Musk, washinze akaba n’Umuyobozi Mukuru wa Tesla na SpaceX, yongeye kugera kuri uru rwego nyuma y’izamuka ry’agaciro k’imigabane ya SpaceX. Ku wa Mbere, imigabane ya SpaceX yari igeze kuri $171.09, nyuma yo kuzamukaho hafi 8% uwo munsi. Nk’uko Forbes ibitangaza, iri zamuka ryatumye umutungo wa Musk ugera kuri hafi $1.046 tiriyari.
Musk yari yarageze bwa mbere ku mutungo wa tiriyari imwe y’amadolari muri uyu mwaka, nyuma y’uko SpaceX itangije igurishwa ry’imigabane ku mugaragaro (IPO) muri Kamena. Icyo gihe, umutungo we wageze ku rwego rwo hejuru rwa $1.32 tiriyari, nk’uko Bloomberg Billionaires Index yabitangaje.
Nyuma y’izamuka rikomeye ry’agaciro ka SpaceX nyuma ya IPO, igiciro cy’imigabane cyaje kugabanuka, bituma n’umutungo wa Musk ugabanuka. Ubu ariko SpaceX yongeye kubona izamuka ry’agaciro, rituma Musk asubira ku rwego rwa mbere mu mateka y’abaherwe.
SpaceX na Tesla ni zo nkingi y’ubukungu bwa Musk
Igice kinini cy’umutungo wa Musk gishingiye ku migabane afite muri SpaceX na Tesla, bityo agaciro k’imitungo ye kagenda gahinduka bitewe n’imikorere y’ayo masosiyete.
SpaceX ubu ifite agaciro k’isoko ka hafi $2 tiriyari, kandi ikomeje kwagura ibikorwa byayo birimo Starlink n’indege za Starship. Mu mpera za Nzeri, SpaceX yageze ku ntambwe ikomeye ubwo Starship yageraga bwa mbere mu kirere ikazenguruka Isi, inohereza satellites 26 za Starlink, nubwo urugendo rwarangiye mbere y’igihe cyari giteganyijwe kubera ikibazo cya moteri.
Starlink na yo ikomeje kuba igice gikomeye mu bucuruzi bwa SpaceX. Reuters yatangaje ko serivisi za Starlink zari zimaze kugira abakoresha benshi ku isi kandi ko ari ryo shami ryunguka cyane muri SpaceX.
Ku ruhande rwa Tesla, isoko na ryo ryakomeje kwibanda ku migambi ya Musk ijyanye n’ubwenge buhangano (AI), imodoka zitagira umushoferi na robo zifite isura n'imikorere nk'iby’abantu.
Tesla kandi yatangaje ko mu gihembwe cya gatatu cya 2026 yagurishije imodoka 486,532, zirenze ibyo abasesenguzi bari biteze. Kuba Musk yongeye kurenga ku mutungo wa tiriyari imwe y'amadorali byamushyize ku ntera nini cyane ugereranyije n’abandi baherwe bakurikirana.
Nk’uko amakuru yatanzwe na Forbes abigaragaza, ku mwanya wa kabiri hari Jeff Bezos, washinze Amazon, ufite umutungo ugera kuri miliyari $371, mu gihe Larry Page, umwe mu bashinze Google, ari ku mwanya wa gatatu afite hafi miliyari $284.
Usibye Tesla na SpaceX, Musk afite n’ibindi bikorwa by’ikoranabuhanga, birimo xAI, ikigo cyibanda ku bwenge buhangano, ndetse na X, urubuga rw’imbuga nkoranyambaga rwahoze yitwa Twitter.
Muri Nzeri 2026, Musk yari mu bayobozi b’ibigo bikomeye by’ikoranabuhanga bashyize umukono ku masezerano agamije guteza imbere uburyo ibigo by’ikoranabuhanga byigenga mu gushyiraho no gukurikiza amahame ajyanye n’iterambere ry’ubwenge buhangano. Ibiganiro kuri ayo masezerano byabereye muri White House.
Kongera kurenga ku mutungo wa tiriyari imwe y'amadorali byongeye gushimangira umwanya wa Elon Musk nk’umuntu ufite ubutunzi bwinshi cyane mu mateka y'isi, nubwo agaciro k’umutungo we gakomeza guhindagurika bitewe n’uko imigabane ya Tesla na SpaceX ihagaze ku isoko.
Elon Musk yongeye kwandika amateka y'umuntu wa mbere ku Isi ufite umutungo urenga Tiriyari imwe y’amadolari