Imibare mishya yashyizwe ahagaragara igaragaza uko icyorezo cyari gihagaze kugeza ku wa Kabiri, aho abantu 63 bashya basanzwemo ubwandu bwa Ebola mu masaha 24 yabanje. Ibyo byatumye umubare w'abamaze kwandura ugera ku bantu 2,536 mu ntara eshanu z'igihugu zibasiwe n'iki cyorezo.
Muri icyo gihe kandi, abantu 34 bahitanywe n'iki cyorezo, bituma umubare w'abamaze gupfa ugera ku 1,033. Ni imibare igaragaza ko nubwo ibikorwa byo guhangana na Ebola bikomeje, iki cyorezo kigifite ingaruka zikomeye ku buzima bw'abaturage.
Nk’uko tubikesha ikinyamakuru BBC Gahuzamiryango, Intara ya Ituri ni yo ikomeje kuba ku isonga mu zibasiwe cyane na Ebola. By'umwihariko, Umujyi wa Bunia n'agace ka Rwampara byonyine bifite abarenga kimwe cya kabiri cy'abanduye bose.
Mu Ntara ya Kivu ya Ruguru habonetse abantu 12 bashya banduye, mu gihe abandi batandatu bahaguye. Mu Ntara ya Haut-Uélé hagaragaye abanduye batanu n'abandi babiri bahitanywe na Ebola. Ku rundi ruhande, Intara ya Kivu y'Epfo na Tshopo nta barwayi bashya bahagaragaye.
Kugeza ubu, abarwayi 738 bari kwitabwaho mu bigo byabugenewe, barimo 556 bo muri Ituri na 182 bo muri Kivu ya Ruguru. Hari kandi icyizere gituruka ku kuba abantu 24 bakize ku munsi umwe, bituma umubare w'abamaze gukira ugera kuri 506.
Nubwo hari intambwe zimwe zatewe mu kuvura abarwayi no kubaha ubufasha, inzego z'ubuzima zivuga ko ikibazo gikomeye kikiri mu gukurikirana abantu bahuye n'abanduye.
Kugeza ubu, iki gikorwa kiri ku kigero cya 77%, ibintu bivuze ko hakiri icyuho gishobora gutuma ubwandu bukomeza gukwirakwira.
Iki cyorezo cyatangajwe muri Gicurasi uyu mwaka, ariko gikomeje gukwirakwira bitewe n'impamvu zitandukanye zirimo urujya n'uruza rw'abaturage, umutekano mucye mu bice bimwe na bimwe by'igihugu, ubucukuzi bw'amabuye y'agaciro bukorwa mu buryo bwa gakondo ndetse n'ubucuruzi bwambukiranya imipaka.
Inzego z’ubuzima zisanga gukomeza gushakisha no gukurikirana abantu bahuye n'abarwayi, kongera ubukangurambaga mu baturage no gukomeza kuvura abanduye ari byo bizafasha guca intege ikwirakwira ry'iki cyorezo no kugabanya umubare ukomeje kwiyongera w'abahitanwa na Ebola.
Mu gihe DRC ikomeje urugamba rwo guhashya Ebola, inzobere zigaragaza ko ubufatanye bw'inzego za Leta, abaturage n'imiryango mpuzamahanga buzagira uruhare rukomeye mu guhagarika iki cyorezo no kurinda ubuzima bw'abaturage.