Iyi ndirimbo "Sina Mashaka", yasohotse kuri uyu wa Gatandatu tariki 18 Nyakanga 2026, ni yo ibimburira iyi album nshya yise "Parapanda", ikaba inagaragaza ubutumwa nyamukuru buyigize, bwo gushimangira ukwizera no gutegereza kugaruka kwa Yesu Kristo .
Mu rugendo rwe rw'umuziki wo kuramya no guhimbaza Imana, Fabrice Nzeyimana amaze gukora album umunani ari zo: "Ico Nipfuza", "Umwizigirwa", "Ibihe", "Mu Buntu", "Overflow 15", "Overflow 19", "Transformation" na "Parapanda" (album nshya).
Izina "Parapanda" rikomoka ku ijambo ry'Igiswahili risobanura impanda (trumpet), rikaba rinumvikana muri 'bridge' y'indirimbo "Sina Mashaka", aho risobanura impanda izavuga ubwo Yesu Kristo azaba agarutse.
Fabrice Nzeyimana yabwiye inyaRwanda ko igitekerezo cy'iyi ndirimbo yakigize ubwo yari ari gutembera n'amaguru nimugoroba [Night Walk], nta studio arimo cyangwa ibikoresho by'umuziki afite, ahubwo atekereza ku rugendo rw'ukwizera kwe.
Yavuze ko icyo gihe umutima we wari wuzuye ibyishimo bitewe no kumenya ko ukwizera kwe gushingiye kuri Yesu Kristo, watsinze Satani n'imirimo ye yose. Ati: "Numvise ibyishimo byinshi cyane, ntekereza ko ukwizera kwanjye gushingiye kuri Kristo, uwatsinze urugamba, agatsinda Satani n'imirimo ye yose."
Muri ibyo byishimo havuyemo amagambo yo mu Giswahili agira ati "Sina Mashaka", bisobanura ngo "Nta gushidikanya mfite."
"Sina Mashaka" si icyifuzo, ni icyemezo cy'ukwizera
Fabrice yavuze ko ubutumwa buri muri iyi ndirimbo atari ukwifuza gusa, ahubwo ari ukwatura ukwizera kwe. Yagize ati: "Nta gushidikanya mfite ku byo nizeye no ku wo nakurikiye. Nta gushidikanya ko umunsi impanda ya nyuma izavuga, nzabona Yesu aje mu bicu."
Yasobanuye ko ijambo "Parapanda" ryumvikana muri iyi ndirimbo risobanura impanda izatangaza kugaruka kwa Yesu Kristo, ari na ryo ryahaye izina album yose.
Impamvu bahisemo kuyiririmba mu Giswahili
Nubwo HM Africa isanzwe iririmba mu Kirundi, Ikinyarwanda, Icyongereza n'Igiswahili, Fabrice yavuze ko guhitamo Igiswahili kuri iyi ndirimbo byakozwe ku bwende.
Ati: "Twahisemo Igiswahili kuko ari ururimi rwumvwa n'abantu benshi bo muri aka Karere, barimo abo mu Burundi, u Rwanda, Tanzania, Kenya na Repubulika Iharanira Demokarasi ya Congo. Twifuzaga kugeza ubutumwa ku bantu benshi kurushaho."
Amajwi n'amashusho ya Album "Parapanda" yafatiwe mu buryo bugezweho bwa "Live Recording" muri Wells Salvation Church i Kigali.
Nubwo indirimbo zari nshya, Fabrice yavuze ko abantu bari bitabiriye batangiye kuramya Imana nk'aho bazizi kuva kera. Ati: "Abantu baramaga kandi bahimbaza Imana nk'aho bari basanzwe bazi indirimbo zose."
Yanavuze ko mu myiteguro yose bakoze mbere yo kuyifatira amashusho, "Sina Mashaka" ari yo ndirimbo yakunzwe cyane n'abagize itsinda rya HM Africa.
Imyaka 21 yo gukorera Imana
Heavenly Melodies Africa yatangiriye i Bujumbura mu Burundi mu 2005, itangizwa n'urubyiruko rwari rufite intego yo kuramya Imana no kubaka ubuyobozi bw'abaramyi.
Mu myaka 21 ishize, uyu muryango umaze guhugura abarenga 600 bayobora amakorali n'amatsinda yo kuramya mu bihugu bitandukanye byo mu karere.
Fabrice avuga ko ibyo bagezeho byose babikesha ubuntu bw'Imana. Ati: "Icyo twavuga ni uko Imana yabaye iyo kwizerwa kandi ubuntu bwayo bwadukomeje muri uru rugendo. Mu by'ukuri, ibi byose ni Imana yabikoze."
Icyifuzo cye ku bazumva iyi ndirimbo
Fabrice Nzeyimana yavuze ko yifuza ko buri wese uzumva "Sina Mashaka" yakongera gukomera mu kwizera no kubona ibyiringiro bishya muri Kristo.
Yagize ati: "Ndasenga ngo ukwizera kwinjire mu mitima yabo, ibyishimo by'agakiza bibasendereze, kandi Imana ikomeze ukwizera kwabo, cyane cyane abafite gushidikanya, kugira ngo babone icyizere nyakuri muri Kristo wenyine."
Indirimbo "Sina Mashaka" yamaze kujya ku rubuga rwa YouTube rwa Heavenly Melodies Africa no ku zindi mbuga zose zicururizwaho umuziki, ikaba ari yo ibimburiye album nshya "Parapanda", izaba ikubiyemo ubutumwa bwo gukomeza abakristo no kubategurira gutegereza kugaruka kwa Yesu Kristo.
Fabrice Nzeyimana ni umuhanzi wa Gospel ukomeye mu Karere ka Africa y'Uburasirazuba
Fabrice Nzeyimana hamwe n'umugore we Maya bahuriye mu itsinda ry'umuryango Fabrice & Maya
REBA INDIRIMBO NSHYA "SINA MASHAKA" YA FABRICE NZEYIMANA NA HM AFRICA