Etania Mutoni yagiriye inama abari mu nganda ndangamuco mu gikorwa cyateguwe na SEEV Africa na MTN-AMAFOTO

Ni igikorwa cyabaye kuwa Gatandatu tariki 2 Kanama 2025, kibera muri VIP Lounge y’aho Amahoro Stadium iherereye i Remera, ku butumire bwa SEEV AFRICA ku bufatanye na Intore Entertainment, KONTENT ndetse na Sosiyete y’Itumanaho ya MTN.

Iki gikorwa cyabaye mbere y’isoza ry’iserukiramuco Giants of Africa Festival mu ijoro ryo kuri uyu wa Gatandatu, aho cyahurije hamwe abahanzi, abanyabugeni, abikorera n’inzobere mu by’ubucuruzi n’iterambere baturutse mu bihugu bitandukanye byo muri Afurika y’Iburasirazuba.

Abitabiriye bahawe umwanya wo gusabana binyuze mu musangiro, mbere yo kwinjira mu kiganiro cy’ibibazo n’ibisubizo (Fire-side chat) cyayobowe na Mary Maina, Umuyobozi wa KONTENT, kikibanda ku rugendo rwa Etania Mutoni mu myidagaduro n’amasomo yakuyemo ashobora gufasha abahanzi n’abategarugori bafite inzozi mu buhanzi.

Iyi gahunda yashyizweho igamije gutanga umusanzu mu ntego za Leta y’u Rwanda zirimo kwimakaza uburinganire n’ubwuzuzanye mu rwego rw’imyidagaduro.

Yahurije hamwe urubyiruko n’abagore bo mu ngeri zitandukanye bafite inzozi zo kugira ijambo no kugira uruhare rugaragara mu ruganda rw’imyidagaduro.

Etania Mutoni, nk’umwe mu bagore bamaze kubaka izina rikomeye mu buhanzi, yabaye ishusho y’uko bishoboka ko umwana w’umukobwa yakubaka ubuzima akoresheje impano ye.

Yagize ati “Kuba hano muri Kigali bisobanuye byinshi. Nzi neza uko bigoye gutangira nta muterankunga, nta muntu ugushyigikiye. Ariko birashoboka. Banza wizere ibyo ushoboye, hanyuma ugende ugerageza kurenga ahakomeye.”

Mu gihe u Rwanda ruzwi ku isi yose kubera politiki zihamye ku bijyanye n’uburinganire, hari umubare w’abagore utarisanga mu myanya ikomeye mu buhanzi.

Ibi bigaragarira mu mbogamizi zirimo: Kutagira ubushobozi buhagije (amafaranga n’ibikoresho), kubura ababafasha kubaka inzira, kubura amahirwe yo kumenyekana ku rwego mpuzamahanga, n’imyumvire imwe n’imwe ikibogamira ku gitsina.

Paul Atwine, Umuyobozi wa SEEV AFRICA yagize ati: “Beyond the Stage ni urubuga rufasha abahanzi nyarwanda kunguka ubumenyi no guhuza n’abandi banyamwuga bo hanze. Dushaka kurema ubufatanye burambye hagati y’abahanzi n’abikorera, bitume igiceri cyinjira mu ruganda rw’imyidagaduro cyiyongera, ariko cyane cyane hakomezwe gushimangirwa uburinganire.”

Mary Maina, umwe mu bayobozi ba KONTENT, yavuze ko “Iki ni igikorwa kirenze igitaramo. Ni isoko y’impinduka. Dufite urubyiruko rufite impano nyinshi ariko rukeneye uburyo bwo kuyibyaza umusaruro. Kugira Etania hano byatanze icyizere. Hari abandi bahanzi mpuzamahanga tuzazana kugira ngo batange ubuhamya, basangire amasomo, kandi bite umurongo w’iterambere urambye.”

Ni ku nshuro ya kabiri hari habaye ikiganiro nk’iki gihuza umwe mu bantu bazwi ndetse n’abafite aho bahuriye n’ubuhanzi. Iya mbere yabaye muri Ukuboza 2024, aho yahuje abahanzi bakomeye nka Ruger na Victony.

Biteganyijwe ko ibiganiro nk’ibi bizakomeza mu Ukuboza 2025, aho hitezwe umuhanzi mpuzamahanga w’ibihembo byinshi uzaza gutaramira i Kigali no gufasha mu biganiro bigamije iterambere ry’urubyiruko.

 “Beyond the Stage: A Creative Café with Etania” yateguwe na SEEV AFRICA, ifatanyije na Intore Entertainment na KONTENT, ku bufatanye na Minisiteri ya Siporo, Rwanda Convention Bureau, MTN Rwanda, MPost Rwanda na Big Sounds AV Solutions Ltd.

SEEV AFRICA ni Sosiyete nyafurika ikora ibikorwa bifite ishingiro ku ntego z’iterambere rirambye (SDGs), ikaba izwi cyane mu Rwanda mu guhuza ibigo bitandukanye bigamije impinduka binyuze mu muco, ubuhanzi n’inkuru zivugira rubanda.

KONTENT yo ni ikigo gishyira imbere gahunda zifite ingaruka nziza ku muryango, gikora ubuvugizi, amahugurwa mu itangazamakuru n’iyobokamana, no gutegura ibiganiro bifite icyerekezo cyo kubaka ubuyobozi bufite intego.

Intore Entertainment ya Bruce Intore izwi cyane mu gutegura ibitaramo bikomeye nka Kivu Fest, ni kompanyi ikomeye mu gutegura ibitaramo no gukorana n’abahanzi ku rwego mpuzamahanga mu Rwanda.

Etania ubwo yari ageze muri VIP Lounge ya Stade Amahoro, aho yakiriwe mu cyubahiro nk’umuhanzi w’umugore wahindutse icyitegererezo ku mugabane wa Afurika

Etania atanga ubuhamya ku rugendo rwe mu buhanzi n’itangazamakuru, agaragaza uko yanyuze mu mbogamizi akagera ku nzozi ze

Mary Maina wa KONTENT ayobora ikiganiro cyimbitse cyagarutse ku ruhare rw’abagore mu iterambere ry’uruganda rw’imyidagaduro muri Afurika

Abari bitabiriye bagaragaje inyota yo kwigira ku rugendo rwa Etania, bibanda ku mikoranire, kwagura imbuga no gukuraho inzitizi zishingiye

Etania aramukanya n’abakobwa bakiri bato bakora umuziki n’ubugeni, abashishikariza kwizera impano zabo no kudacika intege

Abakobwa n’urubyiruko bari mu byicaro by’imbere, bita ku ijambo rya Etania, baruhukira ku bitekerezo bihindura imyumvire 

Paul Atwine, Umuyobozi wa SEEV AFRICA, ageza ijambo ku bitabiriye, agaragaza ko iki gikorwa ari igice cy’ingenzi mu kubaka uruganda rw’imyidagaduro rufunguye kuri bose 

Abagize itsinda ryateguye igikorwa ‘Beyond the Stage’ bafatanya gufungura ibiganiro byubaka, byibanda ku iterambere rirambye binyuze mu myidagaduro 

Etania mu ifoto y’urwibutso n’abitabiriye igikorwa, abashishikariza gukomeza guharanira guhagararira impano zabo mu rwego mpuzamahanga 

Abagize itsinda rya KONTENT, SEEV AFRICA na Intore Entertainment, bishimira uko igikorwa cyagenze, bahamya ko ari intangiriro y’impinduka nini 

Etania ashimangira ko impano idasaba gusa ijwi ryiza ahubwo n’umutima ushishikajwe no kwigisha abandi 

Ifoto rusange y’abitabiriye ‘Beyond the Stage’, barimo abanyamakuru, abahanzi, abategura ibirori n’abafatanyabikorwa batandukanye baturutse muri Afurika y’Iburasirazuba 

Abaraperi Kenny K-Shot na Bruce the 1St ni bamwe mu bitabiriye ikiganiro cyatanzwe na Etania

Etania yavuze ko imyaka yamaze akora kuri Televiziyo yamubere y'ibicantege, no gukomera mu rugendo rwe rwo kuvanga imiziki