Egide Nibigira winjijwe muri Cinema na Nyambo yamuritse filime ‘Amahitamo’- VIDEO

Igice cya mbere (Episode 1) cy’iyi filime cyagiye hanze ku wa Mbere, tariki 6 Gicurasi 2025, kikazajya gitambuka ku muyoboro wa YouTube witwa LWIKO MEDIA. Izajya isohoka inshuro eshatu mu cyumweru: ku wa Mbere, ku wa Gatatu no ku wa Gatanu saa munani z’amanywa (8:00AM).

Filime Amahitamo irimo ibyamamare muri sinema y’u Rwanda barimo: Egide Nibigira, JMV Hategekimana uzwi nka Shareef cyangwa Papa Killaman, Byishimo Emelyne uzwi nka Milly, Isimbi Sabrine uzwi nka Isimbi, Iribagiza Vanessa uzwi nka Baby Nessa, Scott Emile n’abandi.

Mu kiganiro na InyaRwanda, Egide yasobanuye ko filime ye ‘Amahitamo’ ishingiye ku musore wo mu muryango ukize, utarahiriwe n’urukundo ariko bikamujyana ku ndaya, mu gihe abandi bakobwa bamurwanira.

Egide avuga ko igitekerezo cyo kwandika iyi filime cyaturutse mu biganiro mpaka yagiranye na bagenzi be mu 2018, ubwo bigaga, aho bamwe bavugaga ko urukundo rutagihari, ahubwo rwabaye inyungu gusa.

“Kwikorera biraryoshye kurusha gukinira abandi”

Egide avuga ko yahisemo kwikorera nyuma yo kubona ko gukina gusa bidatanga amafaranga ahagije. Avuga ati: “Iyo wikorera ubona agatubutse. Nubwo nabanje kwinjira muri sinema nyine nk’umukinyi, ubu nahisemo gutangira kubyikorera kugira ngo niteze imbere neza.”

Uyu musore yinjiye muri sinema mu 2023 abifashijwemo na Miss Nyambo, bamenyaniye kuri Instagram. Aho kuva ubwo, amaze gukina muri filime zitandukanye zirimo: Ibanga Series, The Message, Houseboy, La vie ya Jojo, Besto, Amarira y’Umusirikare, My Neighbor, Kwa Bijyiyobijya n’izindi.

Avuga ko sinema yamuhaye izina rimufasha no hanze y’akazi. Ati “Hari aho kujya gusaba serivisi bikoroha kuko abantu bamenya ko uri wa muntu wo muri filime. Ubu ni bwo buzima mbayemo, kandi sinabona undi mwuga unshimisha kurusha sinema.”

Ibi bikorwa bya Egide bije mu gihe sinema nyarwanda iri kugenda ihindura isura. Abakinnyi n’abatunganya filime barimo kwiyongera, ikoranabuhanga ryafunguye amarembo ku rubyiruko rwifashisha imbuga nkoranyambaga nka YouTube na TikTok mu gukwirakwiza ibikorwa.

Nubwo hakiri imbogamizi zifitanye isano n’amikoro make n’ibikoresho bigezweho, sinema nyarwanda iragenda isagamba. Filime ziri kujya zigaruka ku nkuru z’ubuzima bwa buri munsi, bikongera isano n’abaturage b’imbere mu gihugu n’ababa hanze.

Egide agira ati: “Nta bushobozi bwinshi mfite, ariko urukundo mfitiye sinema rurarenze. N’iyo bitari kuba akazi nayikora. Umukinnyi wa filime Jackie Chan yari isi yanjye nkiri muto, none nange ndi kuyikoramo ibyanjye.”

Uyu musore ni umwe mu bafite icyerekezo gifatika, gishingiye ku kwigira no gukoresha amahirwe mashya atangwa n’ikoranabuhanga. Ibi bigaragaza ko ejo hazaza ha Cinema nyarwanda hashobora kuba heza, niba impano nk’izi zifashijwe, zikagirwa icyitegererezo ku bandi.

Nibigira Egide Gerradson uzwi nka Mike, ari nawe muyobozi w’iyi filime y'uruhererekane yise ‘Amahitamo’

Isimbi Sabrine ukina yitwa ‘Maya’ muri filime ‘Amahitamo’

Hategekimana Jean Marie Vianney [Ngoga] 

Byishimo Emelyne ukina yitwa Milly 

Ntirenganya Emile [Scott] 

Filime ‘Amahitamo’ yatangiye gutegurwa kuva mu 2018, aho ishingiye ku kuntu urubyiruko rufata urukundo muri iki gihe

Nyiransengimana Joseline ukina ari Mama Mike muri iyi filime ‘Amahitamo’

Iribagiza Vanessa uzwi nka Nessa muri filime ‘Amahitamo’ 

Egide yatangaje ko yinjiye muri Cinema abifashijwemo na Nyambo nyuma y’uko amwandikiye binyuze ku rubuga rwa Instagram

KANDA HANO UBASHE KUREBA IGICE CYA MBERE CYA FILIME ‘AMAHITAMO’ YA EGIDE