Ibi byabereye mu gitaramo cyiswe Smirnoff Halloween Fiesta,
cyabereye kuri Servite Hostel, muri Kaminuza ya Kyambogo muri Uganda, mu ijoro
ryo ku wa Gatandatu tariki ya 31 Ukwakira 2026.
Amashusho y'ibyabaye Etania yayasangije abamukurikira kuri
Snapchat, agaragaza uburyo uyu mugabo yagerageje kumukoraho ubwo yari ari mu
kazi ke ko gususurutsa abitabiriye igitaramo.
Mu mashusho hagaragaramo uyu mugabo atabanje gusaba
uruhushya, akora ku kibuno cya Etania akoresheje ikiganza cye. Mu gihe uyu muvangamiziki
yakomezaga akazi ke, uyu mugabo yongeye kumwegera, amukoraho bwa kabiri ubwo
yari yunamye agana hasi mu buryo bwo kubyina.
Nubwo ku nshuro ya mbere Etania asa n'uwirengagije ibyo uwo
mugabo yari akoze, ku nshuro ya kabiri ntiyabashije gukomeza nk'aho nta
cyabaye.
Yahise ahagarika ibyo yarimo, ahindukira areba uwo mugabo mu
maso mu gihe kirekire, mbere yo kumutera umugeri ku rutugu. Ibi byagaragaje ko
atari yishimiye na gato kuba hari umuntu winjiriye uburenganzira bwe ku mubiri
mu gihe yari mu kazi.
Nyuma yo kumutera uyu mugeri, Etania yongeye kugaragaza ko
atari yishimiye imyitwarire y'uyu mugabo, amusaba kutazongera kumwitwara atyo.
Nyuma y'ibyo, yakomeje igitaramo yari yatumiwemo.
Mu butumwa yanyujije kuri Snapchat, Etania yavuze ko
ibyakozwe n'uyu mugabo ari agasuzuguro, anasaba ababyeyi kwita ku burere baha
abana babo b'abahungu.
Yagize ati: “Murabona ukuntu abahungu bagira agasuzuguro?!
Murerere abana banyu kuba abantu beza kurushaho.”
Ubu butumwa bwagaragaje ko Etania atafashe ibyabaye
nk'ikintu cyo gusetsa cyangwa kwirengagiza, ahubwo yabibonye nk'imyitwarire
igaragaza kutubaha umubiri w'undi muntu.
Etania yari umwe mu bavangamiziki bari batumiwe mu gitaramo
cya Smirnoff Halloween Fiesta.
Iki gitaramo cyari cyateguwe mu rwego rwo kwizihiza
Halloween, aho abitabiriye bari bateguriwe umuziki, imyidagaduro n'ibindi
bikorwa bijyanye n'uyu munsi wizihizwa mu bice bitandukanye by'Isi.
Uretse Etania, ku rutonde rw'abari bashinzwe kuvanga imiziki
harimo 007, Ri Deejay, Dreadlazer, Alisha, Wiz J na Dranix. Abari bashinzwe
kuyobora no gususurutsa abitabiriye barimo Pest MC, Saint Trevor, Ursh Trey,
Benjhi MC na Josh MC.
Etania rero yari mu bari bafite inshingano zo gutuma
abitabiriye iki gitaramo bishima, ariko ibyabaye byatumye igice kimwe cy'igitaramo
gihinduka umwanya wo guhangana n'imyitwarire idakwiye y'umwe mu bari baje
kwidagadura.
Ibyabaye kuri Etania byongeye kuzamura ikibazo kimaze igihe
kivugwa mu ruganda rw'imyidagaduro muri Uganda, aho bamwe mu bahanzi b'abagore
bagaragaza ko bahura n'abafana babakoraho mu buryo batifuzaga igihe bari ku
rubyiniro.
Mu bahanzi bagiye bahura n'ibi bibazo harimo Vinka, Winnie
Nwagi ndetse na Sheebah. Bamwe muri bo bahisemo guhita bahangana n'ababakoraho,
mu gihe abandi bagiye bagaragaza ko ari ikibazo kibabangamira mu kazi kabo.
Urugero rufatika ni urwa Vinka. Muri Gicurasi 2021, ubwo
yaririmbiraga i Juba muri Sudani y'Epfo, yateye umugeri umufana wamukozeho mu
buryo atifuzaga.
Icyo gihe amashusho y'uko byagenze yakwirakwiye ku mbuga
nkoranyambaga, bamwe bamushimira kuba yarahagazeho, abandi bagaragaza
ibitekerezo bitandukanye ku buryo yabyitwayemo.
Mu 2023, Vinka yongeye kuvuga kuri iki kibazo, asobanura ko
hari igihe ahitamo kwirengagiza abantu bagerageza kumukoraho kugira ngo
adahagarika ibyishimo by'abandi bitabiriye igitaramo kubera imyitwarire
y'umuntu umwe.
Yavuze ko nta muntu wishimira gukorwaho mu buryo budakwiye,
cyane cyane iyo abikoze atari uwo bafitanye umubano wihariye.
Undi muhanzi wagaragaje ko atazihanganira iyi myitwarire ni
Winnie Nwagi, wamamaye mu ndirimbo nka Fire Dancer.
Mu 2023, ubwo yaririmbaga mu gitaramo cyabereye i Masindi,
yahagaritse kuririmba nyuma y'uko umufana agerageje kumukoraho. Yamukubise
mikoro, amubwira ko ataje mu gitaramo kugira ngo abantu bamukoreho, ndetse
amubwira ko agomba kumwubaha.
Icyo gihe ibintu byaje kurushaho gukomera ubwo bamwe mu bari
bitabiriye igitaramo batangiraga kumutera amacupa, bituma ava ku rubyiniro
mbere y'uko arangiza ibyo yari yateguye.
Mu 2024, Nwagi yongeye gushimangira ko atazihanganira abantu
bamukoraho ku mubiri mu gihe ari ku rubyiniro. Yavuze ko abitabira ibitaramo
bakwiye kumenya ko umuhanzi aba yaje gukora akazi ke, bityo bakamwubaha aho
kumufata uko bishakiye.
Kuri Etania, igikorwa cyo gutera umugeri uyu mugabo cyabaye igisubizo cy'ako kanya ku myitwarire yari amaze kumugaragariza inshuro ebyiri
Etania Mutoni afatwa nk'umu DJ wa mbere mu bagore mu Karere ka Afrika y'Iburasirazuba