2026.

Muri AFRIMMA 2026 ni ho Innoss’B yegukaniye igihembo cy’umuhanzi ukora umuziki w’Igifaransa mwiza, mu gihe Fally Ipupa we yegukanye ibihembo bitatu birimo icy’umuhanzi w’umwaka.

Ariel Wayz yari ahataniye igihembo cy’umuhanzikazi mwiza, icyiciro cyari kirimo abandi bahanzi b’abagore bakomoka mu bice bitandukanye bya Afurika.

Nubwo atabashije kugitwara, Ariel Wayz ari mu bahanzi b’Abanyarwanda bakomeje kugera ku ruhando mpuzamahanga, cyane cyane binyuze mu bikorwa bye by’umuziki ndetse n’imishinga amaze igihe akoraho.

Miss Muyango na we yari ahataniye igihembo cy’umuntu ukomeye ku mbuga nkoranyambaga, ariko ntiyabashije gutsinda abo bari bahatanye.

Fally Ipupa yegukanye ibihembo bitatu muri AFRIMMA 2026, birimo icy’umuhanzi w’umwaka, ahita agera ku bikombe 100 amaze gutwara mu rugendo rwe rw’umuziki

Innoss’B yatsinze Fally Ipupa, Ferré Gola n’abandi bahanzi bakomeye, yegukana igihembo cy’umuhanzi ukora umuziki w’Igifaransa mwiza muri AFRIMMA 2026

Ariel Wayz yari ahataniye igihembo mu cyiciro cya Best Female East Africa. Bwari ubwa mbere uyu muhanzikazi yari ahataniye ibi bihembo bikomeye ku Isi

Miss Muyango ntiyabashije kwegukana igikombe mu cyiciro cya ‘Best Influencer’ muri Afrimma

Phyno yatwaye igikombe cy'umuhanzi w'umugabo "Best Male Artist" mu bihembo bya Afrimma

Tunez usanzwe ari Dj wihariye wa Wizkid, yatwaye igikombe muri Afrimma

Real Warri Pikin yegukanye igihembo cy'umunyarwenya wahize abandi mu bihembo bya 'Afrimma' byatangiwe muri Leta Zunze Ubumwe z'Amerika

Wendy Shay yatwaye igihembo cy'umuhanzikazi wo muri Afurika y'Uburengerazuba (Best Female West Africa)

Marioo yatwaye igihembo cy'umuhanzi w'umugabo mu Karere k'Afurika y'Iburasirazuba (Best Male East Africa)