Imikino yo ku munsi wa 22 muri shampiyona y'u Bwongereza uyu munsi yakomeje gukinirwa ku bibuga bitandukanye.
Saa kumi n'imwe, Manchester United yakiriye Crystal Palace, umukino warangiye Manchester United ibonye amanota 3.
Manchester United yatangiye ibona penariti ku munota wa 4 gusa, ni ku mupira Rashford yazamuye maze Hughes awukozaho intoki.
Iyi penariti yateretswe mu izamu na Bruno Fernandes maze Manchester United iba ibonye igitego cya 1 gutyo.
Manchester United yakomeje kurusha Crystal Palace ku buryo bugaragarira buri umwe.
Abakinnyi nka Rashford na Bruno Fernandes baranzwe no gushaka igitego cya 2 ariko bagera imbere y'izamu bikanga.
Ku monata wa 32 Antony yashatse gutsinda igitego arekura ishoti ariko Raphael Varane akikuriramo.
Crystal Palace yacungiraga ku kwirukankana imipira ku munota wa 42 Jeffrey Schulupp yagerageje gutungura umuzamu ku mupira yari ahawe na Olise ariko De Gea awukuramo nta nkomyi.
Igice cya mbere cyarangiye Manchester United iyoboye n'igitego 1.
Rashford na Bruno Fernandes bishimira igitego
Igice cya kabiri cyatangiye ibintu byahindutse Crystal Palace ishaka igitego cyo kwishyura ikanabona koroneri ariko ntizibyaze igitego.
Ku munota wa 55 Rashford waranzwe no kwikunda cyane, yarase uburyo bw'igitego yamurura umupira unyura hejuru y'izamu kure.
Manchester United yabonye igitego cya 2 gitsinzwe na Rashford ku mupira mwiza yari ahawe na Luke shaw ku kazi gakomeye kari gakozwe na Garnacho winjiye mu kibuga asimbuye.
Ku munota wa 69 mu kibuga habereye imirwano bituma abakinnyi bamwe babigenderamo bahabwa amakarita y'umuhondo ndetse na Casemiro ahabwa ikarita itukura bitewe n'uko yari anize Hughes.
Nyuma y'uko Manchester United itangiye gukina ituzuye, yarwanye n'ubuzima cyane. Crystal Palace yabonye igitego cya 1 ku munota wa 76 gitsinzwe na Jeffrey Schulupp. Umukino warangiye Manchester United ibonye amanota 3 itsinze ibitego 2-1.
Ubwo Casemiro yanigaga umukinnyi wa Crystal Palace
Undi mukino nawo ukomeye wakinwaga kuri iyi saha ni uwari wahuje Liverpool na Wolverhampton Wanderers. Ikipe ya Wolverhampton Wanderers yari iri mu rugo yatangiye ihabya Liverpool itorohewe n'ibihe.
Nyuma yo gutsindwa igitego yahuzaguritse cyane bituma ku munota wa 12 bakubitwa ikindi gitego cya 2 gitsinzwe na Craig Dawson. Igice cya mbere cyarangiye Liverpool yabuze igitego na 1 cyo kwishyura.
Igice cya kabiri cyakomeje kubera kibi Liverpool kuko aho kwishyura ahubwo yakubiswe ikindi gitego cya 3 gitsinzwe na Ruben Neves ku mupira yari ahawe na Adam Traore, hari ku munota wa 71. Umukino warangiye Liverpool itsinzwe ibitego 3-0 ibintu bikomeza kuba bibi.
Manchester United ni iya 3 n'amanota 42 naho Crystal Palace ni iya 12 n'amanota 24.
Liverpool yo iri ku mwanya wa 10 n'amanota 29 naho Wolverhampton Wanderers yo iri ku mwanya wa 15 n'amanota 20.
