Mbere y’Impinduramatwara y’Abaporotesitanti, itorero ryari ryarashyizeho kalendari yuzuye iminsi mikuru, Noheli ikaba yari muri yo. Abavugurura itorero, cyane cyane muri Ecosse, barabyanze kuko babonaga ko hari imigenzo yashyizweho itari ishingiye ku Byanditswe, rimwe na rimwe ikananyuranya.
Ibyo byatumye iminsi myinshi yihariye ikurwaho, harimo na Noheli. No mu kinyejana cya 17, igihe intumwa zo muri Ecosse zoherezwaga mu nama ya Westminster, batangajwe no kubona abantu badakora ku munsi wa Noheli. No mu gihe nari nkiri umwana muri Ecosse, Noheli yari ikiruhuko cy’igice cy’umunsi gusa.
Mfite inshuti z’Abakristo zigifata uwo muco, zivuga ko kubera ko Bibiliya itategeka kwizihiza Noheli, itorero na ryo ritagombye kuyizihiza. Ikibabaje ni uko rimwe na rimwe ibi bivugwa mu buryo burimo ubukana n’ubwibone, bigatuma abizihiza ivuka rya Kristo bumva bafite icyaha.
Nyamara hari impamvu zitandukanye zituma nemera ko kwizihiza Noheli ari ikintu cyemewe, gikwiye kandi gifitiye abantu akamaro.
Icya mbere, Bibiliya ntitubwira ko abapasiteri cyangwa abakuru b’itorero bagomba gushyiraho ko mu kwezi runaka hazigishwa ku kwezwa, cyangwa ko icyumweru cya nyuma cy’ukwezi kizaba “icyumweru cy’ubumisiyoneri,” cyangwa ko hazaba icyumweru cyo kwizihiza isabukuru y’itorero.
Ibyo byemezo bifatwa hagamijwe imibereho myiza y’umwuka w’abizera. Niba dufite ubwo bwisanzure, kuki tutagira n’igihe cyihariye mu mwaka twibandaho ku ivuka rya Yesu Kristo—tukaryiga, tukaryizihiza, kandi tukarishyira mu buzima bwacu?
Ntiduhamya ko iyo minsi iba ifite agaciro kadasanzwe kurusha indi, cyangwa ko twagombye gushyira igitutu ku mitimanama y’abantu. Ariko, bigaragara ko amatorero atibanda ku kwizihiza ivuka rya Kristo muri ubu buryo akenshi atabona umwanya uhagije wo kwigisha ku ivuka rye, ku kuvuka kwe no ku bihe bya mbere by’ubuzima bwe, nyamara ibi byose ari iby’ingenzi cyane mu rukundo no mu kwizera kwa gikristo.
Hari n’abandi bavuga ko Noheli ari umunsi waturutse ku migenzo ya gipagani, cyane cyane ku munsi w’Abaroma witwaga Saturnalia. Ariko kuvuga ibyo ni nko kuvuga ko icyumweru cyo kwizihiza Ivugurura ry’itorero (Reformation Sunday) ari ubupagani kuko gihura n’umunsi wa Halloween. Mu by’ukuri, hari amatorero yashyizeho uwo munsi kugira ngo yitandukanye n’imigenzo mibi yarangaga Halloween.No kuri Noheli ni uko byagenze: yashyizweho mu gihe cy’iminsi mikuru y’Abaroma kugira ngo bereke isi ya gipagani inkuru nziza irenze izo bari bamenyereye—kugira ngo bayobore abantu bave ku kuramya ibiremwa bajye ku kuramya Umuremyi.
Byari ubuhamya bukomeye ku Mwana w’Imana wigize umuntu, Yesu Kristo. Kandi ubwo buhamya bwabaye ubuhamya bukomeye cyane ku buryo hari igihe itorero ryateranye kuri Noheli rigabwaho igitero n’abarwanyaga Kristo. Ni yo mpamvu kuvuga ko Noheli ari umunsi wa gipagani ari ukwibeshya cyane.
Ni byo koko, umunsi wa Noheli nturusha indi minsi kuba uwera, kandi ifunguro rya Noheli ntiriruta iryo twariye ejo. Ariko nk’ibyo byose, bishobora kwezwa mu buryo bwihariye binyuze mu Ijambo ry’Imana, mu masengesho no mu guhimbaza, kuko Yesu Kristo yaje mu isi kuducungura. Kumenya ibi ni byo bidufasha kwishimira Noheli by’ukuri.
Iyi nkuru yabanje gutangazwa bwa mbere n'ikinyamakuru Tabletalk cya Ligonier Ministries. Yanditswe na Dr. Sinclair B. Ferguson, umwe mu barimu ba Ligonier Ministries, akaba n’Umwarimu Mukuru wa Tewolojiya muri Reformed Theological Seminary - yanditse ibitabo byinshi birimo The Whole Christ n’ibindi byigisha ku buzima bwa Kristo n’itorero.