Elon Musk, ntiyemeranyije n’iyi mvugo. Abinyujije ku rubuga rwa X (Twitter) ku wa Kane, Musk yagize ati: “Izindi nkunga avuga ntazibaho.” Yongeyeho ko ubuyobozi bwa Trump bwakuyeho inkunga zose zijyanye n’ingufu zisukuye (clean energy), mu gihe inkunga ku bigo bikora kuri peteroli na gaze byo byazisigaranye.
Tesla na SpaceX ntibikiri mu bihe byoroshye
Ikigo Tesla, gikora imodoka zikoresha amashanyarazi, giherutse gutangaza ko kuvanaho inkunga ya $7,500 yagenerwaga umuntu ugura imodoka ya EV bizagira ingaruka ku isoko ry’Amerika. Ibi byagarutsweho ku wa Gatatu mu kiganiro cyagaragaje uko Tesla yitwaye mu bucuruzi. Vaibhav Taneja, ushinzwe imari muri Tesla, yavuze ko ihinduka ridasobanutse ryateje ibura ry’imodoka mu gihembwe cya kane.
Ku rundi ruhande, Musk yavuze ko SpaceX, ikigo cye cy’indege zoherezwa mu isanzure, gihabwa amasoko ya Leta ku bw’ubunyamwuga. Yagize ati: “Dukora akazi kenshi kandi ku giciro gito. Aramutse ashyize aya masoko ku yandi masosiyete, byasiga abashakashatsi bacu mu isanzure, ndetse bigatwara igihugu amafaranga menshi."
Umubano wa Trump na Musk wajemo igihu
Elon Musk yari umwe mu baterankunga bakomeye ba Trump mu matora ya 2024, aho bivugwa ko yatanze miliyoni $277 mu gushyigikira Trump n’abandi bo mu ishyaka rye.
Nyuma yo gutsinda amatora mu Ugushyingo, Musk yahawe inshingano zo kuyobora ishami rishya mu biro bya Perezida ryiswe DOGE, anatangira gahunda yo kugabanya ikiguzi cy’imikorere ya Leta.
Ariko ibyo byarangiye ku itariki ya 5 Kamena, ubwo Musk yatangiye kunenga bikomeye gahunda y’imisoro ya Trump, ayita “ikimenyetso cya ruswa mbi”, anavuga ko ari we wagize uruhare mu itsinda rye mu matora.
Trump yahise amusubiza kuri Truth Social ko azakuraho amasezerano ya Leta ibigo bya Musk bifitanye nayo, nk’uburyo bwo kuzigama amafaranga y’ingengo y’imari.
Musk nawe yahise amutera imboni, avuga ko yakwambura NASA ubwato bw’ikirere bwa Dragon Spacecraft ari bwo bukoreshwa mu bikorwa byo mu isanzure, ariko nyuma aza kwisubiraho.
Isoko ry’imari ryaranyeganyagiye
Ubusanzwe Elon Musk yigeze kwicuza ku magambo yavuze kuri Trump, avuga ko hari amakuru yashyize kuri X yarenze urugero, ariko amahoro hagati yabo ntiyatinze.
Ku wa 1 Nyakanga, Trump yongeye kumushinja yivuye inyuma, avuga ko Musk ari we muntu waba warabonye inkunga nyinshi kurusha abandi bose mu mateka, kandi ko aramutse adakomeje kuzibona, ibigo bye byafunga imiryango.
Trump yaragize ati: “Nta nkunga, Elon yari kuba yarasubiye muri Afurika y’Epfo. Nta modoka, nta byogajuru, nta bikoresho by’itumanaho. Igihugu cyacu cyari kuzigama akayabo.”
Musk yahise amusubiza ku mugaragaro agira ati: “Ndavuga neza: ZIKUREHO ZOSE, NONAHA.”
Nyuma y’iri hurizo, imigabane ya Tesla yagabanutseho 5%, aho ubu imigabane yayo imaze kugabanuka hejuru ya 24% kuva uyu mwaka watangira.
Guverinoma ya Amerika imaze gutanga miliyari nyinshi ku bigo bya Musk
Nk’uko bitangazwa n’iperereza rya Washington Post, ibigo bya Elon Musk bimaze guhabwa nibura miliyari $38 mu masezerano ya Leta, inkunga, inguzanyo cyangwa inyungu z’imisoro mu myaka 20 ishize.
Mu kiganiro yahaye abashoramari ku wa Gatatu, Musk yaragize ati: “Turimo kujya mu gihe kidasanzwe aho tuzatakaza inkunga nyinshi muri Amerika. Ibi bishobora gutuma dutakaza byinshi mu mezi ari imbere.”