Element ategerejwe muri Uganda mu gitaramo azahuriramo n’abarimo Sheebah Karungi

Iki gitaramo kizabera ahazwi nka UMA Showgrounds, kikazatangira saa kumi n’ebyiri z’umugoroba. Gitegerejwe n’imbaga y’abazaba bishimira Eid mu murwa mukuru wa Uganda.

Element Eleeh azahurira ku rubyiniro n’abahanzi bakomeye muri Uganda barimo Sheebah Karungi, Rema Namakula, King Saha, Maddox, ndetse na Hajj Haruna Mubiru, Mesach Semakula, Laika Music, Kapeke, Myco Puma n’andi matsinda arimo Amatali.

Ni igitaramo kizaba gihuza umuziki n’urwenya, kikaba giteganyijwe gutanga ibyishimo ku bari mu murwa mukuru wa Uganda no mu nkengero zawo, by’umwihariko ku bari kwizihiza Eid nyuma y’ibyumweru by’isengesho n’igisibo.

Uretse abahanzi, iki gitaramo kizitabirwa kandi n’abanyarwenya bakomeye muri Uganda barimo Madrat & Chiko, MC Mariachi, Amooti Omubalanguzi, Maulana na Reign, Sammie na Shawa, Raj Kabeja, Merry Heart Comedians, Shequin & Eva, Bobi Brown, Nilo Nilo, Bizonto n’abandi benshi bazaba bafite n’ibindi bitunguranye.

Iki gikorwa kizayoborwa na Alex Muhangi na Kalela Daniel, basanzwe ari bo bayobora ibitaramo bya Comedy Store, bakaba bazafasha gutuma iri joro riba iridasanzwe ku bazaryitabira.

Comedy Store ni urubuga rw’imyidagaduro rumaze kuba ikimenyabose i Kampala, ruzwiho guhuza urwenya n’umuziki mu buryo bwihariye. Rwagiye rwiyubakira izina nk’ahantu hahurira abanyarwenya bazwi n’abakizamuka, kimwe n’abahanzi bakomeye bo muri Uganda no mu Karere ka Afurika y’Iburasirazuba.

Biteganyijwe ko amatike azagurwa ku mafaranga 50,000 y’amashilingi ya Uganda ku myanya isanzwe, 100,000 ku myanya ya VIP, naho ameza y’abantu batanu azaba agurwa Miliyoni 1 y’amashilingi ya Uganda.

Ku ruhande rwa Element Eleeh, iki gitaramo ni indi ntambwe ikomeye mu gukomeza kwagura izina rye ku rwego mpuzamahanga, aho akomeje kwigaragaza nk’umwe mu bahanzi n’abatunganya indirimbo bagezweho mu Rwanda no hanze yarwo.

Element Eleeh ategerejwe i Kampala mu gitaramo cya Comedy Store kizahurirana n’Umunsi wa Eid, aho azahurira ku rubyiniro n’abahanzi bakomeye bo muri Uganda

Sheebah Karungi azongera guhura n’abakunzi be mu gitaramo giteganyijwe kubera muri UMA Showgrounds ku munsi wa Eid

Rema Namakula azahurira ku rubyiniro rumwe na Element Eleeh n’abandi bahanzi bakomeye mu gitaramo cya Comedy Store

Abahanzi barimo Element Eleeh, Sheebah Karungi, Rema Namakula na King Saha bazahurira mu gitaramo gikomeye cya Eid cyateguwe na Comedy Store