Raporo yatangajwe ku wa Gatanu, tariki ya 30 Ukwakira 2026, n'itsinda rishinzwe ibikorwa byo kurwanya Ebola mu biro bya Perezida wa DRC igaragaza ko abantu 10,351 bamaze kwemezwa ko banduye iyi virusi, muri bo 5,026 bakaba barapfuye.
Abashinzwe ubuzima kandi batangaje ko abantu 77 bashya banduye Ebola, mu gihe abandi 34 bapfuye, bikomeza kugaragaza ubukana bw'iki cyorezo.
Inkuru dukesha ikinyamakuru BBC Gahuzamiryango igaragaza ko, intara ya Ituri ari yo ikomeje kugaragaramo umubare munini w'abanduye.
Nk'uko iyo raporo ibivuga, iyo ntara yihariye 71% by'abantu bose bamaze kwemezwa ko banduye, ndetse na 36,4% by'abanduye bashya batangajwe ku rwego rw'igihugu.
Mu turere tw'ubuzima 178 tugize DRC, 67 tumaze gutangaza ko twagaragayemo abantu banduye Ebola. Iki cyorezo kandi kimaze kugera mu ntara umunani muri 26 zigize icyo gihugu.
Raporo igaragaza ko igipimo cy'impfu mu bantu banduye kiri kuri 48,6%, mu gihe abarwayi 1,101 bakomeje kwitabwaho mu bigo bivurirwamo Ebola no mu bigo by'akato. Abantu 2,788 bo bamaze gukira iyi ndwara.
Nubwo ibikorwa byo guhangana n'iki cyorezo bikomeje, umutekano muke mu bice by'uburasirazuba bwa DRC byibasiwe na Ebola uracyabangamira abakozi b'ubuzima.
Mu duce tumwe na tumwe, amatsinda ashinzwe kurwanya Ebola yagiye ahura n'iterabwoba ndetse n'ibitero by'abantu batemera cyangwa badashyigikiye ingamba zafashwe mu guhangana n'iki cyorezo.
Ibi bituma ibikorwa byo gukurikirana abanduye, kwita ku barwayi no gukumira ikwirakwira ry'iyi virusi birushaho kugorana.
Ikindi gihangayikishije abashinzwe ubuzima ni uko kugeza ubu nta rukingo rwemewe rwo gukingira abantu indwara ya Ebola yo mu bwoko bwa Bundibugyo ruhari.
Urukingo rwa Ervebo rwakoreshejwe mu guhangana n'ibyorezo bya Ebola yo mu bwoko bwa Zaire, ariko ntirukingira mu buryo bwemejwe ubwoko bwa Bundibugyo.
Ishami ry'Umuryango w'Abibumbye Ryita ku Buzima (OMS) rikomeje gusaba inkunga y'inyongera kugira ngo ibikorwa byo kurwanya iki cyorezo bishobore gukomeza, mu gihe hari impungenge z'uko gishobora gukwirakwira no mu tundi duce.
Icyorezo cya Ebola muri RDC cyatumye ibindi bihugu byongera ingamba zo kugenzura no kwitegura guhangana n'iyi ndwara.