Uyu mugabo amaze gukora filime zitandukanye zirimo Diaspora, Ikigeragezo, Maya na Amahitamo, filime yagarutseho mu kiganiro, asobanura ubutumwa yashakaga kugeza ku bayireba.
Egide yavuze ko Amahitamo ari filime yubakiye ku rukundo, ariko ikagaruka no ku ruhare rw’ababyeyi mu guhitiramo abana babo abo bazakundana na bo.
Yasobanuye ko mu buzima busanzwe hari ababyeyi bagira uruhare rukomeye mu guhitiramo abana babo abo bazashakana na bo, ariko we akemera inama aho kwemera ko bamufatira umwanzuro. Yagize ati: “Nemera inama, ariko sinemera uwamfatira umwanzuro.”
Ubu butumwa bugaragaza ko umuntu ashobora kumva inama z’abandi, ariko ko gufata icyemezo ku buzima bwe bwite na byo bifite agaciro.
Egide yavuze ko gukunda Cinema ari byo bituma akomeza kuyishoramo imari, nubwo bitajya bimworohera kubona amafaranga yo gukomeza ibikorwa bye.
Yavuze ko iyo amafaranga amushiranye, ashaka ibiraka akora, amafaranga abonye akayashora muri Cinema kugira ngo akomeze kugera ku ntego afite muri uyu mwuga.
Yagize ati: “N’intumbero mfite muri Cinema, ndabikunda kuko n’iyo amafaranga ashiranye nkora ibiraka nkabona amafaranga nkayashora.”
Yongeyeho ko imbogamizi afite muri iki gihe zirimo kuba bamwe mu bantu bamushyigikiraga batangiye gucika intege, bakamubwira ko amaze igihe muri Cinema ariko ntacyirimo.
Nubwo bimeze bityo, yavuze ko adashaka gucika intege, ahubwo akomeje kwizera ko kwihangana no gukomeza gukora bizamufasha kugera ku byo yifuza.
Egide yavuze ko iyo agiye guhitamo umukinnyi wo gukorana na we, areba ubushobozi bwe n’icyo amushakaho ko azakibona, aho kwibanda ku bindi bintu bitajyanye n’uruhare agiye kumuha.
Yagize ati: “Ndeba icyo mushakaho ko nzacyibona, ntabwo ibindi nkuze kubyitaho.”
Ibi bigaragaza ko mu guhitamo abakinnyi, ashingira ku bushobozi bwabo bwo kuzuza inshingano baba bahawe muri filime.
Egide yanagarutse kuri Nyambo bakinanye muri filime, avuga ko igihe bakoranaga ari bwo yari agitangira urugendo rwe muri Cinema.
Yavuze ko akunda uburyo Nyambo akina filime, by’umwihariko uko yitwaye muri My Heart, aho yakinaga ari impumyi.
Yamushimye kandi ku buhanga agaragaza mu kwitwara ku nkuru zitandukanye zimuvugwaho ku mbuga nkoranyambaga.
Mu bindi, Egide yavuze ko hari igice cyo muri filime Amahitamo cyamugoye ubwo yari kumwe na Milly mu biro, hafi y’agace k’inganda.
Yasobanuye ko igihe batangiraga gufata amashusho muri ako gace, urusaku rwahabaga rwabagoraga, rukaba intambamyi mu kazi kabo.
Killerman, Regis na Mitsutsu ni bamwe mu bakinnyi yashimye
Egide yavuze ko hari abakinnyi asanga bafite ubushobozi bwo gukina inshingano zitandukanye, agatanga urugero rwa Killerman, wavuze ko akina filime nyinshi kandi akabikora neza.
Yavuze ko uruhare rurimo ibijyanye n’igisirikare yaruhitiramo Regis, mu gihe Mitsutsu na we yamushimye kubera ubuhanga bwe mu gusetsa.
Egide yavuze ko gukorana na Mitsutsu, afite ari byiza ndetse ko afite ubushobozi bwo gusetsa nabo bari gukorana.
Mu gihe bamwe mu bamushyigikiraga batangiye kumuca intege, Egide akomeje gushora imari muri Cinema, ashingiye aho yavuye naho ageze icyizere afite cy’uko uyu mwuga ushobora gukomeza kumugeza ku ntego ze.
Egide yavuze icyamufashije kudacika intege mu gushora imari muri Cinema