Theophany Ministries yashinzwe na Ev. Becky Hillary ukorera umurimo w'Imana muri Uganda ndetse na Rehoboth Pray Ministries yashizwe na Pastor Shekina utuye muri Canada, bagaburiye abatishoboye ibyo bakabaye barya mu minsi 7 y'amasengesho yo kwiyiriza ubusa "7 days of healing and restoration" yabaye ku wa 23-29 Werurwe 2026 akaba akabera 'Online'.
Ev. Rebecca Uwizeye uzwi nka Becky yavuze ko bari bafite amasengesho y'iminsi 7 hanyuma bagira igitecyerezo ko "ibyo twakariye tubyegeranya hanyuma tukagaburira abandi". Yavuze ko abaturange bahawe ubufasha, babyakiriye neza, barishima, bati "mwakoze kudutekerezaho".
Muri iki gikorwa cy'urukundo cyabaye ku wa Gatatu tariki ya 01 Mata 2026, aba bakozi b'Imana bari bateguye ibiribwa by'abantu 60, ariko ntibabonetse bose, "twagaburiye abantu 41. N'ibisigaye turabibasaranganya". Ishimwe rye riri ku Mana yabashoboje ndetse n'abo basengana.
Bati: "Turashimira itsinda ryaduhagarariye riyobowe na Batete Jesca (umubitsi) kuko twembi ntabwo duhari. Turashimira umuryango mugari wa tiktok kuko ni ho duhurira tugasenga, Imana ibahe umugisha."
Ev. Becky yavuze ko impamvu yahuje imbaraga na Pastor Shekinah, ari uko basanzwe basengana bakaba n'inshuti, ati: "Ni inshuti yanjye, dusengana 'online' cyane, rero bifatanyije natwe mu gukora amasengesho, ndetse nabo batanga umusanzu muri iki gikorwa, ntabwo hitanze abantu benshi, ariko abitanze babikoranye urukundo".
Avuga ko ari byiza ko kubera abandi urumuri (Be the light), "tukabamurikira". Yahamagariye n'abandi kubera abandi umucyo, ati: "Ndashishikariza n'abandi ko bakwemera umucyo wabo ukagera ku bandi benshi."
Ev. Becky yakiriye agakiza mu 2000 ubwo yari umwana muto atwite, atangira gukorera Imana ariko atabisobanukiwe, icyo gihe akaba yari avuye mu Bayisilamu ariko mu bwana bwe yakuriye mu Baporoso. Mu 2011 ni bwo yinjiye muri United Christian Church {UCC} Gikondo ubwo yigaga mu yahoze ari SFB, maze mu 2012 atangira gukorera Imana neza.
Yamaze imyaka 7 muri UCC Gikondo kugeza mu Ugushyingo 2019, ubwo yajyaga gutura muri Uganda, aho yakomereje umurimo w’Imana, asengera muri Miracle Centre Cathedral kwa Pastor Robert Kayanja no muri Phaneroo Ministries kwa Apostle Grace Lubega.
Nyuma y'imyaka myinshi amaze mu murimo w'Imana aho yigiye ku birenge by'ababyeyi be mu buryo bw'Umwuka, Imana yamuhamagariye gutangiza umuryango w'ivugabutumwa yise Theophany Ministries ndetse avuga ko mu gihe cy'Imana azafungura Itorero.
Iyi ministeri yibanda ku kwigisha abantu Ijambo ry’Imana ry’ukuri, kubafasha gusobanukirwa ubuntu bw'Imana {Grace} no kwizera nyakuri. Ishoye imizi mu Ibyanditswe byo mu Abagalatiya 6:10 [Nuko rero tugirire bose neza uko tubonye uburyo, ariko cyane cyane ab'inzu y'abizera].
Pastor Shekinah, Umuyobozi Mukuru wa Rehoboth Pray Ministries
Ev. Becky Hillary, Umuyobozi Mukuru wa Theophany Ministries
Abahagarariye Becky na Shekinah muri iki gikorwa cy'urukundo
Bafashije abaturage batishoboye bo muri Nyamirambo mu Mujyi wa Kigali
Theophany Ministries na Rehoboth Pray Ministries bahuje amaboko bafasha abatishoboye
Ev. Becky na Pastor Shekinah bakoze iki gikorwa cy'urukundo nyuma yo gusoza amasengesho y'iminsi 7